يراننىڭ باتىسىندا قۋاتتى جەر سىلكىنىسىنەن 336 ادام قازا تاپتى. بۇدان بولەك 4000-عا جۋىق تۇرعىن ءتۇرلى دەڭگەيدە جاراقات الدى. ءزىلزالا يران-يراك شەكاراسىندا تىركەلدى.
تابيعات اپاتىنان شەكارادان 15 شاقىرىم قاشىقتىقتا ورنالاسقان سارپول-ە زاحاب قالاسىنىڭ تۇرعىندارى جاپا شەكتى. جەرگىلىكتى بيلىك وپات بولعاندار سانى ءالى دە ارتۋى مۇمكىن دەگەن بولجام جاساپ وتىر. سەبەبى, قۇتقارۋشىلار توبى ءالى بىرنەشە ەلدى مەكەنگە بارىپ ۇلگەرمەگەن.
بۇل ماڭايدا تۇرعىن ۇيلەردىڭ باسىم بولىگى ساز بالشىقتان سالىنعاندىقتان قۋاتتى اپاتتارعا شىداس بەرمەيدى. يراننىڭ سەيسمولوگيالىق ورتالىعى ءدۇمپۋ 180 رەت ءجۇرىپ وتكەنىن, الداعى ۋاقىتتا ءالى دە قايتالانۋى مۇمكىن ەكەنىن حابارلادى.
سارپول-ە زاحاب قالاسىنداعى ورتالىق اۋرۋحانانىڭ عيماراتىنا ايتارلىقتاي زيان كەلگەن. وسىنىڭ سالدارىنان جارالانعاندارعا ءتيىستى دەڭگەيدە كومەك كورسەتۋ مۇمكىن بولماي وتىر. ال IRINN تەلەارناسى كەم دەگەندە سەگىز ەلدى مەكەنگە زيان كەلگەنىن جەتكىزدى.
– كەي جەرلەردە ەلەكتر ەنەرگياسى ءۇزىلدى, سونداي-اق تەلەكوممۋنيكاتسيالىق جۇيەگە زيان ءتيدى. بۇل ەلىمىزدە بولعان ەڭ ءىرى اپاتتاردىڭ ءبىرى. قازىرگى ۋاقىتتا 70 مىڭنان استام تۇرعىن باسپاناسىز قالدى, – دەدى دۇنيەجۇزىلىك قىزىل جارتى اي جانە قىزىل كرەستى يران ءبولىمىنىڭ باسشىسى مورتەزا ساليم.
ال يراننىڭ قۇتقارۋ قىزمەتىنىڭ باسشىسى پير-حوسسەين كۋليۆاند قۇتقارۋشىلار توبىنىڭ جۇمىسىنا كوشكىن كەدەرگى كەلتىرىپ وتىرعانىن مالىمدەدى.
– وتباسىمىزبەن وتىرىپ كەشكى اسىمىزدى ىشپەك بولعان ەدىك. كەنەتتەن ۇيىمىزدەگى زاتتار «بيلەپ» كەتكەندەي بولدى. العاشىندا قۋاتتى بومبا جارىلدى دەگەن ويدا بولدىم. بىراق ءبارى «جەر سىلكىندى» دەپ ايقايلاۋمەن بولدى, – دەدى باعداد قالاسىنىڭ تۇرعىنى مادجيدا امير.
جەر سىلكىنىسىنىڭ ماگنيتۋداسى 7,3 بالدى قۇرايدى. ال وشاعى 33,9 كم تەرەڭدىكتە ورنالاسقان. جەر استى ءدۇمپۋى تۇركيادا, يزرايلدە, كۋۆەيتتە سەزىلگەن.
يراكتا جەر سىلكىنىسىنەن اسىرەسە داربانديحان قالاسى زارداپ شەكتى. ول كۇرد اۆتونوميالىق ايماعىنداعى سۇلەيمانيا قالاسىنان 75 شاقىرىم قاشىقتىقتا ورنالاسقان. ءوڭىردىڭ دەنساۋلىق ساقتاۋ ءمينيسترى رەكاۋت حاما ءراشيدتىڭ ايتۋىنشا بۇل جاقتا دا جاعداي وتە قيىن. مۇندا 6 تۇرعىن قازا بولىپ, 50-دەن استامى ءتۇرلى جاراقات العان.
ايتا كەتەيىك, سەيسميكالىق ايماقتا ورنالاسقاندىقتان يراندا جەر سىلكىنىسى ءجيى بولىپ تۇرادى. 2003 جىلى ماگنيتۋداسى 6,6 بالدى قۇرايتىن اپاتتان 26 مىڭعا جۋىق ادام وپات بولىپ, ەلدىڭ وڭتۇستىك-شىعىسىنداعى تاريحي بام قالاسى ءىشىنارا قيراعان.
ايان ءابدۋالي, «ەگەمەن قازاقستان»