دۇنيەجۇزى جاستارى كۇنى قارساڭىندا ءال-فارابي اتىنداعى قازۇۋ مەن «نەۆادا-سەمەي» حالىقارالىق انتيادرولىق قوزعالىسىنىڭ بەلسەندىلەرى «سەمەي پوليگونىنداعى اقىرعى جارىلىس» تاقىرىبى اياسىندا G-Global ۇلگىسىندە دوڭگەلەك ۇستەل وتكىزدى.
پىكىرتالاس بارىسىندا سويلەۋشىلەر الدىمەن سەمەي يادرولىق سىناق پوليگونىنداعى جارىلىستاردىڭ توقتاعانىنا 25 جىل وتكەن مەرزىمدە قازاقستاندىق «نەۆادا-سەمەي» قوزعالىسىنىڭ قول جەتكىزگەن جەتىستىكتەرىنە كەڭىنەن توقتالدى. وسىدان ءبىر جىل بۇرىن ۋنيۆەرسيتەت رەكتورى عالىمقايىر مۇتانوۆ ءوز باستاماسىمەن وقۋ ورنىندا «جاستار – يادرولىق سىناقسىز الەم ءۇشىن» اتتى ستۋدەنتتەر فورۋمىنىڭ وتۋىنە مۇرىندىق بولعان ەدى.
فورۋمعا بەلگىلى اقىن, «نەۆادا-سەمەي» حالىقارالىق انتيادرولىق قوزعالىسىنىڭ جەتەكشىسى ولجاس سۇلەيمەنوۆ قاتىسقان. بۇگىن ۋنيۆەرسيتەت قابىرعاسىندا انتيادرولىق باستامانى تىكەلەي قولدايتىن ءارى حالىقارالىق ۇيىمنىڭ جەرگىلىكتى بەلسەندىلەرى رەتىندە تانىلعان 40 ستۋدەنت وقىپ جاتىر. دوڭگەلەك ۇستەل باسىندا ءسوز سويلەگەن سول ۇيىمنىڭ جەتەكشىسى, جاراتىلىستانۋ عىلىمىنىڭ ماگيسترى, تۇراقتى دامۋ جونىندەگى يۋنەسكو كافەدراسىنىڭ اسسيستەنتى گۇلجانات تانابەكوۆا «ىزگى نيەتپەن قۇرىلعان قوزعالىستىڭ قازاقستاننىڭ ەكولوگيالىق تازالىعى مەن يادرولىق قاۋىپسىزدىگى ءۇشىن جالعاسقان كۇرەسكە ارقاشان دا قولداۋ جاسايتىن بولامىز», دەدى. ۇيىم مۇشەلەرى, بولاشاق ەكولوگتار ءمادينا م ۇلىكوۆا مەن سالتانات جۇماباي بۇگىنگى ەڭ كوكەيكەستى ەكولوگيالىق ماسەلەلەرگە قاتىستى ءوز ويلارىن ورتاعا سالدى.
دوڭگەلەك ۇستەلگە «نەۆادا-سەمەي» حالىقارالىق انتيادرولىق قوزعالىسى توراعاسىنىڭ ورىنباسارى ەفيم زۋسلين مەن قوزعالىستىڭ جاۋاپتى حاتشىسى ءاليا بەكماعامبەتوۆا, انتيادرولىق قوزعالىستىڭ بىرقاتار ارداگەرلەرى شاقىرىلدى. قازاقستاننىڭ جازىلماس جان جاراسىنا اينالعان سەمەي يادرولىق سىناق الاڭى تۋرالى وتكەن جىلدار ىشىندە قانشاما كىتاپ جازىلدى, قانشاما دەرەكتى فيلمدەر ءتۇسىرىلدى. عالىمدار قۇپيانى اشىپ, جەتكىلىكتى تاريحي دەرەكتەر جاريالادى. ولار بۇگىنگى قوعامدىق ورتادا كورنەكى قۇرالعا اينالعان. سوندىقتان دا ءاربىر سويلەۋشىنىڭ دەرەگى ناقتى, ءسوزى ءوتىمدى شىعىپ جاتتى.
باسقوسۋدا عالامدىق ءمانى بار اۋقىمدى شارانى تاۋەلسىز ەلدىڭ جاستارى بۇدان بىلاي دا لايىقتى جالعاستىرادى دەگەن بايلام جاسالدى. بولاشاقتا يادرولىق قارۋدىڭ تاراتىلۋىنا, ادام ءومىرىن جالمايتىن يادرولىق سىناقتاردى بولدىرماۋ جولىندا كۇرەسە بىلەتىن سەرگەك جاستاردىڭ قاتارىنىڭ ءوسىپ كەلەتىنىنە ريزاشىلىق ايتىلدى.
تالعات ءسۇيىنباي, «ەگەمەن قازاقستان»
الماتى