بىلتىر باعى جانىپ, «قازاقستان ارۋى» اتانعان قىزىلوردالىق گۇلبانۋ ءازىمحانوۆا داڭقى جەر جارعان «الەم ارۋى-2017» بايقاۋىنا قاتىسۋ ماقساتىمەن قىتايدا ءجۇر. ون توعىز جاستاعى وتانداسىمىز تىركەۋدەن ءوتىپ, سۇلۋلىققا تالاسقان بويجەتكەندەرمەن بىرگە سانيا قالاسىندا وتەتىن حالىقارالىق اقتىق جارىسقا بارىن سالىپ دايىندالۋدا.
اسپاناستى ەلىندەگى وتكەن ون شاقتى كۇندە گۇلبانۋ بايقاۋعا قاتىسۋشىلارىمەن باۋىر باسىپ, ءوز ەلى قازاقستاندى تانىستىرىپ ءجۇر دەسە دە بولادى. شەشۋشى ساتتەرگە جەتكەنشە دۇنيەنىڭ ءتورت تۇكپىرىنەن جينالعان سۇلۋلار ءتۇرلى شارالار اياسىندا پۋەرتو-ريكودا «الەم ارۋى-2016» ءتاجىن كيگەن ستەفاني دەل ۆاللەمەن دە كەزدەسىپ ۇلگەرگەن.
«بايقاۋعا كەلگەنىمە كوپ بولماسا دا, مۇنداعى جاعدايعا قايران قالىپ تۇرمىن. ءار قاتىسۋشى وزىنشە سۇلۋ. ءبىز دوستاسىپ تا ۇلگەردىك, ءبىر-بىرىمىزگە قولداۋ كورسەتۋگە تىرىسىپ باعۋدامىز. العاشقى كۇنى-اق ارقايسىمىز ءوز ەلىمىزدەن اكەلگەن سىيلىقتارىمىزدى ءبىر-بىرىمىزگە تارتۋ ەتتىك. قازىر سويلەسىپ, ءوز سالت-داستۇرىمىزبەن, ۇلتتىق تاعام مازىرلەرىمەن, مادەنيەتىمىزبەن ءبولىسۋ ۇستىندەمىز. ماعان بارىنشا قولداۋ كورسەتىپ جۇرگەن وتانداستارىما العىس ايتقىم كەلەدى. بۇل ماعان كۇش-قۋات جانە وزىمە دەگەن سەنىمدىلىك بەرەدى», دەپ سالەمدەمە جولدايدى سۇلۋىمىز.
بۇل كۇندەرى بايقاۋعا قاتىسۋشىلار قىزۋ دايىندىققا كىرىسكەن. ەندى جاقىن كۇندەرى بايقاۋدىڭ باستاپقى سىناقتارى دا باستالادى. ونىڭ ىشىندە سپورتتىق, الەۋمەتتىك جانە مادەني ءىس-شارالار دا بار. بايقاۋ بارىسىندا «قازاقستان ارۋى» ارال تەڭىزىنىڭ ماسەلەلەرى مەن ونى شەشۋ جولدارى تۋرالى ەكولوگيالىق جوباسىن ۇسىنادى.
ايتقانداي, بيىل «الەم ارۋىن» ۇيىمداستىرۋشىلار ونىڭ فورماتىن ازداپ وزگەرتۋدى ۇيعارعان. بۇل بايقاۋ Head-to-Head Challenge فورماتىندا وتكىزىلەدى. ۇيىمداستىرۋشىلاردىڭ پىكىرىنشە, الەۋمەتتىك جەلىلەر مەن ينتەربەلسەندىلىككە باسا نازار اۋدارىلادى. فينالعا تەك 40 قاتىسۋشى عانا وتەدى. ولار ءتۇرلى سىناقتار مەن داۋىس بەرۋ ناتيجەلەرى بويىنشا انىقتالادى.
«الەم ارۋى» بايقاۋىنىڭ ەڭ باستى ميسسياسى «ماقساتقا باستاعان سۇلۋلىق» (Beauty with a Purpose) بولسا, وسىناۋ قايىرىمدىلىق جوباسى عانا وزگەرىسسىز قالادى. ءاربىر جەڭىمپاز ءبىر جىل بويى ەرىكتى ەلشى بولىپ, ءارتۇرلى ەلدەرگە بارادى. حالىقارالىق «Variety International» قايىرىمدىلىق قورىنا ارناپ قاراجات جيناۋ ماقساتىندا دۇنيەجۇزىلىك قايىرىمدىلىق ءىس-شارالارىنا قاتىسادى. ءوز كەزەگىندە «Variety International» 1928 جىلدان باستاپ مۇگەدەكتەر مەن باقىتسىز ادامدارعا كومەك كورسەتەدى.
ايناش ەسالي, «ەگەمەن قازاقستان»