وڭتۇستىك قازاقستان وبلىسى تۇلكىباس اۋدانىنداعى «بايتەرەك 4» جشس-ءنىڭ جۇمىسى قارقىن العان. كوكونىستەردى كونسەرۆىلەۋمەن اينالىساتىن مەكەمە جىلىنا 1,5 مىڭ توننا بولاتىن 28 ءتۇرلى ءونىم شىعارۋدا. بۇل تۋرالى وقو اكىمىنىڭ ءباسپاسوز قىزمەتى حابارلادى.
كاسىپكەر تاۋارلاردىڭ باسىم بولىگىن الماتى قالاسى مەن ەلىمىزدىڭ باتىس وڭىرلەرىنە جىبەرۋدە. بۇگىندە تابيعي, ەكولوگيالىق تازا ونىمدەرگە قىتاي حالقى دا قىزىعۋشىلىق تانىتا باستاعان.
«كۇن ساناپ ءبىزدىڭ ونىمگە دەگەن سۇرانىس كۇشەيىپ كەلەدى. تۇتىنۋشىلاردىڭ كوڭىلىنەن شىققاندىقتان دەپ ويلايمىن, قازىر شەتەلدىك نارىققا اياق باسىپ وتىرمىز. جازعى ۋاقىتتا 40 ادام جۇمىسقا تارتىلعان. ال, قازىر 20 ادام جۇمىس جاساۋدا», - دەدى «بايتەرەك 4» جشس ديرەكتورىنىڭ ورىنباسارى باقىتجان وسپانوۆ.
وڭدەلەتىن كوكونىستەر سايرام اۋدانىنان بولەك, قىرعىزستان, وزبەكستان ەلدەرىنەن دە ساتىپ الىنۋدا. كاسىپكەر الداعى ۋاقىتتا شيكىزاتتى دا ءوزى ءوندىرۋدى قولعا الماق. وسى جۇمىستاردى ىسكە اسىرۋ ءۇشىن اۋدان اكىمشىلىگىمەن بىرلەسكەن تۇردە ءتيىستى جۇمىستار اتقارىلۋدا.
ايتا كەتسەك, «بايتەرەك 4» جشس-ءنىڭ «كوكونىس كونسەرۆىلەۋ بازاسى 2015 جىلى «بيزنەستىڭ جول كارتاسى-2020» مەملەكەتتىك باعدارلاماسى اياسىندا ىسكە قوسىلعان. جوبانىڭ جالپى قۇنى 115 ملن. تەڭگە. ءوندىرىس ورنى قىتاي, رەسەي, جانە بولگاريا ەلدەرىنەن الىنعان زاماناۋي قۇرال جابدىقتارمەن جابدىقتالعان.