بۇگىن ەلباسى نۇرسۇلتان نازارباەۆ ەنەرگەتيكا ءمينيسترى قانات بوزىمباەۆتى قابىلداپ قازاق قوعامىن الاڭداتىپ وتىرعان جانار-جاعارماي ماسەلەسىن تالقىلادى.
كەزدەسۋدە پرەزيدەنت ەنەرگەتيكا مينيسترلىگىنىڭ جۇمىسىنا كوڭىلى تولمايتىندىعىن, ناقتىراق ايتقاندا, مينيسترلىك جانار-جاعارمايمەن قامتاماسىز ەتۋ بويىنشا ءتيىستى شەشىمدەردى ۋاقتىلى قابىلداماعانىن ايتتى.
– ەنەرگەتيكا مينيسترلىگى ەلىمىزدىڭ وتىن-ەنەرگەتيكا ماسەلەلەرىنە, سونىڭ ىشىندە ىشكى نارىقتى جانار-جاعارمايمەن قامتاماسىز ەتۋگە جاۋاپتى. ەلىمىزدە ونىڭ تاپشىلىعىنا بايلانىستى ورىن العان احۋال ۇكىمەت پەن ەنەرگەتيكا مينيسترلىگى تاراپىنان نەمقۇرايلىلىق پەن جاۋاپسىزدىققا جول بەرىلگەنىن كورسەتىپ وتىر. ءسىز بيىلعى مامىر ايىندا مۇناي وڭدەۋ زاۋىتتارىنا جوندەۋ جۇمىستارىن جۇرگىزۋ كەستەسىن بەكىتتىڭىز. كۇزدە ءۇش زاۋىتتىڭ ەكەۋى جوندەۋ ءۇشىن توقتاتىلاتىنىن ءبىلدىڭىز. مۇنداي جاعداي جىل سايىن قايتالانىپ كەلەدى. سونى بىلە تۇرا, الدىن-الا دايىندالىپ, حالىقتى قامتاماسىز ەتۋ ءۇشىن قاجەتتى كولەمدە جانار-جاعارماي جەتكىزۋگە ءتيىس ەدىڭىز. ولاي بولمادى, – دەدى مەملەكەت باسشىسى.
سونىمەن قاتار, ن.نازارباەۆ مينيسترلىكتىڭ جانار-جاعارماي نارىعىنداعى جاعدايدى رەتتەۋگە ارنالعان شارالارىنىڭ تيىمدىلىگى تومەن بولعانىن اتاپ ءوتتى.
– ءسىز ۇسىنعان جاقسى باستامالار از ەمەس. ولار مەنىڭ تاراپىمنان دا, ۇكىمەت تاراپىنان دا قولداۋ تاۋىپ كەلەدى. جانارماي تاپشىلىعىن بولدىرماۋ ءۇشىن باعانى مەملەكەتتىك رەتتەۋدەن باس تارتۋ ۇسىنىلدى. الايدا, نارىقتا تاعى دا جانار-جاعارماي جەتىسپەۋشىلىگى ورىن الدى. وسىعان بايلانىستى, ۇكىمەتتىڭ ۇسىنىسى بويىنشا سىزگە سوگىس جاريالادىم. بۇل – قىزمەتتەن بوساتىلعانمەن بىردەي, – دەدى ەلباسى.
ءوز كەزەگىندە, قانات بوزىمباەۆ مەملەكەت باسشىسىنا پاۆلودار جانە اتىراۋ مۇناي وڭدەۋ زاۋىتتارىن جاڭعىرتۋ جۇمىستارىنىڭ بارىسى تۋرالى مالىمدەدى.
– ەكى مۇناي وڭدەۋ زاۋىتىن جەتىلدىرىپ, جاڭعىرتۋ بيىل اياقتالادى. قاراشا ايىندا پاۆلودارداعى زاۋىتتى ىسكە قوسۋ جوسپارلانىپ وتىر. اتىراۋداعى مۇناي وڭدەۋ زاۋىتىنداعى جۇمىستاردى وسى جىلدىڭ 16 جەلتوقسانىنا دەيىن اياقتاۋ كوزدەلگەن. مۇندا مۇناي ونىمدەرىنىڭ كولەمىن ارتتىرۋعا جانە ولاردىڭ ساپاسىن جاقسارتۋعا مۇمكىندىك بەرەتىن كاتاليتيكالىق كرەكينگ قۇرىلعىسى ءبىرىنشى رەت پايدالانىلاتىن بولادى, – دەدى مينيستر.
ق.بوزىمباەۆ مەملەكەت باسشىسىنا شىمكەنتتەگى مۇناي وڭدەۋ زاۋىتىندا دا جوعارى وكتاندى بەنزين شىعارۋعا ارنالعان كاتاليتيكالىق كرەكينگ قۇرىلعىسىن سالۋ جوسپارلانىپ وتىرعانى تۋرالى مالىمدەدى.
ەنەرگەتيكا ءمينيسترى كەلەسى جىلى قازاقستان نارىعى جوعارى ساپالى جانارمايمەن, سونىڭ ىشىندە اۆياتسيالىق جانارمايمەن قامتاماسىز ەتىلەتىنىن ايتتى.
سوڭىندا قازاقستان پرەزيدەنتى نارىقتى جانار-جاعارمايمەن قامتاماسىز ەتۋ ءۇشىن جاۋاپكەرشىلىك جۇكتەلەتىنىن تاعى دا ەسكەرتىپ, جانارماي تاپشىلىعىن بولدىرماۋ ءۇشىن بارلىق قاجەتتى شارالار قابىلداۋدى تاپسىردى.
ەسكە سالا كەتەيىك, وتكەن اپتادا پرەمەر-مينيستر ساعىنتاەۆ ۇكىمەتتىڭ كەڭەيتىلگەن جينالىسىندا ەلدەگى جانار-جاعارماي تاپشىلىعىنا قاتىستى مينيستر بوزىمباەۆتىڭ بايانداماسىن تىڭداپ, اتالعان ماسەلەگە قاتىستى سۇراقتار قويدى. ءمينيستردىڭ جاۋاپتارى ۇكىمەت باسشىسىنىڭ كوڭىلىنەن شىقپاسا كەرەك, پرەمەر-مينيستر ءوز قۇزىرەتى شەگىندە, ەنەرگەتيكا ۆيتسە-ءمينيسترى اسەت ماعاۋوۆتى جۇمىستان بوساتىپ, مينيستر بوزىمباەۆقا سوگىس جاريالاۋ تۋرالى ەلباسىعا ۇسىنىس ەنگىزدى. پرەزيدەنت ەلىمىزدىڭ باس ءمينيسترىن قولداپ قانات بوزىمباەۆقا سوگىس جاريالانعان بولاتىن.