قازاقستان, تۇرىكمەنستان جانە وزبەكستاننىڭ سىرتقى ىستەر مينيسترلەرى ءۇش مەملەكەتتىڭ شەكارالارىنىڭ ءتۇيىسۋ نۇكتەسى تۋرالى كەلىسىمشارتقا قول قويدى, دەپ حابارلايدى قازاقپارات.
وعان قر سىرتقى ىستەر ءمينيسترى قايرات ابدراحمانوۆ, مينيسترلەر كابينەتى توراعاسىنىڭ ورىنباسارى - تۇرىكمەنستان سىرتقى ىستەر ءمينيسترى راشيد مەرەدوۆ جانە وزبەكستان سىرتقى ىستەر ءمينيسترى ابدۋلازيز كاميلوۆ قاتىستى.
ءتۇيىسۋ نۇكتەلەرى تۋرالى كەلىسىمشارتقا قول قويۋ قازاقستان, تۇرىكمەنستان جانە وزبەكستان اراسىنداعى مەملەكەتتىك شەكارانىڭ حالىقارالىق-قۇقىقتىق راسىمدەۋ كەزەڭدەرىنىڭ ءبىرىن تولىقتاي اياقتاۋعا, ءوزارا سىيلاستىقتى, ەگەمەندىك تەڭدىكتى جانە ءۇش شەكارالاس مەملەكەتتىڭ تەرريتوريالىق تۇتاستىعىن نىعايتۋعا مىقتى تىرەۋ بولادى.
«قازاقستان پرەزيدەنتى نۇرسۇلتان نازارباەۆ تاۋەلسىزدىك العان العاشقى كۇننەن باستاپ مەملەكەتتىك شەكارانى بەكىتۋ ماسەلەسىنە باسا نازار اۋداردى. بۇل جاۋاپتى مەملەكەتتىك قۇرىلىستىڭ جانە ەل قاۋىپسىزدىگى ماسەلەسى. بۇگىن قول قويىلعان ۇشجاقتى كەلىسىم ءۇش مەملكەتتىڭ شەكاراسىن قۇقىقتىق راسىمدەۋگە نۇكتە قوياتىندىقتان, ورتالىق ازيا ءۇشىن تاريحي جاعداي», - دەدى قازاقستان سىرتقى ىستەر ءمينيسترى قايرات ابدراحمانوۆ قول قويۋ راسىمىنەن كەيىن.