ەلباسىنىڭ ءوزى «ەلىمىزدىڭ ءىنجۋ-مارجانى» دەپ باعالاعان شىعىس قازاقستاندا تۋريزم سالاسىن دامىتۋعا مۇمكىندىك مول. سۇلتانماحمۇت تورايعىروۆشا ورنەكتەسەك, «بىزدەردە مىناداي بار, مىناداي بار» دەپ شەت ەلدىكتەرگە دە, ءوزىمىزدىڭ ازاماتتارعا دا ۇيالماي كورسەتۋگە تۇرارلىق كوركەم جەرلەر جەتەرلىك.
جاقىندا وبلىستىق تۋريزم جانە سىرتقى بايلانىستار باسقارماسى حالىقارالىق تۋريزم كۇنىنە وراي ءوڭىردىڭ تۋريزم سالاسىن ورگە سۇيرەپ جۇرگەن ۇيىمدار مەن اۋداندارعا قۇرمەت كورسەتىپ, بىرنەشە اتالىم بويىنشا ماراپاتتادى. «ۇزدىك تۋريستىك وپەراتور», «ۇزدىك تۋريستىك نىسان», «ۇزدىك تۋريستىك بازا», «ۇزدىك تۋريستىك باعىت», «ۇزدىك قوناقۇي», «ۇزدىك مەيرامحانا», «ۇزدىك قولونەرشى», «ۇزدىك تۋريستىك شارا», «جىل جاڭالىعى», «جىل جوباسى», «جىل سەرىكتەسى» سەكىلدى اتالىمدارمەن دارالانعانداردى وبلىس اكىمىنىڭ ءبىرىنشى ورىنباسارى نۇرىمبەت ساقتاعانوۆ قۇتتىقتادى. «سوڭعى ەكى جىلدا وبلىس اۋماعىنداعى تۋريستىك باعىتتارداعى اۆتوموبيل جولدارىن جوندەۋگە 4 ميلليارد تەڭگەگە جۋىق قارجى ءبولىندى. بۇلار – الاكول مەن سىبە كولدەرىنە جانە نۇرتاۋ, التاي ءالپىسى دەمالىس بازالارىنا, كاتونقاراعاي اۋدانىنا اپاراتىن جولدار. 2015-2016 جىلدارى وڭىردە تۋريستىك نىسانداردى سالۋ بويىنشا 682 ميلليون تەڭگەگە 19 ينۆەستيتسيالىق جوبا جۇزەگە اسىرىلدى. 2023 جىلعا دەيىن ايماقتا قۇنى 18 ميلليارد تەڭگەنى قۇرايىن 26 جوبانى ىسكە اسىرۋ جوسپارلانىپ وتىر. جەرگىلىكتى اتقارۋشى ورگاندار تاراپىنان ينفراقۇرىلىمدى جاساقتاۋعا از كوڭىل ءبولىنىپ جاتقان جوق, سىزدەر دە تۋريستەردى تارتۋ باعىتىندا ايانباي جۇمىس ىستەۋگە تيىسسىزدەر», - دەدى وبلىس اكىمىنىڭ ءبىرىنشى ورىنباسارى.
بيىل «ۇزدىك تۋريستىك نىسان-2017» اتالىمىن ءۇرجار اۋدانى يەلەندى. اعىمداعى جىلى اتالعان اۋدان اۋماعىنداعى الاكولگە تۋريستەردىڭ اعىلىپ كەلىپ, سانى ەكى ەسەگە دەيىن ارتا تۇسكەنى بەلگىلى. «بيىل ءبىزدىڭ اۋدان ءۇشىن ەرەكشە جىل بولدى. الاكول جاعاسىن اباتتاندىرۋعا وبلىستىق بيۋدجەتتەن 500 ميلليون تەڭگە قارجى ءبولىنىپ, دەمالىس ورنى ادام تانىماستاي وزگەردى. كەلەسى جىلى دا اباتتاندىرۋ, كورىكتەندىرۋ جۇمىستارى جالعاسادى. ەڭ ۇلكەن جاڭالىق, 2018 جىلى كول باسىنا دەيىن پويىز جۇرگىزۋ جوسپارلانىپ وتىر», - دەيدى ءۇرجار اۋدانى اكىمىنىڭ ورىنباسارى جارقىنبەك بايسابىروۆ.
سونىمەن قاتار نۇرىمبەت ساقتاعانوۆ «شىعىس-باتىس» مەيرامحانا سارايىنىڭ ديرەكتورى مۇحتار تويبازاروۆقا, «بايان» پانتىمەن ەمدەۋ فيليالىنىڭ ديرەكتورى بايان باشەۆاعا, «كليموۆكا» دەمالىس بازاسىنىڭ ديرەكتورى ۆلاديمير كليموۆقا, كاتونقاراعاي ۇلتتىق پاركىنىڭ ديرەكتورى ەرلان مۇستافينگە جانە «مەريديان» تۋريستىك فيرماسىنىڭ ديرەكتورى ايمان جاكۋپوۆاعا «شىعىس قازاقستاننىڭ تۋريزم سالاسىن دامىتۋعا قوسقان ۇلەسى ءۇشىن» العىس حاتىن تاپسىردى.
ازامات قاسىم,
«ەگەمەن قازاقستان»
وسكەمەن