وركەنيەت كوشىنە ىلەسكەن قازاقستانىمىزدا ءتىل ساياساتى تاۋەلسىزدىك جىلدارىندا وزەكتىلىگىن جويعان ەمەس. الدىمىزدا تاريحي تاڭداۋ تۇردى.
ءتىلدىڭ دىبىستالۋى, وقىلۋى, تاڭبالانۋى دەگەن سەكىلدى قاعيداتتارىن ەسكەرەتىن بولساق, ءدال قازىر تاريح تارازىسىندا تۇرعان ماسەلە – ءتىلىمىزدىڭ تاڭبالانۋى. الەۋمەتتىك جەلىلەردە «ابىگەرگە» ءتۇسىپ جاتقان قانداستارىمىزدىڭ كەيبىر تەرىس پىكىرلەرىنە جىعىلا بەرگەندە, ءبىز زاماناۋي مۇمكىندىكتەن باس تارتقان بولار ەدىك.
نەگە دەيسىز عوي؟ جاۋابىن بەرۋگە تىرىسىپ كورەيىك. لاتىن گرافيكاسى – ءححى عاسىرداعى عىلىم مەن تەحنيكانىڭ ءتىلى. ەكونوميكالىق ۇنقاتىسۋلار ءتىلى. يننوۆاتسيالىق جاڭالىقتار تاسقىنى لاتىن تىلىندە تۇيىندەلىپ جاتقانىن باعامداعان ۇلت ۇلى مۇمكىندىكتەن باس تارتپاۋى كەرەك دەپ ويلايمىن. ەلباسى نۇرسۇلتان ءابىش ۇلى نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ تۇپكى ماقساتىن تۇسىنگەن ءاربىر وتانداسىمىز جاڭعىرۋدىڭ جازۋدان باستالاتىنىن ءتۇيسىنۋى كەرەك. ويتكەنى, ءبىز وركەنيەت كوشىندەگى وزىق وتىزدىقتىڭ ورتاسىنان ويىپ ورىن الۋىمىز ءۇشىن عالام تۇتىنعان گرافيكانىڭ تاڭبالانۋىن تاڭداپ وتىرمىز.
كەز كەلگەن جاڭا جوبانى قابىلداۋ بارىسىندا ءومىرى اسىعىس شەشىم قابىلداپ كورمەگەن مەملەكەت باسشىسى نۇرسۇلتان ءابىش ۇلى نازارباەۆ وسى جولى دا تاريحي تاڭداۋدىڭ سونشالىقتى ماڭىزدى ەكەنىن ءتۇيسىنىپ, ەلگە ءتۇسىندىرىپ, مەملەكەتىمىزدىڭ بولاشاعىنا بەيجاي قارامايتىن كوشباسشى ەكەندىگىن دالەلدەدى. تۇتاس قوعام ىشتەن تىنىپ, الۋان پىكىر تۋىنداپ تۇرعان تۇستا ەلدىڭ ەرتەڭى ءۇشىن ەڭ ماڭىزدى شەشىم قابىلداپ, جارلىققا قول قويدى.
جالپى, لاتىن گرافيكاسىن قوعامدىق جۇيە جاپپاي قابىلداۋى كەرەك. ورىس ءتىلدى اۋديتورياعا ء(بىلىم بەرۋ مەكەمەلەرى, وقۋ ورىندارى, مەملەكەتتىك ورگاندار ت.ب) دا لاتىن ءالىپبيىنىڭ تاريحي قاجەتتىلىگىن تۋدىرمايىنشا, مەملەكەتتىك ءتىلدىڭ كوسەگەسى كوگەرمەيدى. قازاقستان رەسپۋبليكاسىنىڭ ازاماتى رەتىندەگى مەنىڭ ۇسىنىسىم – وسى.
ءيا, ەلباسى جارلىعى تاريحي قادام بولعانىن, رۋحاني كەڭىستىگىمىزدىڭ ۇلى شەكسىزدىك ەكەنىن دالەلدەگەنىن ەسكەرە وتىرىپ, قابىلدانعان شەشىمگە قولداۋ كورسەتۋگە ءتيىسپىز. «كوش جۇرە تۇزەلەدى» دەمەكشى, لاتىن گرافيكاسىنا بىزدەن بۇرىن كوشكەن ەلدەردىڭ تاجىريبەسىن زەردەلەپ, قاتەلىگىن قايتالاماۋىمىز كەرەك. الگىندەي كەمشىن تۇستار ورتاق مۇددەگە وي قوسىپ, ىنتىماق تانىتقان جاعدايدا عانا وڭالاتىن دۇنيە ەكەنىن ەسكەرۋىمىز شارت.
قالاي بولعان كۇندە دە, قابىلدانعان بۇل نۇسقا لينگۆيست عالىمدار مەن ساراپشىلاردىڭ تالقىسىنان ءوتتى عوي. قولايلىلىق پەن مۇمكىندىكتىڭ بارلىعى ەسكەرىلدى دەگەن ويدامىز. بەكزات التىنبەكوۆ, قاراعاندى وبلىستىق ءماسليحاتىنىڭ دەپۋتاتى, قازاقستان حالقى اسسامبلەياسىنىڭ مۇشەسى