27 قازان كۇنى قازاق مەملەكەتتىك قىزدار پەداگوگيكالىق ۋنيۆەرسيتەتىندە ء«بىلىم مەن عىلىم دامۋىنىڭ حيميا, بيولوگيا, ەكولوگيا جانە گەوگرافيا بويىنشا زاماناۋي باعىتتارى» اتتى حالىقارالىق عىلىمي-پراكتيكالىق كونفەرەنتسيا وتەدى. بۇل تۋرالى وقۋ ورنىنىڭ مەديا ورتالىعى حابارلادى.
شارانىڭ ماقساتى – مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى باستامالاردى ىسكە اسىرۋ اياسىندا جاستارعا رۋحاني تاربيە بەرەتىن يگىلىكتى شارالاردى ۇيىمداستىرا وتىرىپ, وتاندىق عالىمداردىڭ ۇلاعاتتى ىستەرىن وسكەلەڭ ۇرپاققا ناسيحاتتاۋ.
القالى جيىنعا وتاندىق جانە شەتەلدىك عالىمدار مەن جوعارى وقۋ ورىندارىنىڭ قىزمەتكەرلەرى قاتىسادى.
كونفەرەنتسيا جاراتىلىستانۋ عىلىمدارىنىڭ بىرنەشە سەكتسيالارى بويىنشا ۇيىمداستىرىلادى. جيىن بارىسىندا قازاقستاندىق ىزدەنۋشىلەردىڭ عىلىمي ەڭبەكتەرىنىڭ كورمەسىن وتكىزۋ, بەدەلدى عالىمداردىڭ ستۋدەنتتەرگە ارنالعان شەبەرلىك سىنىپتارىن جۇرگىزۋ جوسپارلانعان.
– رۋحاني جاڭعىرۋ – بۇل ادام سانا-سەزىمىنىڭ, سەنىمى مەن ساپاسىنىڭ, ءبىلىمى مەن ءومىر ءسۇرۋ ءتاسىلىنىڭ كورسەتكىشى. قوعامدىق سانانى جاڭعىرتۋدىڭ باستى فاكتورى – ساپالى ءبىلىم, باسەكەگە قابىلەتتىلىك. وسى ورايدا قازاقستاندىق عالىمداردىڭ شىعارماشىلىق, عىلىمي-زەرتتەۋ جۇمىستارىن ناسيحاتتاۋ مەن ونى كەڭ كولەمدە جاريالاۋدا, جاستاردى جوبالىق زەرتتەۋ ءىس-ارەكەتتەرىنە تارتۋدا جانە ءبىلىم بەرۋ ءۇردىسىنىڭ تيىمدىلىگىن كوتەرۋ مەن قولدانبالى عىلىمعا دەگەن قىزىعۋشىلىقتارىن دامىتۋدا وسى تاقىلەتتەس جيىنداردىڭ ماڭىزى زور, – دەپ اتاپ ءوتتى شارا ۇيىمداستىرۋشىلارى.
كونفەرەنتسياعا كەلىپ تۇسكەن ماتەريالدار نەگىزىندە ارنايى جيناق شىعارۋ كوزدەلىپ وتىر. بۇل ءوز كەزەگىندە ەلىمىزدەگى ىزدەنۋشى جاستارعا, عىلىمي جۇمىستارمەن اينالىساتىن عالىمدار ءۇشىن ماڭىزدى تەوريالىق جانە ادىستەمەلىك كومەكشى قۇرالى بولماق.