ەلباسىمىز لاتىن الىپبيىنە كوشۋدى ۇسىنعانىمەن, بۇل ىستە اسىقپاي, بايىپپەن وزگە ەلدەردىڭ تاجىريبەسىن زەرتتەي وتىرىپ ارەكەت ەتۋدى تاپسىرعان بولاتىن. ءبىز وسى باعىتتا ويداعىداي قادام جاساۋدامىز.
ا.بايتۇرسىنوۆ اتىنداعى ءتىل ءبىلىمى ينستيتۋتىنىڭ ماماندارى سوڭعى ون بەس جىل بويى تياناقتى زەرتتەۋ جۇرگىزىپ, ءوز نۇسقالارىن ۇسىنۋدا. بۇل باعىتتا ءتىل ماماندارىنىڭ ايتاتىن كوپتەگەن پىكىرلەرى بار دەپ ويلايمىن. ەڭ ماڭىزدىسى قازاق ءتىلىنىڭ ىشىندەگى قازاققا عانا ءتان بىرقاتار دىبىستار بار. وعان بايلانىستى ەل ىشىندەگى پىكىر دە ءار الۋان. وسى ىسپەن تىكەلەي اينالىسىپ جۇرگەن ماماندارىمىز ءوز جوبالارىن تاعى دا پىسىقتاپ, تولىقتىرىپ, سوڭعى نۇسقاسىن ۇسىنۋى ءتيىس.
قالاي دەسەك تە, ءوز زامانىندا ايتىلعانىمەن احمەت بايتۇرسىنوۆتىڭ الىپبيگە قاتىستى مىناداي قاناتتى ءسوزى ءالى دە ءوز ماڭىزىن جويعان جوق. ول ۇلتتىق ءالىپبيدىڭ ەرەكشە ءتورت ولشەمىن تىزگەن. ونىڭ ءبىرىنشىسى جەڭىل ءارى تىلگە ورامدى بولۋى كەرەك دەسە, ەكىنشى ولشەمى دەپ تاڭبانىڭ ازدىعى مەن جازۋعا يكەمدىلىگىن اتاپ وتكەن. سول سياقتى جازۋ پروتسەسىندە ىقشامدىلىعى مەن ىڭعايلىلىعى ءۇشىنشى ولشەم رەتىندە كورسەتىلسە, تورتىنشىسىندە ۇيرەنۋگە وڭاي بولۋى ءتيىس دەپ تۇيىندەگەن. ءوز باسىم وسى ولشەمگە ساي ءالىپبي نۇسقاسىن تاڭدايتىندىعىمىزعا سەنەمىن.
مۇرات باقتيار ۇلى, سەنات دەپۋتاتى