استانادا ازاماتتاردىڭ بىرلەسۋ بوستاندىعى كونستيتۋتسيالىق قۇقىقتارىن قامتاماسىز ەتۋدەگى جانە ازاماتتىق قوعام ينستيتۋتتارىن دامىتۋداعى قىزمەتىن تالقىلاۋعا ارنالعان ادام قۇقىقتارى جونىندەگى كوميسسيانىڭ كەڭەيتىلگەن وتىرىسى ءوتتى.
ءماجىلىس دەپۋتاتى قۋانىش سۇلتانوۆ توراعالىق ەتكەن جيىندا 2016-2020 جىلدارعا ارنالعان ۇەۇ مەن مەملەكەتتىڭ ىنتىماقتاستىعىن دامىتۋ جونىندەگى جالپىۇلتتىق ءىس-قيمىل جوسپارىن, 2016 جىلى VII ازاماتتىق فورۋمنىڭ ۇسىنىمدارىن ىسكە اسىرۋ ماسەلەلەرى تالقىلاندى.
وسى ماسەلە توڭىرەگىندە ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ بەرىلگەن تاقىرىپتا بايانداما جاسادى. ۆەدومستۆو باسشىسى ۇكىمەتتىك ەمەس ۇيىمدارمەن ءوزارا ءىس-قيمىلدى سيپاتتايتىن نەگىزگى باعىتتار جونىندە اڭگىمەلەپ بەردى. ونىڭ ايتۋىنشا, مينيسترلىك ازاماتتىق فورۋم مەن ۇەۇ-مەن ءوزارا ءىس-قيمىل جونىندەگى ۇيلەستىرۋ كەڭەسىنىڭ جۇمىسى جۇرگىزىلمەك. وندا اتالعان سالانى زاڭنامالىق جانە ينستيتۋتسيونالدىق دامىتۋدىڭ ماڭىزدى ماسەلەلەرى شەشىلەدى. ءمينيستردىڭ ايتۋىنشا, ايماقتاعى ۇكىمەتتىك ەمەس ۇيىمدارمەن دە ءوزارا ءىس-قيمىلدى ۇيلەستىرۋ جوسپاردا بار.
«مينيسترلىكتىڭ باستاماسىمەن 2017 جىلدىڭ باسىنان ازاماتتىق سەكتور وكىلدەرىمەن بىرلەسىپ حالىقتى تولعاندىراتىن وزەكتى ماسەلەلەردى مونيتورينگ جاساۋ جانە جيناقتاۋ جۇمىسى جۇرگىزىلىپ كەلەدى. بۇگىنگى دەيىن 130-دان استام سۇراق انىقتالعان. وسى ماسەلەلەر بويىنشا جيناقتالعان دەرەكتەر ۇكىمەتكە جولداندى. سونىمەن قاتار, ءتيىستى تاپسىرمالار بەرىلىپ, ونىڭ ورىندالۋ بارىسى مينيسترلىكتىڭ نازارىندا بولادى», دەدى ۆەدومستۆو باسشىسى.
ن. ەرمەكباەۆ ەرىكتىلەردىڭ جۇمىسىن ۇيلەستىرۋ, ازاماتتىق قوعام جونىندەگى زاڭ جوباسى, الەۋمەتتىك باعدارمالاردىڭ ساپاسىن ارتتىرۋ توڭىرەگىندە ءسوز قوزعادى. ءمينيستردىڭ سوزىنە سۇيەنسەك, ءبىرىنشى رەت وتكىزىلگەن رەسپۋبليكالىق قوعامدىق كەڭەس ءماجىلىسىنىڭ قورىتىندىلارى بويىنشا اتالعان ۇيىمنىڭ جالپىلانعان تاجىريبەسى مەن ولاردىڭ قىزمەتىن جەتىلدىرۋگە ارنالعان ۇسىنىمدار تۇجىرىمدالدى. بۇدان بولەك, ۇەۇ-دارعا گرانتتار ءبولۋ قاعيدالارى تولىقتىرىلعان. ۆەدومستۆو باسشىسى كەلتىرگەن دەرەكتەرگە سۇيەنسەك, 2016 جىلى 208 ميلليون تەڭگەلىك 11 جوبا جۇزەگە اسقان. بيىل قارجىلاندىرۋ كولەمى 3 ەسەگە ءوسىپ, 608,5 ميلليون تەڭگەنى قۇراپ وتىر.
تالقىلاۋعا قاتىسقان ساراپشىلار بيلىك پەن قوعامنىڭ كۇش-جىگەرىن بىرىكتىرۋ ءاربىر ادامنىڭ قۇقىقتارى مەن بوستاندىقتارىنا قاتىستى كونستيتۋتسيالىق نورمالاردى ىسكە اسىرۋعا مۇمكىندىك بەرەتىنىن اتاپ ءوتتى. سونداي-اق, ازاماتتىق فورۋم مەن ۇەۇ-مەن ءوزارا ءىس-قيمىل جونىندەگى ۇيلەستىرۋ كەڭەسىمەن تۇراقتى اشىق ديالوگ جۇرگىزىلۋىن جوعارى باعالادى. كوميسسيا وتىرىسىندا تۇجىرىمدالعان ۇسىنىمدار مەملەكەت باسشىسىنىڭ, پارلامەنت پەن ۇكىمەتتىڭ نازارىنا ۇسىنىلادى.
اباي اسانكەلدى ۇلى,
«ەگەمەن قازاقستان»