اقان سەرىنىڭ «بالقاديشا» ءانىن بىلمەيتىن جان كەمدە-كەم شىعار. جان دۇنيەڭدى تەربەتەتىن وسى ءبىر ءان ءالى كۇنگە دەيىن شىرقالىپ كەلەدى. ءتىپتى ونىڭ ەسترادامەن ورىندالۋى دا وزىندىك ءبىر اسەر قالدىرادى. بۇل ورايدا بالقاديشاعا ارناپ ەسكەرتكىش اشىلعاندىعىن دا قاپەرگە سالا كەتۋدى ءجون كوردىك.
جالپى اقمولا وبلىسى ىشكى ساياسات باسقارماسىنىڭ وڭىرلىك كوممۋنيكاتسيالار قىزمەتى «تۋعان جەر» ارنايى جوباسى اياسىندا وڭىرىمىزدەگى ەڭ تانىمال تاريحي ەسكەرتكىشتەردى جازىپ-جاريالاۋ سەرياسىن جالعاستىرىپ كەلەدى. اتى اڭىزعا اينالا باستاعان بالقاديشاعا ورناتىلعان ەسكەرتكىش تۋرالى جان-جاقتى اقپارات بەرۋى كوپشىلىك سۇرانىسىنان تۋىنداسا كەرەك. بالقاديشا ىبىرايقىزى اقمولا وبلىسى, زەرەندى اۋدانى كەڭوتكەل ەلدى مەكەنىنىڭ تۋماسى ەكەن.
ايتۋلى ارۋعا ورناتىلعان ءمۇسىننىڭ اشىلۋ سالتاناتىنا زەرەندى اۋدانىنىڭ بەلگىلى ازاماتتارى, كوپشىلىك قاۋىم قاتىستى. ونداعى باستى ايتىلعان وي – ەسكەرتكىش وسكەلەڭ ۇرپاققا مۇرا بولىپ قالاتىندىعى. جالپى ەسكەرتكىشتىڭ بيىكتىگى 4,2 مەتر بولسا, سالماعى 6 توننا تارتادى. اتالعان جوبانىڭ اۆتورى – قازاقستان رەسپۋبليكاسى سۋرەتشىلەر وداعىنىڭ مۇشەسى يۋري پوپوۆ.
رەتى كەلگەندە بالقاديشا ءانىن 1925 جىلى امىرە قاشاۋباەۆ سوناۋ پاريج قالاسىندا وتكەن دۇنيەجۇزىلىك فەستيۆالدە شىرقاپ, جۇلدەلى ورىن العانى ءمالىم. وسىلايشا اتاقتى ءاننىڭ كەيىپكەرىنە اينالعان بالقاديشاعا ارناپ ورناتىلعان ءمۇسىن ارقىلى قازاق قىزدارىنا قۇرمەت كورسەتىلىپ قانا قويماي, ونىڭ سۇلۋلىعى ارقىلى, اقىلى مەن پاراساتتىلىعىن دارىپتەۋ جولىمەن ۇلگى بولارلىق ناقىشتا تاربيە جۇمىستارىن جۇرگىزۋ كوزدەلگەن. ادامنىڭ ىشكى جان دۇنيەسىنىڭ سۇلۋلىعى سىرتقى كەلبەتىندە تۇراتىندىعىن ەسكەرسەك, ەسكەرتكىش ارقىلى تالاي قىزدارىمىز وزدەرىنىڭ بويىندا جاقسى قاسيەتتەردى قالىپتاستىرۋعا ۇمتىلارى حاق.
اسقار تۇراپباي ۇلى,
«ەگەمەن قازاقستان»
اقمولا وبلىسى