بۇگىن «ەگەمەن قازاقستان» رگ» اق باسقارما توراعاسى دارحان قىدىرالى جاپونيانىڭ ەڭ ءىرى گازەتتەرىنىڭ ءبىرى اساحي شيمبۋننىڭ توكيوداعى باس عيماراتىندا بولىپ, باسىلىم قىزمەتىمەن تانىستى جانە ەكىجاقتى ارىپتەستىك ورناتۋ مۇمكىندىكتەرىن ۇيىم باسشىلىعىمەن تالقىلادى.
تاراپتار الەمدىك باسپاسوزدەگى سوڭعى ترەندتەر تۋرالى ءسوز قوزعاپ, تسيفرلىق جۋرناليستيكانىڭ بولاشاعى تۋرالى وي ءبولىستى. سونداي-اق اساحي شيمبۋن گازەتىنىڭ حالىقارالىق جاڭالىقتار ءبولىمى رەداكتورىنىڭ ورىنباسارى جۋن نوجيما مىرزا زاماناۋي تەحنيكامەن جابدىقتالعان گازەت باسپاسىنداعى ماقالالاردىڭ قاعاز بەتىنە باسىلىپ, وڭدەلىپ, وقىرمانعا جول تارتۋ پروتسەسىمەن ەگجەي - تەگجەيلى تانىستىردى.
كەزدەسۋ سوڭىندا تاراپتار ەكى گازەت اراسىنداعى بايلانىستى كەلەشەكتە ناقتى كەلىسىم مەن جوبالار ارقىلى بەكىتۋ تۋرالى ۋاعدالاستى.
ايتا كەتۋ كەرەك, اساحي شيمبۋن جاپونياداعى عانا ەمەس, الەمدەگى ەڭ ءىرى گازەتتەردىڭ ءبىرى. باسىلىم 6,2 ملن تيراجبەن كۇنىنە ەكى رەت شىعادى. گازەتتىڭ الەم بويىنشا 320 ءوفيسى مەن 39 بيۋروسىندا 4500 استام قىزمەتكەر جۇمىس ىستەيدى.