ءارىسى مەن بەرىسىن ايتپاعاندا, لاتىن الىپبيىنە كوشۋ ءىسىنىڭ ستراتەگيالىق تا ماڭىزى بار. ونى قازىرگى زامانعى تەحنولوگيالىق ورتامەن بايلانىستىرا قاراستىرۋعا بولادى.
كوممۋنيكاتسيانىڭ العا قاراي ادىمداپ ەمەس, قارىشتاپ دامىپ بارا جاتقانى, XXI عاسىرداعى عىلىم مەن ءبىلىم بەرۋ ءۇردىسىنىڭ مۇلدەم جاڭا ارناعا بەت بۇرعانى ءبىزدى دە ءدۇر سىلكىندىرمەي قويمايدى. بۇگىندە الەمدەگى ەڭ تاڭداۋلى عىلىمي جانە ادەبي تۋىندىلار وسى ارىپتەرمەن جازىلادى. سوندىقتان ءبىز لاتىن ارپىنە كوشۋ ارقىلى جاھاندىق وركەنيەت كوشىنە ءبىر تابان جاقىنداي تۇسەمىز.
ال عالىمدارىمىز وسى قارىپتى قولدانۋ ارقىلى الەمدەگى ەڭ دامىعان ەلدەردەگى ارىپتەستەرىمەن تەرەزەلەرىن تەڭەستىرە الادى. سونداي-اق لاتىن گرافيكاسىن قولدانۋ – اقپارات الماسۋدىڭ كەڭ شالقار ايدىنى. شىعارماشىلىقپەن اينالىسۋدىڭ تاپتىرماس تۇتقاسى. قازىرگى كەزدە الەم ەلدەرىنىڭ 70 پايىزعا جۋىعى وسى ءالىپبيدى قولدانادى. ەكىنشى ءبىر تۇرعىدان قاراستىرعاندا, لاتىنشاعا كوشۋ – تۇركى حالىقتارىنا ورتاق جازۋ مانەرىن قالىپتاستىرۋعا سەپتىگىن تيگىزەدى. سونىمەن بىرگە شەتەلدەگى قانداس باۋىرلارىمىزدىڭ شىعارمالارىمەن ەمىن-ەركىن تانىسۋىمىزعا دا مۇمكىندىك بەرەدى.
بۇگىنگى تاڭدا جاڭا گرافيكاداعى بىرىڭعاي ستاندارت نۇسقانى قابىلداۋ قارساڭىندا تۇرمىز. بۇل ءوز كەزەگىندە ادىستەمەلىك جۇمىستاردى ودان ءارى تۇرلەندىرە ءتۇسۋدى قاجەت ەتەدى. سونداي-اق جاڭا ءالىپبيدى ۇيرەتەتىن ساپالى ماماندار قاتارىن كوبەيتۋ كەرەكتىگىن كورسەتەدى. اسىرەسە, بۇل ىستە مەكتەپتەرگە ارنالىپ جازىلاتىن ءارى قۇراستىرىلاتىن وقۋلىقتارعا اسا ساق, جاۋاپكەرشىلىك سەزىممەن قاراي بىلەيىك دەگىم كەلەدى. مىنە, وسى ماقساتقا قول جەتكىزۋ ءۇشىن ەلىمىزدەگى لينگۆينست-ماماندار مەن وقىتۋشى-پروفەسسورلاردىڭ قايرات قىلار كەزى ەسىكتى قاعىپ تۇرعان سەكىلدى. ويتكەنى بۇل وتە ماڭىزدى ءىس. وعان ۇلەس قوسۋ ءبارىمىزدىڭ ورتاق پارىزىمىز دەپ سانايمىن.
نۇرگۇل ابىشەۆا, «ورلەۋ» بىلىكتىلىكتى ارتتىرۋ ۇلتتىق ورتالىعى اقتوبە وبلىستىق فيليالىنىڭ ديرەكتورى, فيلولوگيا عىلىمدارىنىڭ كانديداتى
اقتوبە