استانادا لاتىن ءالىپبيى زالى اشىلدى

اتالمىش زالدا لاتىن الىپبيىندەگى ۇلتتىق الفاۆيت, سەمينار-ترەنينگتەر, وقۋ كۋرستارى, لينگۆيست عالىمداردىڭ ونلاين كەڭەستەرى وقىتىلاتىن بولادى. ۇلتتىق اكادەميالىق كىتاپحانانىڭ ديرەكتورى ءۇمىتحان مۇڭالباەۆانىڭ سوزىنە قاراعاندا لاتىن گرافيكاسىن وقىتۋعا ارنالعان مۇنداي ورتالىقتار ەلىمىزدىڭ بارلىق كىتاپحانالارىندا اشىلماق. ال, ەلوردا كىتاپحاناسىندا مۇنداي زالدىڭ اشىلۋى – تاريحي ءمانى بار وقيعا.

«لاتىن ءالىپبيى زالىنىڭ»  عاريفوللا ەسىم, ابدىجالەل باكىر, قارجاۋباي سارتقوجا ۇلى, بولات قورعانبەك, شەرۋباي قۇرمانباي ۇلى سىندى ەلگە بەلگىلى عالىمدار, قوعام قايراتكەرلەرى, سونداي-اق, كىتاپحانا قىزمەتكەرلەرى مەن ەلورداداعى №40 مەكتەپتىڭ وقۋشىلارى قاتىستى. وقۋشىلار «لاتىن ءالىپبيى زالىنا» قويىلعان 1929-1940 جىلدار ارالىعىندا جارىق كورگەن لاتىن گرافيكاسى نەگىزىندەگى قازاقستاندىق كىتاپتار مەن مەرزىمدى باسىلىمداردىڭ كورمەسىنە كۋا بوپ, لاتىن گرافيكاسىنىڭ جاڭا نۇسقاسى بويىنشا ءوز اتى-جوندەرىن جازىستى.

زالدىڭ اشىلۋىنا جيىلعان عالىمدار بۇل ورايدا  ايتۋلى شاراعا قاتىسۋشىلارعا قاراتا ءوز وي-پىكىرلەرىن ايتتى. مىسالى, فيلوسوفيا عىلىمدارىنىڭ دوكتورى, اكادەميك عاريفوللا ەسىم لاتىن گرافيكاسىنا قاتىستى ەلباسىنىڭ شىعارعان جارلىعىن ويلاۋ جۇيەمىزدى وزگەرتەتىن ۇلكەن وقيعا رەتىندە باعالادى. ء«بىز تاۋەلسىزدىك العانمەن, جازۋدا تاۋەلسىزدىككە قولىمىز جەتپەي جۇرگەن ەدى. بيىلعى 26-قازاندا ەلباسى ولقىلىقتىڭ ورنىن تولتىردى. ەندى جاڭا ءالىپبي ۇلگىسى قابىلداندى. ەندى وسىمەن جۇرەمىز. قوسارلانعان دەگەن ۇعىم مۇلدە بولمايدى. ءبىر ءسوزدى قازاقشا كيريلليتسامەن جازىپ, استىنا ورىسشا كيريلليتسانى تاعى قوساقتاۋ ەندىگى جەردە بولمايدى. جازۋدا ءبىر عانا لاتىن گرافيكاسىن پايدالانامىز», دەدى ع.ەسىم.

ال, ابدىجالەل باكىر ءوزىنىڭ وسى گرافيكاعا اۋىسۋدى 1997 جىلدان بەرى كۇتىپ كەلگەنىن ايتىپ, لاتىن جازۋىنىڭ قازاقتى توپتاستىرۋى كەرەكتىگىن العا تارتتى. ء«بىزدىڭ بىرلىگىمىز, تىرلىگىمىز مىقتى بولۋى كەرەك. وسى جەردە جاستارعا ايتارىم, لاتىن جازۋى – ءبىزدىڭ بولاشاعىمىز. سوندىقتان وسى جازۋدى قازىردەن باستاپ ۇيرەنۋگە, جازۋعا شاقىرامىن», دەدى قوعام قايراتكەرى.

ايگۇل سەيىل,

«ەگەمەن قازاقستان»