جىتىقارا قالاسىنداعى №2 ورتا مەكتەپ ءوزىنىڭ 90 جىلدىق مەرەيتويىن اتاپ ءوتتى. وعان مەكتەپ تۇلەكتەرى, ارداگەر ۇستازدار شاقىرىلدى.
ىرگەسى 1927 جىلى قالانعان مەكتەپتەن وسى ۋاقىتقا دەيىن 2 مىڭنان استام شاكىرت ءبىلىم العان. سولاردىڭ الپىستان استامى مەكتەپتى «التىن مەدالعا» بىتىرگەن. ولاردىڭ اراسىندا ەلىمىزگە بەلگىلى, حالقىمىزدىڭ مەرەيىن كوتەرىپ جۇرگەن تۇلعالار دا بار. ماسەلەن, قازاقستاننىڭ فرانتسياداعى ەلشىسىنىڭ كەڭەسشىسى بەرلين ەرىشەۆ, تەحنيكا عىلىمدارىنىڭ دوكتورى, پروفەسسور, ۇلتتىق ينجەنەريا اكادەمياسىنىڭ كوررەسپوندەنت-مۇشەسى, حالىقارالىق ينجەنەريا اكادەمياسىنىڭ اكادەميگى ابدراحمان بەگالينوۆ, اقىن اقىلبەك شاياحمەت, «قازاقستاننىڭ دەنساۋلىق ساقتاۋ ۇزدىگى» توسبەلگىسىنىڭ يەگەرى ماريا كەنەنباەۆا سەكىلدى ءتىزىمدى جالعاستىرا بەرۋگە بولادى.
اۋدان اكىمى اباي ىبىراەۆ جينالعانداردى مەكتەپتىڭ مەرەيتويىمەن قۇتتىقتادى. ء«بىر عاسىرعا جۋىق ۋاقىت ىشىندە ءبىلىم ۇياسى كەزدەسكەن قيىندىقتاردى جەڭىپ, تابىسىن ەسەلەپ, بۇگىنگى كۇنى ۋاقىت تالابىنا ساي ءبىلىم بەرەتىن مەكتەپ دارەجەسىنە جەتتى. بۇل مەكتەپ ۇجىمىنىڭ, ۇستازداردىڭ وراسان ەڭبەگىنىڭ ناتيجەسى» دەدى اباي سارسەنباي ۇلى.
مەكتەپتىڭ ماتەريالدىق بازاسى جىلدان جىلعا جاقسارىپ كەلەدى. مەرەيتوي الدىندا جىتىقارا اۋدانىنداعى «قوستاناي مينەرالدارى» اكتسيونەرلىك قوعامى 23,5 ميلليون تەڭگە قاراجات ءبولىپ, مەكتەپتىڭ بارلىق تەرەزەلەرىن پلاستيكاعا جاڭارتىپ بەردى, سپورت زالىن جوندەپ, جاراقتاندىردى, 5 ينتەراكتيۆتى تاقتا الىپ بەردى. مەرەيتويعا كەلگەن تۇلەكتەر, قوناقتار ءبىلىم ۇياسىنىڭ مۋزەيىن, سىنىپتارىن ارالاپ كوردى. تۇلەكتەر مۋزەيگە ەسكەرتكىشتەر تابىس ەتتى. مەرەكە مەكتەپ وقۋشىلارىنىڭ ءان-بيىمەن ورنەكتەلدى.
ءنازيرا جارىمبەت,
«ەگەمەن قازقستان»
قوستاناي وبلىسى,
جىتىقارا قالاسى