جان جادىراتار جاڭالىق

ەلىمىزدە مەملەكەتتىك ءتىلدى لاتىن ارپىنە كوشىرۋ اڭگىمەسى ايتىلعانىنا از بولعان جوق. وسى ۋاقىتتىڭ ىشىندە ماسەلەنى تالقىلاپ-تارازىلاۋعا بۇكىل ەل اتسالىسىپ, ءۇن قوستى. بارلىعىنىڭ پىكىرى «لاتىن ارپىنە كوشۋ – ۋاقىتتىڭ ءوزى تۋىنداتقان قاجەتتىلىك, زامان تالابى» دەگەن ءبىر ارناعا توعىسىپ جاتتى. بۇل دۇرىس پىكىر, سەبەبى لاتىن ءالىپبيى الەمدە كەڭ قولدانىلادى. تەحنولوگيانىڭ جوعارى دامىپ, اقپاراتتىق تاسقىن لەگىندە ءومىر ءسۇرىپ جاتقان كەزەڭدە زامان لەبىنەن كەش قالماي, كەرىسىنشە الدىن الا قام جاساپ, وزا شاۋىپ الدىن وراعان ءجون. لاتىن الىپبيىنە كوشۋ – ءبىزدىڭ جانە ۇرپاقتارىمىزدىڭ اقپاراتتىق قولجەتىمدىلىگىن ارتتىرىپ, ىزدەنىس-تانىم كوكجيەگىن كەڭەيتە تۇسەدى. ويتكەنى لاتىن ءالىپبيى XIV عاسىردان بەرى قولدانىستاعى, تىلدىك جانە رۋحاني قورى مول, بۇگىندە اقپاراتتىق كەڭىستىككە قانات جايعان. وعان كوشۋ ءبىزدىڭ ەلىمىزگە مول اقپاراتتىق كەڭىستىكتە ەركىن قانات قاعۋعا, زامانعا ساي لايىقتى رۋحاني قارۋلانۋعا مۇمكىندىك بەرەدى.

كەشە عانا ەلباسىنىڭ مەملەكەتتىك ءتىلدى لاتىن الىپبيىنە كوشىرۋ جونىندەگى جوبانى ىسكە اسىرۋ ءۇشىن قۇرىلعان جۇمىس توبىنىڭ مۇشەلەرىمەن كەزدەسۋى بۇل باعىتتا جاسالىپ جاتقان جۇمىستاردىڭ كوڭىل تولتىرارلىق دارەجەدە ەكەنىن تاعى ءبىر دالەلدەپ بەردى. تاقىرىپقا وراي ەل اراسىنان 300-دەن استام وتىنىشتەردىڭ ءتۇسۋى بۇل ماسەلەگە حالقىمىزدىڭ بەيجاي قاراماي, بەلسەندى اتسالىسقاندىعىن اڭعارتادى.

ناتيجەسىندە بارلىق باعىتتاردى ەكشەي, الەمدىك تاجىريبەنى ەسكەرە كەلە جاسالعان بىرىڭعاي ستاندارت ەلباسى نازارىنا ۇسىنىلدى. اتسالىسقان بىرلەستىكتەرگە, جاستارعا ءۇن قوسىپ, قولداۋ بىلدىرگەندەرگە, سونداي-اق كوميسسيا مۇشەلەرىنە العىس ايتقان مەملەكەت باسشىسى ەل اراسىندا ءتۇسىندىرۋ-ناسيحاتتاۋ جۇمىستارىن جۇرگىزۋگە, ءبىلىم بەرۋ جۇيەسىنە كەزەڭ-كەزەڭىمەن ەنگىزۋگە تاپسىرما بەردى. بۇل ءبىزدىڭ الدىمىزدا زور, ءارى ماڭىزدى, جاۋاپتى جۇمىستاردىڭ تۇرعاندىعىن بىلدىرەدى. ەلىمىزدىڭ بولاشاعىنا قىزمەت ەتەتىن يگى جۇمىستار ءۇشىن حالقىمىزدىڭ ۇيىسا تۇسەتىنى ءسوزسىز.

ءپانيا سارمۋرزينا,

ماڭعىستاۋ وبلىستىق مادەنيەت باسقارماسى باسشىسىنىڭ مىندەتىن اتقارۋشى