نيۋ-يوركتەگى تەراكت: انىقتالعان جايتتار

وقيعا قالاي بولدى؟

وقيعا جەرگىلىكتى ۋاقىت بويىنشا تۇسكى ساعات 15:05-تە بولدى. پوليتسيانىڭ حابارلاۋىنشا, شاعىن جۇك كولىگى ۆەلوسيپەد جولىنا شىعىپ, ادامداردى قاعىپ وتكەن. مەكتەپ اۆتوبۋسىنا سوعىلعان سوڭ قولىندا ەكى قارۋى بار جۇرگىزۋشى كولىكتەن شىعىپ, وق جاۋدىرعان. پوليتسيا كۇدىكتىنى جاراقاتتاپ, قاماۋعا الدى.

رەسمي مالىمەت بويىنشا, 6 ادام وقيعا ورنىندا, 2 ادام اۋرۋحانادا قايتىس بولعان. 11 ادام اسا اۋىر حالدە اۋرۋحاناعا جەتكىزىلگەن. 

نيۋ-يورك مەرى بيلل دە بلازيو جۋرناليستەرگە بەرگەن سۇحباتىندا "بۇل, ءسوزسىز, قاراپايىم, ەش جازىعى جوق ادامدارعا قارسى تەررورلىق اكتى", دەدى.

ازىرگە ەشقانداي تەرروريستىك ۇيىم بولعان وقيعانى ءوز موينىنا المادى. الايدا, لاڭكەستەردىڭ قىزمەتىنە مونيتورينگ جاسايتىن SITE Intelligence Group كومپانياسى شابۋىلعا دەيىن قىلمىسكەر تەلەفونىنا سۋرەتكە تۇسكەنىن, وندا "يسلام مەملەكەتى" تۋىنىڭ سۋرەتى تۇرعانىن ايتتى. 

كۇدىكتى كىم؟

قاماۋعا الىنعان 29 جاستاعى سايفۋللو سايپوۆ وزبەكستاندا تۋىپ-وسكەن. اقش-قا 2010 جىلى كەلگەن. الدىمەن فلوريدا شتاتىندا تۇرعان, كەيىن نيۋ-دجەرسي شتاتىنىڭ پاتەرسون قالاسىنا كوشكەن. ايەلى, 3 بالاسى بار. 

جۋرناليستەر سايفۋللو سايپوۆتىڭ ەكى رەت جول ەرەجەسىن بۇزعانى ءۇشىن قاماۋعا الىنعانىن انىقتادى. 

دونالد ترامپ نە دەدى؟

اقش پرەزيدەنتى دونالد ترامپ قازا تاپقانداردىڭ وتباسىنا كوڭىل ايتىپ, ء"بىز تەرروريستىك ۇيىمداردىڭ ەلىمىزگە كىرۋىنە جول بەرمەۋىمىز كەرەك", دەپ جازدى. 

CNN اق ءۇيدىڭ باس اپپاراتى قىزمەتكەرلەرىنىڭ ءبىرى دونالد ترامپقا وقيعا تۋرالى ايتقانىن حابارلادى. ال اق ءۇيدىڭ ءباسپاسوز حاتشىسى سارا ساندەرس "پرەزيدەنت نيۋ-يوركتەگى وقيعا تۋرالى حاباردار. جاڭا اقپارات شىعا سالىسىمەن, وعان بايادالاتىن بولادى", دەدى. 

وسى مالىمدەمەدەن كەيىن ترامپ تۆيتتەرگە "نيۋ-يوركتە اسا قاۋىپتى ادام شابۋىل جاساپتى. قۇقىق قورعاۋ ورىندارى وقيعانى نازاردا ۇستايتىن بولادى", دەپ جازدى. 

رەسمي ۇيىمداردىڭ مالىمەتى

نيۋ-يورك پوليتسياسىنىڭ باسشىسى دجەيمس و'نيل ءباسپاسوز كونفەرەنتسياسىندا قىلمىسكەردىڭ "اللاحۋ اكبار" دەپ ايعايلاعانىن راستادى. "سايپوۆتىڭ ايتقانى مەن جالپى جاعدايعا قاراپ بۇل وقيعانىڭ تەرروريستىك ارەكەت ەكەنىنە كوز جەتكىزۋگە بولادى", دەدى ول. ال شتات گۋبەرناتورى ەندريۋ كۋومو كۇدىكتىنىڭ جالعىز ارەكەت ەتكەنىن ايتتى. "بۇل ۇيىمداسقان قاستاندىق نەمەسە جوسپار دەۋگە كەلمەيدى. بۇل ءبىر ادامنىڭ ارەكەتى", دەدى ول ءباسپاسوز كونفەرەنتسياسىندا. 

نيۋ-يوركتىڭ پوليتسيا دەپارتامەنتى باسقا كۇدىكتىلەر ىزدەستىرىلمەيتىنىن ايتتى. دەگەنمەن, بيلىك وقيعانىڭ ءمان-جايىن انىقتاۋ ءۇشىن سايپوۆتىڭ تەك اقش-تاعى ەمەس, وزبەكستانداعى تانىستارىن دا انىقتايتىن بولادى. 

سونداي-اق قالا بيلىگى وقيعاعا قاراماستان نيۋ-يوركتەگى حەللوۋيندى تويلاۋعا ارنالعان ءداستۇرلى شەرۋ بەلگىلەنگەن ۋاقىتتا وتەتىنىن مالىمدەدى. 

دايىنداعان گۇلنۇر قۋانىشبەكقىزى,

"ەگەمەن قازاقستان"