جىل ساناپ الماتى بيزنەس پەن كاسىپكەرلىكتىڭ كورىگىن قىزدىرعان ۇلكەن الاڭعا اينالىپ كەلەدى. بۇل جونىندە قالادا جىلىنا ءبىر رەت ءداستۇرلى تۇردە وتكىزىلەتىن «Almaty Invest 2017» حالىقارالىق ينۆەستيتسيالىق فورۋمىندا كەڭىنەن ايتىلدى. بيىلعى فورۋمعا الەمنىڭ 28 ەلىنەن كەلگەن 500 دەلەگات قاتىستى.
اۋقىمى كەڭ ءىس-شارا جىل سايىن ءوز الاڭىندا بەدەلدى ساياساتكەرلەردى, الەمدىك جانە وتاندىق بيزنەس كوشباسشىلارىن, ينۆەستيتسيالىق كورپوراتسيالار مەن قارجى ينستيتۋتتارىن جانە حالىقارالىق ۇيىمدار باسشىلارىن جينايدى. وسىلايشا, الەمنىڭ ءار تۇكپىرىنەن كەلگەن ءتۇرلى بيزنەس وكىلدەرى جوسپارلارىمەن ءبولىسىپ, ءتۇرلى ۇسىنىستار ايتۋ ارقىلى ماقسات تىلەكتەرىن ءبىر ارنادان توعىستىرادى.
ءىس-شارانى جۇرگىزگەن وتاندىق تاۋەلسىز بۇقارالىق اقپارات قۇرالدارىنىڭ نەگىزىن قالاۋشىلاردىڭ ءبىرى ارمانجان بايتاسوۆ بيىلعى باسقوسۋدىڭ ماڭىزدىلىعىنا توقتالا كەلىپ, فورۋمنىڭ باستى ەرەكشەلىگى ونىڭ بيزنەس مىندەتتەرگە تولىق بەيىمدەلۋىندە ەكەنىن ايتتى. ياعني فورۋمنىڭ باستى مىندەتى – شەتەلدىك ينۆەستورلاردى تارتۋ, سونداي-اق ىسكە اسىرىلعان جوبالارمەن قاتار, ينۆەستيتسيالار سالۋدى قاجەت ەتەتىن كەلەشەك جوبالاردىڭ تۇساۋىن كەسۋ. بۇدان بۇرىن وتكەن فورۋمنىڭ قورىتىندىسى بويىنشا قازىرگى كەزدە 7,7 ملرد تەڭگەنىڭ 5 جوباسى ىسكە اسىرىلىپ, 1230 جۇمىس ورىندارى قۇرىلعان.
بيىلعى باعدارلامادا لوگيستيكا, ءبىلىم, تاماق ونەركاسىبى جانە كينو ءوندىرىسى تاقىرىبىنا ارنالعان 4 باعىت بويىنشا وزەكتى ماسەلەلەر لەگىن ورتاعا سالۋ كوزدەلگەن. وسى جىلى كينو پروديۋسەرلەرىن ينۆەستيتسيالاۋ ءۇشىن الماتى قالاسىنىڭ تارتىمدىلىعىنا ارنالعان تەڭدەسى جوق سەسسيا وتكىزۋ تۋرالى شەشىم قابىلداندى. قاتىسۋشىلار جوبالاردى پروديۋسەرلەۋ بويىنشا ءوزارا تاجىريبە الماسىپ, كينو مەكتەپتەرىن قۇرۋ جايلى جوسپارلارىن ورتاعا سالدى. فورۋم اياسىندا كينو جانە تۆ-ۇدەرىستەرىن ۇيىمداستىرۋدى جەڭىلدەتەتىن قۇرالداردىڭ تۇساۋىن كەسۋ دە نازاردان تىس قالمادى. مامانداردىڭ ايتۋىنشا, بۇل ءوز كەزەگىندە سالاعا سالىناتىن ينۆەستيتسيالاردىڭ اعىمىن ىنتالاندىرۋعا مول سەپتىگىن تيگىزبەك.
– سوڭعى بەس جىلدا قالا حالقىنىڭ سانى ەكى ەسەگە ۇلعايعان. ءۇش ميلليونعا جۋىق حالىق شوعىرلانعان مەگاپوليستىڭ ەكونوميكالىق الەۋەتى ارتىپ, ينۆەستيتسيالىق تارتىمدىلىعى دا دامي تۇسكەن. الماتى بيزنەس پەن جەكە كاپيتالدىڭ قالاسى. سوڭعى ەكى جىلدىڭ وزىندە جەكە ينۆەستيتسيالار كولەمى 25%-عا, ال شەتەلدىك ينۆەستيتسيا 20%-عا وسكەن. الەمدىك رەيتينگ نەگىزىندە 2016 جىلدىڭ قورىتىندىسىنا سايكەس الماتى الەمدەگى ءومىر سۇرۋگە قولايلى, قىمبات ەمەس قالالاردىڭ قاتارىنان تابىلعان. مۇنىڭ ءبىر عانا مىسالى, الماتىعا 2-3 كۇنگە جاي عانا گولف ويناپ قايتۋ ءۇشىن وڭتۇستىك كورەيا سياقتى دامىعان ەلدەردىڭ ازاماتتارى ارنايى كەلەدى ەكەن. الماتى ەلىمىزدىڭ قارجى ورتالىعى عانا ەمەس, رۋحانيات پەن مادەنيەتتىڭ كوركەم كورىنىس تاپقان مەكەنى. «Almaty Invest 2017» فورۋمى كوپتەگەن يگى باستامالارعا جول اشادى دەگەن سەنىمدەمىز – دەيدى فورۋمنىڭ اشىلۋ سالتاناتىندا سويلەگەن سوزىندە قالا اكىمى باۋىرجان بايبەك.
لوگيستيكاعا, بىلىمگە, تاماق ونەركاسىبىنە جانە كينو وندىرىسىنە ارنالعان نەگىزگى تالقىلاۋ سەسسيالارىنان باسقا, فورۋم شەڭبەرىندە «حالىقارالىق ينۆەستيتسيالىق تاجىريبە» تاقىرىبىندا تۆ-تالقىلاۋ ءوتتى. تالقىلاۋ بارىسىندا ينۆەستورلار مەن ەكونوميستەر مەگوپوليسكە شەتەلدىك ينۆەستيتسيالاردى تارتۋدىڭ ۇزدىك الەمدىك تاجىريبەسى جايلى ايتتى.
ارمان وكتيابر, «ەگەمەن قازاقستان»
الماتى