اتىراۋدا «التىن دومبىرا» كۇي بايقاۋى ءوتتى

قر حالىق ءارتىسى, «قۇرمەت» وردەنىنىڭ يەگەرى, بۇكىلوداقتىق ورىنداۋشىلار بايقاۋىنىڭ جۇلدەگەرى, پروفەسسور ءازيدوللا ەسقاليەۆ وكىنىشكە قاراي جاقىندا دۇنيەدەن وزعان ەدى. بىراق «جاقسىنىڭ اتى ولمەيتىنىنىڭ» ايعاعىنداي ءدۇلدۇل دومبىراشىنىڭ ءىزىن جالعايتىن ۇرپاقتىڭ بارىن وسى بايقاۋ اڭعارتتى.

بيىل ءتورتىنشى رەت ۇيىمداستىرىلىپ وتىرعان شاراعا جيىرماعا جۋىق دومبىراشى قاتىستى. ال ولاردىڭ ونەرلەرىن قر ەڭبەك سىڭىرگەن قايراتكەرى ايتجان توقتاعان باستاعان قازىلار القاسى باعالادى.

كۇي دوداسىنىڭ جابىلۋ سالتاناتىنا قاتىسقان وبلىس اكىمى نۇرلان نوعاەۆ: «سوڭعى كەزدەرى دومبىرانىڭ مارتەبەسى تومەندەپ كەتتى» دەيتىندەرگە بۇگىنگى كۇي بايقاۋى جاۋاپ بولادى. قازاق باردا دومبىرا بار, دومبىرا باردا قازاق بار. ءازيدوللا ەسقاليەۆ ونەرگە ءبىر ادامداي قىزمەت ەتتى. بارىنە ءوز ەڭبەگىمەن جەتتى, اتاق پەن اقشا سۇرامادى. ەڭ باستىسى, حالقىنىڭ ىستىق ىقىلاسى, ەل ءۇشىن ەتكەن ەڭبەگىنىڭ وتەۋىندەي  ابىرويى بار»,- دەپ اتاپ ءوتتى.

- ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ سانانى جاڭعىرتىپ, ازاماتتارىمىزدىڭ بويىنداعى رۋحتى وياتۋ, مادەنيەتكە, داستۇرگە دەگەن قۇلشىنىستى ارتتىرۋدا ءمانى زور. وسى باعىتتاعى ىستەر وبلىستا جاراسىمدى جالعاسىن تاۋىپ كەلە جاتىر», - دەگەن ايماق باسشىسى بايقاۋدىڭ باس جۇلدەگەرى اتانعان د.نۇرپەيىسوۆا اتىنداعى حالىقتىق مۋزىكا اكادەمياسى, اتىراۋ مۋزىكا كوللەدجىنىڭ وقىتۋشىسى جانىبەك جاميەۆتى ماراپاتتاپ, ءبىر ميلليون تەڭگەنىڭ سەرتيفيكاتىن تابىستادى.

ءبىرىنشى ورىندى قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتى اسىلبەك داۋلەتياروۆ يەلەنسە, ەكىنشى ورىن وسى كونسەرۆاتوريانىڭ ستۋدەنتى اقبوكەن تەمىر مەن د.نۇرپەيىسوۆا اتىنداعى قازاق حالىق اسپاپتار وركەسترىنىڭ دومبىراشىسى رينات عيمىرانوۆقا بەرىلدى. قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتەرى ءالىبي نىشان, ءانۋار زينەدەنوۆ, ايگەرىم نەتاليەۆالار ءۇشىنشى جۇلدەنى ءبولىستى. بايقاۋدىڭ باسقا قاتىسۋشىلارى دا ەلەۋسىز قالمادى.

باقىتگۇل باباش,

«ەگەمەن قازاقستان»

اتىراۋ.