قازاقستان رەسپۋبليكاسى ۇلتتىق كىتاپحاناسىندا لاتىن ءالىپبيىن ۇيرەنۋ ورتالىعىنىڭ سالتاناتتى اشىلۋ ءراسىمى, سونداي-اق, «قازاقستان كىتاپحانالارىنىڭ قۇقىقتىق جانە كادرلىق تۇعىرناماسىن جاڭعىرتۋ» اتتى جىل سايىنعى وبلىستىق امبەباپ عىلىمي كىتاپحانالار ديرەكتورلارىنىڭ كەڭەسى ءوتتى.
ەلباسى ن.نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى بويىنشا ەلىمىزدەگى كىتاپحانا ءىسىنىڭ دامۋ ستراتەگياسىن انىقتاۋ, كىتاپحانا قىزمەتكەرلەرىنىڭ بىلىكتىلىگىن كوتەرۋ, ءوزارا تاجىريبە الماسۋ, ءوزارا ارەكەتتەستىك ارقىلى بىرلەسكەن جوبالاردى جۇزەگە اسىرۋدى ماقسات تۇتقان باسقوسۋ اياسىندا اشىلعان لاتىن ءالىپبيىن ۇيرەنۋ ورتالىعى ۇلتتىق كىتاپحانانىڭ باس بولۋىمەن ا.بايتۇرسىن ۇلى اتىنداعى ءتىل ءبىلىمى ينستيتۋتىمەن, الماتى قالاسى تىلدەردى دامىتۋ باسقارماسىمەن جانە ءال-فارابي اتىنداعى قازاق ۇلتتىق ۋنيۆەرسيتەتىمەن بىرلەسىپ قۇرىلعان.
ۇلتتىق كىتاپحانا ديرەكتورى جانات سەيدۋمانوۆ: «ۇلتتىق كىتاپحانا قورىندا 1929-1940 جىلدار ارالىعىندا ەلىمىزدە لاتىن گرافيكاسىمەن شىققان ون مىڭنان اسا كىتاپ, سونداي-اق سول كەزەڭدەگى بىرقاتار باسىلىمدار ساقتاۋلى. كىتاپحانامىزعا كەلەتىن جىلىنا 1 ميلليونعا جۋىق وقىرماننىڭ جەتپىس پايىزى جاستار بولسا, سول جاستاردىڭ لاتىن ءالىپبيىن ۇيرەنۋ ورتالىعىنا باس سۇعىپ, تەگىن تۇردە قاجەتتى ءبىلىم نارىمەن سۋسىنداۋىنا بار مۇمكىندىكتى جاسادىق دەۋگە بولادى. ورتالىقتا ءتورت بىردەي مەكەمە ماماندارى كەلۋشىلەرگە قاجەتتى اقىل-كەڭەستەرىن, باعىت-باعدارىن بەرىپ وتىراتىن بولادى. ەندى جوسپارعا سايكەس, لاتىن ءالىپبيىن ۇيرەتۋ, وقىتۋ جۇمىستارى, الماتى شاھارىنداعى لاتىن قارپىندە شىققان كىتاپتاردىڭ تۇساۋكەسەرلەرى بولاشاقتا وسى ورتالىقتا ءوتىپ تۇراتىن بولادى», دەي كەلە, ەلىمىزدەگى بارلىق وبلىستىق كىتاپحانالاردا وسىنداي لاتىن ءالىپبيىن ۇيرەنۋ ورتالىقتارىن اشۋ ماسەلەسى قولعا الىناتىندىعىن جەتكىزدى.
لاتىن ءالىپبيىن ۇيرەنۋ ورتالىعىنىڭ سالتاناتتى اشىلۋ راسىمىنەن كەيىن ەلىمىزدەگى بارلىق وبلىستىق كىتاپحانالار باسشىلارىنىڭ «قازاقستان كىتاپحانالارىنىڭ قۇقىقتىق جانە كادرلىق تۇعىرناماسىن جاڭعىرتۋ» اتتى جىل سايىنعى ارنايى باسقوسۋىندا «تمد-عا قاتىسۋشى مەملەكەتتەرگە ارنالعان مودەلدى كىتاپحانالىق كودەكستىڭ» 2016 جىلعى جاڭا رەداكتسياسى, سونداي-اق, «كىتاپحانا ءىسى تۋرالى» زاڭ جوباسىنا, «اۋىلدىق كىتاپحانالاردى مادەنيەت, اعارتۋ, بوس ۋاقىت وتكىزۋ ورتالىعى رەتىندە جاڭعىرتۋ تۋرالى ەرەجەنىڭ» جوباسىنا قاتىستى ۇسىنىستار تالقىلانىپ, «قازاقستاننىڭ كىتاپحانا ءىسى سالاسى ماماندارىن سەرتيفيكاتتاۋ ورتالىعى تۋرالى», «قازاقستان رەسپۋبليكاسى مادەنيەت جانە سپورت ءمينيسترىنىڭ 2017 جىلعى 17 شىلدەدەگى № 209 بۇيرىعى بويىنشا قابىلدانعان تيپتىك بىلىكتىلىك سيپاتتامالاردىڭ كىتاپحانالاردىڭ زاماناۋي قىزمەتىنە سايكەستىگى» تاقىرىبىندا باياندامالار جاسالدى.
وبلىستىق كىتاپحاناشىلار جيىنىندا, سونداي-اق, «تۋعان ولكەم» اقپاراتتىق پورتالىنىڭ تۇساۋكەسەرى ءوتىپ, كەڭەس وتىرىسى اياسىندا قازاقستاننىڭ كىتاپحانا ءىسىنىڭ دامۋ جەتىستىكتەرىنە ارنالعان «قازاقستان كىتاپحانالارىنىڭ قۇقىقتىق جانە كادرلىق تۇعىرناماسىن جاڭعىرتۋ» تاقىرىبىندا كىتاپ كورمەسى ۇيىمداستىرىلدى.
ميرا بايبەك, «ەگەمەن قازاقستان»