بۇگىن «ەگەمەن قازاقستان» رەسپۋبليكالىق گازەتىنىڭ عيماراتىندا ۇلتتىق ينتەرنەت اسسوتسياتسياسى ۇيىمداستىرعان «باق قوعامداعى قۇقىق بۇزۋشىلىققا «مۇلدەم توزبەۋشىلىكتى» قالىپتاستىرۋ قۇرالى رەتىندە» اتتى كونكۋرستىڭ قورىتىندىسى بويىنشا قۇتتىقتاۋ ءراسىمى ءوتتى.
عالامتور ءتىلىن قازاقشالاۋدى, بيلىك پەن بۇقارانىڭ اراسىن ينتەرنەت ارقىلى جاقىنداستىرۋدى كوزدەيتىن ۇلتتىق ينتەرنەت اسسوتسياتسياسى بيىل 21 شىلدەدەن باستاپ «باق قوعامداعى قۇقىق بۇزۋشىلىققا «مۇلدەم توزبەۋشىلىكتى» قالىپتاستىرۋ قۇرالى رەتىندە» اتتى جوبانى جۇزەگە اسىرا باستاعان بولاتىن. وسى جوبا اياسىندا اتالعان ۇيىم 21 قىركۇيەك پەن 13 قاراشا ارالىعىندا قۇقىقتىق ساۋاتتىلىققا بايلانىستى وزەكتى ماسەلەلەردى سايتتا جانە الەۋمەتتىك جەلىلەردە جاريالاعان جۋرناليستەر مەن بلوگەرلەر اراسىندا كونكۋرس جاريالادى.
«ۇلتتىق ينتەرنەت اسسوتسياتسياسى» زاڭدى تۇلعالار بىرلەستىگىنىڭ پرەزيدەنتى سەرىكقازى كاكىبالانوۆتىڭ ايتۋىنشا حالىق قۇقىعىنىڭ بۇزىلۋىنا جول بەرمەي, ولاردىڭ زاڭدىق ساۋاتىن ارتتىرۋعا جانە قوعامدا قىلمىستىڭ ازايۋىنا ۇلەس قوسۋ ماقساتىندا ءۇش نوميناتسيا بويىنشا ۇيىمداستىرىلعان بايقاۋعا 100-دەن اسا ماتەريال كەلىپ ءتۇسىپتى.
«ۇزدىك ماقالا» نوميناتسياسى بويىنشا 1-ورىندى ايبەك قابدەشوۆ جەڭىپ السا, 2-ورىندى اقبوتا احمەت يەمدەندى. ەرمەك يساباەۆ وسى اتالىمنىڭ 3-ورىن يەگەرى اتاندى. «ۇزدىك ۆيدەوماتەريال» نوميناتسياسىنىڭ 1-ورنى الەكساندرا ميليچكيناعا بەرىلسە, 2-ورىندى جۇلدىز جاسۇزاق الدى. 3-ورىن ازامات ەرعاليەۆقا بۇيىردى. ال «الەۋمەتتىك جەلىدەگى ۇزدىك جازبا» نوميناتسياسىندا 1-ورىن سەرىك ەرعاليعا, 2-ورىن جانار نۇرىشەۆاعا, 3-ورىن ءساتجان كارىپباەۆقا بەرىلدى.
جەڭىمپازدارعا ۇلتتىق ينتەرنەت اسسوتسياتسياسى ديپلومدارمەن قوسا سمارتفوندار تابىس ەتسە, «ەگەمەن قازاقستان» رەسپۋبليكالىق گازەتى ءابىش كەكىلباەۆتىڭ ء«داۋىر داۋىسى» كىتابى مەن شەرحان مۇرتازانىڭ «نامىس نايزاعاي» كىتاپتارىن سىيلادى.
ماراپاتتاۋ كەزىندە ءسوز العان ازاماتتىق باستامالاردى قولداۋ ورتالىعى ديرەكتورىنىڭ ورىنباسارى گۇلنار ورالوۆا جەڭىمپاز جۋرناليستەر مەن بلوگەرلەردىڭ ەڭبەگىن جوعارى باعالاپ, ولاردىڭ قۇقىقتىق مەملەكەت قۇرۋعا ۇلەس قوسىپ جاتقانىن ايتتى. سونداي-اق سىيلىق تابىستاۋعا قاتىسقان اقىتبەك شەريزات ۇلى قىتايداعى ينتەرنەت قاۋىپسىزدىگىنە توقتالىپ, ونداعى الەۋمەتتىك جەلىلەر مەن كەز كەلگەن سايتتارعا تەك قانا شىنايى اتپەن جانە قۇجات ءنومىرى ارقىلى عانا تىركەلە الاتىنىن جەتكىزدى.
ۇلتتىق ينتەرنەت اسسوتسياتسياسى جۇرگىزىپ وتىرعان بۇل جوبانى قر ءدىن ىستەرى جانە ازاماتتىق قوعام مينيسترلىگىنە قاراستى ازاماتتىق باستامالاردى قولداۋ ورتالىعى گرانت ارقىلى قارجىلاندىردى.
مايگۇل سۇلتان,
«ەگەمەن قازاقستان»