قىتايدىڭ مەملەكەتتىك رەزيدەنتسياسى «دياويۋيتايدا» قىتاي تىلىندەگى «نۇرسۇلتان نازارباەۆ جانە قازاقستاننىڭ قارىشتى قادامى» كىتابىنىڭ تۇساۋى كەسىلدى, دەپ حابارلايدى «قازاقپارات».
كىتاپتى قازاقستان رەسپۋبليكاسىنىڭ قحر-داعى ەلشىلىگىنىڭ قولداۋىمەن «سينسين» كورپوراتسياسىنىڭ قارجىلاي قولداۋىمەن «جەنمين» مەملەكەتتىك باسپاسى شىعاردى. كىتاپتى بەيجىڭ ۋنيۆەرسيتەتىنىڭ پروفەسسورى ە يۋنلۋننىڭ باسشىلىعىنداعى اۋدارماشىلار القاسى اۋداردى, رەداكتورى - قحر جازۋشىلار وداعىنىڭ مۇشەسى, قىتاي مەملەكەتتىك سىيلىعىنىڭ لاۋرەاتى, قحر جازۋشىلار وداعىنىڭ «قىتاي جازۋشىلارى» جۋرنالىنىڭ باس رەداكتورى اكبار ءماجيت.
تۇساۋكەسەرگە كىتاپ اۆتورى, بريتانيا پارلامەنتىنىڭ بۇرىنعى مۇشەسى دجوناتان ايتكەن, قر اۋىل شارۋاشىلىعى ءمينيسترى اسقار مىرزاحمەتوۆ, قازاقستاننىڭ قحر-داعى ەلشىسى شاحرات نۇرىشەۆ, قحر سىرتقى ىستەر ءمينيسترىنىڭ كومەكشىسى (ورىنباسارى) لي حۋەيلاي, جازۋشى اكبار ءماجيت, بەيجىڭدە اككرەديتاتسيادان وتكەن ازەربايجان, ارمەنيا, گرۋزيا, رەسەي, تاجىكستان تۇرىكمەنستان, وزبەكستان ديپلوماتيالىق وكىلدىكتەرىنىڭ باسشىلارى, ۋكراينا, مولدوۆا, ۇلىبريتانيا, ت.ب. ەلدەردىڭ ديپلوماتتارى, شىۇ باسشىلىعى, قىتايدىڭ عىلىمي جانە شىعارماشىلىق ينتەلليگەنتسياسى, قازاق دياسپوراسى, سونداي-اق باق وكىلدەرى قاتىستى.
شارادا ا. مىرزاحمەتوۆ جينالعاندارعا كىتاپتىڭ مازمۇنى جانە ەگەمەندى قازاقستاننىڭ قالىپتاسۋى مەن دامۋىنداعى نۇرسۇلتان نازارباەۆتىڭ ءرولى تۋرالى اڭگىمەلەپ بەردى. شارا قاتىسۋشىلارى قازاقستاننىڭ وركەندەۋى, قازاقستان مەن قىتاي اراسىنداعى ىنتىماقتاستىقتىڭ جاڭا دەڭگەيگە كوتەرىلگەنى جانە ونداعى نۇرسۇلتان نازارباەۆتىڭ ورنى جايلى وي ءبولىسىپ, قازاقستاننىڭ ء«بىر بەلدەۋ, ءبىر جول» جوباسىنىڭ اسا ماڭىزدى قاتىسۋشىسى ەكەنىن تىلگە تيەك ەتتى.