«تۋعان جەرگە تاعزىم» اكتسياسى اياسىندا ورال جانە اتىراۋ قالالارىندا قىزمەت ەتىپ جۇرگەن ءبىر توپ بىلىكتى دارىگەر باتىس قازاقستان وبلىسى اقجايىق اۋدانىنا قاراستى تايپاق اۋىلىنا اتتاندى. ولار 15-16 قاراشا كۇندەرى اۋىل تۇرعىندارىمەن جۇزدەسىپ, اۋداندىق اۋرۋحانادا ناۋقاستارعا مەديتسينالىق كومەك كورسەتەدى.
«اق حالاتتى ابزال جان» جەرلەستەر فورۋمىنا بۇرىن تايپاقتا دۇنيەگە كەلگەن نەمەسە قىزمەت ەتكەن 32 بىلىكتى مامان قاتىسىپ وتىر. ولاردىڭ بەسەۋى كورشىلەس اتىراۋ وبلىسىنان كەلىپتى. دارىگەرلەرمەن بىرگە ورال قالاسىنان الىستاعى اۋىلعا جىلجىمالى فليۋروگرافيا جانە ماموگرافيا اۆتوكەشەندەرى دە جول تارتتى.
- ەلباسى نۇرسۇلتان ءابىش ۇلى نازارباەۆ «بولاشاققا باعدار: رۋحاني جاڭعىرۋ» ماقالاسىندا ۇلت دەنساۋلىعىن نىعايتۋ ماسەلەسىن قوزعاعان بولاتىن. حالىق دەنساۋلىعى «قازاقستان-2030» ستراتەگيالىق جولداۋىندا دا ايقىن كوتەرىلگەن. سوندىقتان شالعاي اۋىلداردا مەديتسينالىق قىزمەت ساپاسى مەن ونىڭ قولجەتىمدىلىگىن ارتتىرۋ ماقساتىندا وبلىسىمىزدىڭ الدىڭعى قاتارلى بىلىكتى دارىگەرلەرى تايپاق اۋىلىنا اتتانعالى وتىر. ولار تۇرعىنداردىڭ حال-جاعدايىن تەكسەرىپ, كونسۋلتاتسيا بەرەدى. اۋىل حالقى مامان دارىگەرلەردى ىزدەپ قالاعا سابىلماي, ءوز اۋىلىندا ءجۇرىپ دەنساۋلىعىن تۇزەۋگە, مۇمكىندىك الادى. مۇنداي شارا بولاشاقتا باسقا اۋىلداردا دا جالعاسىن تابادى, - دەدى باتىس قازاقستان وبلىستىق دەنساۋلىق ساقتاۋ باسقارما باسشىسىنىڭ ەمدەۋ ءىسى بويىنشا ورىنباسارى گۇلنار ءابدىراحمانوۆا.
اقجايىق اۋدانىندا حالىققا 1 ورتالىق اۋداندىق اۋرۋحانا, 1 اۋىلدىق اۋرۋحانا, 11 دارىگەرلىك امبۋلاتوريا, 4 فەلدشەرلىك اكۋشەرلىك پۋنكت, 29 مەديتسينالىق پۋنكت مەديتسينالىق قىزمەت كورسەتەدى. اقجايىق اۋداندىق ورتالىق اۋرۋحاناسى 1974 جىلى سالىنىپ, 2016 جىلى اۋداندىق اۋرۋحانا «جۇمىسپەن قامىتۋ 2020» باعدارلاماسى اياسىندا كۇردەلى جوندەۋدەن وتكەن. اۋرۋحانادا 120 كەرەۋەتتىك 2 ستاتسيونار: حيرۋرگيالىق ءبولىم, تراۆماتولوگيالىق ءبولىم, گينەكولوگيالىق ءبولىم, ەمدەۋ ءبولىمى, بالالار ءبولىمى, پاتولوگيالىق ءبولىم, پەرزەنتحانا, جۇقپالى اۋرۋلار ءبولىمى, كورديولوگيالىق رەابليتاتسيا, نەۆرولوگيالىق رەابيليتاتسيا قىزمەت كورسەتەدى.
باتىس قازاقستان وبلىستىق دەنساۋلىق ساقتاۋ باسقارماسى ءباسپاسوز قىزمەتى حابارلاعانداي, 2018 جىلى ستاتسيوناردا مەيربيكەلىك جانە پالياتيۆتىك كومەك كورسەتەتىن كەرەۋەتتىك اشۋ جوسپارلانۋدا. اۋداندىق اۋرۋحانا جوعارى مەديتسينالىق جابدىقتارمەن قامتاماسىز ەتىلگەن. اۋدان بويىنشا 62 دارىگەردىڭ 17-ءى, 294 ورتا بۋىن مەديتسينا قىزمەتكەرىنىڭ 155-ءسى ساناتقا يە. سونىمەن قاتار 13 دارىگەر, 25 ورتا بۋىن قىزمەتكەرى, 3 پسيحولوگ مامان بىلىكتىلىگىن ارتتىرۋ كۋرستارىنا قاتىسىپ, ءبىلىمىن جەتىلدىرگەن. بيىل 7 دارىگەر سۋيتسيد پرەۆەنتسياسى بويىنشا بىلىكتىلىگىن ارتتىرۋدان وتكەن.
قازىبەك قۇتتىمۇرات ۇلى,
"ەگەمەن قازاقستان"
ورال قالاسى