وڭتۇستىك قازاقستان وبلىسىندا 2018 جىلى جاڭا سيپاتتاعى اتاۋلى الەۋمەتتىك كومەك 300 مىڭعا جۋىق ادامدى قامتيدى دەپ جوسپارلانىپ وتىر. كەلەر جىلى جۇمسالاتىن قارجى كولەمى ءۇش ەسەگە ءوسىپ, 18 ملرد تەڭگەنى قۇراماق.
وڭىردە الەۋمەتتىك كومەكتىڭ جاڭا سيپاتىنا كوشۋ ءۇشىن ءتيىستى شارالار قىزۋ جۇزەگە اسىرىلۋدا. جوبانى جەرگىلىكتى حالىققا تۇسىندىرۋدە اقپاراتتىق-ناسيحات جۇمىستارى جۇرگىزىلىپ, وعان ارنايى 36 ءموبيلدى توپ قۇرىلدى. بۇگىنگە دەيىن 700-دەن استام ەلدى مەكەندە تۇرعىلىقتى حالىقپەن كەزدەسۋلەر ۇيىمداستىرىلدى.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىندا كۇن سايىن ماماندارعا وسىناۋ تىڭ جۇيەنى ءتۇسىندىرۋ ماقساتىندا وقۋ سەمينارلار وتۋدە. بۇدان بولەك, جۇمىسپەن قامتۋ ورتالىقتارى مەن الەۋمەتتىك باعدارلامالار بولىمدەرى ماماندارىنا, اۋدان جانە اۋىلدىق وكرۋگ اكىمدەرىنە ءار توقسان سايىن وقۋ سەمينارلارى ۇيىمداستىرىلۋدا. وسىعان دەيىن وڭىردەگى 9 اۋداننىڭ ماماندارى وسىناۋ شارالارعا قاتىسىپ بىلىكتىلىگىن ارتتىرعان. بۇل جولى سايرام, سارىعاش اۋداندارىنا كەلگەن 60 شاقتى مامان جاڭاشا اتاۋلى كومەك كورسەتۋ جۇيەسىمەن ءجىتى تانىستى. قويىلعان سۇراقتارعا جاۋاپ بەرىپ, بىلگەن-تۇيگەندەرىن پىسىقتادى. كەزدەسۋ كەزىندە 2018 جىلدىڭ 1 قاڭتارىنان ىسكە اساتىن جاڭا فورماتتاعى اتاۋلى الەۋمەتتىك كومەك كورسەتۋ ءتارتىبىنىڭ وزگەرۋى ءتۇسىندىرىلدى.
ايتا كەتەيىك, «ورلەۋ» جوباسى اياسىندا بۇگىنگە دەيىن جالپى سوماسى 6 ملرد-تان استام تەڭگە بولاتىن شارتتى اقشالاي كومەكتى 20 مىڭنان استام وڭتۇستىكقازاقستاندىق الدى. وسى جوباعا قاتىسۋشىلاردىڭ 94%-ى جۇمىسپەن قامتۋدىڭ بەلسەندى شارالارىمەن قامتىلىپ, 85%-ى تۇراقتى جۇمىسپەن قامتىلدى. اعىمداعى جىلدىڭ 9 ايىندا «ورلەۋ» جوباسىنا قاتىسۋشىلاردىڭ قاتارىندا 906 ادام ءوز ءىسىن اشىپ, جەكە كاسىپكەر رەتىندە سالىق ورگاندارىنا تىركەلدى. وبلىستا «ورلەۋ» پيلوتتىق جوباسىن ىسكە اسىرۋ ناتيجەسىندە, شارتتى اقشالاي كومەك الۋشىلاردىڭ تابىسى 4,2 ەسەگە ارتىپ, ورتا ەسەپپەن ايىنا 1 ادامعا 23 مىڭ تەڭگەگە جەتىپ وتىر.