فۋتبولدان قازاقستان قۇراماسى 2018 جىلعى الەم چەمپيوناتىنا ىرىكتەۋ كەزەڭى اياسىندا ارمەنياعا قارسى سوڭعى ويىنىن وتكىزىپ, 1:1 ەسەبىمەن تەڭ تارقاستى. كەزدەسۋدەن كەيىن قۇرامانىڭ باس جاتتىقتىرۋشىسى الەكساندر بوروديۋك ادەتتەگىدەي جۋرناليستەردىڭ سۇراقتارىنا جاۋاپ بەردى.
– بۇگىن الاڭعا شىققان جىگىتتەردىڭ بارلىعى قال-قادىرىنشە ءوز شەبەرلىكتەرىن كورسەتتى. ولارعا ەش وكپەم جوق, تەك العىس ايتقىم كەلەدى. بۇل كەشتە جەڭىسكە جەتەتىن ساتتەر دە كوپ بولدى. الايدا, جەڭىلىپ قالۋىمىز دا ابدەن مۇمكىن ەدى. اتتەڭ, جىگىتتەر جۇيكەنى توزدىرماي, بەرىلگەن تاپسىرمانى تولىقتاي ورىنداعاندا جاعداي باسقاشا بولار ەدى.
– بۇگىن قۇراماعا تاجىريبەلى ءتورت-بەس ويىنشىمىز كومەكتەسە المادى. وسى قۇراممەن گەنريح محيتاريان سەكىلدى فۋتبولشىسى بار كومانداعا قارسى تۇرۋ قانشالىقتى قيىنعا سوقتى؟
– تاجىريبەلى فۋتبولشىلاردىڭ بىزگە كومەكتەسە الماعانى وكىنىشتى-اق. ايتكەنمەن الاڭعا شىققان جىگىتتەر ءوز ەلى ءۇشىن سىنعا ءتۇستى. الداعى ۋاقىتتا وسىلار قۇرامانىڭ نەگىزگى فۋتبولشىسى بولاتىنىنا سەنىمىم مول. ال ءتۇرلى سەبەپتەرمەن كەلمەگەن ويىنشىلار وزدەرىنىڭ مىقتىلىعىن قايتا دالەلدەۋ كەرەك. باسەكەلەستىك بار جەردە ناتيجە جوعارى بولاتىنىن ۇمىتپاۋىمىز كەرەك. مەنىڭ تۇسىنىگىمدە قۇراماعا تەك جانى اشيتىن, شىن پاتريوت فۋتبولشىلار عانا كەلۋ كەرەك.
– قۇرامامىز ءبىرىنشى كەزەڭدە – 5-3-2, ال ەكىنشى كەزەڭدە – 4-4-2 ۇلگىسىندە ونەر كورسەتتى. مۇنىڭ سىرى نەدە؟
– العاشقى 45 مينۋتتا بىزدە بىرنەشە مۇمكىندىكتەر بولدى. نۇرعاليەۆ قاقپاشىمەن جەكەدارا شىعىپ, ءوز مۇمكىندىگىن ءمۇلت جىبەرىپ الدى. ەگەر دە گول سالعانىمىزدا, ستسەناري باسقاشا بولار ەدى. ايتكەنمەن, «سەن سالماساڭ, ساعان سالادى» دەگەن قاعيدانىڭ كەبىن تارتتىق. بىزگە قاۋىپ توندىرگەن شابۋىلداردىڭ باسىم بولىگى قاپتالداردان كەلىپ جاتتى. ناتيجەسىندە, ءبىرىنشى كەزەڭدە ءبىر گول جىبەرىپ الدىق. قاپتالداعى قورعاۋشىلار ءوز جۇمىستارىن ويداعىداي اتقارا الماعاننان كەيىن, كەلەسى جوسپارىمىزعا كوشۋگە ءماجبۇر بولدىق.
– ىرىكتەۋ كەزەڭى اياقتالدى. ءۇش ۇپاي ەنشىلەدىك. وسى ناتيجەگە كوڭىلىڭىز تولا ما؟ قازاقستان قۇراماسىنىڭ باس جاتتىقتىرۋشىسى قىزمەتىنە لايىقپىن دەپ ويلايسىز با؟
– بۇل سۇراعىڭىزعا جاۋاپ بەرمەي-اق قويايىن (جاتتىقتىرۋشىنىڭ جاۋابىنا كوڭىلى تولماعان جۋرناليست زالدان شىعىپ كەتتى – اۆتور).
– قارسىلاس كومانداعا كوبىرەك شابۋىلداۋ ءۇشىن حيجنيچەنكودان بولەك ششەتكيندى دە شىعارۋ كەرەك پە ەدى, قالاي ويلايسىز؟
– جوسپارىمىزدا وسىنداي تاكتيكا بولعان. الايدا, ويىن سوڭىنا تامان قارسىلاستارىمىز الاڭنىڭ ورتا تۇسىنان ءجيى شابۋىلداي باستاعاننان كەيىن, ءبىز ەشتەڭەنى وزگەرتكىمىز كەلمەدى.
– الداعى ىرىكتەۋ كەزەڭىندە قانداي جوسپارىڭىز بار؟
– بۇل سۇراعىڭىزعا ءبىر اپتادان كەيىن جاۋاپ بەرەيىن. كەلەسى اپتادا فۋتبول فەدەراتسياسىنىڭ باسشىلارىمەن كەزدەسىپ, جوسپارىمىزدى ايقىنداپ الامىز دەپ ويلايمىن.
– العاش كەلگەندەگى جوسپارىڭىز بويىنشا كومانداعا جاس فۋتبولشىلاردى تارتا الدىڭىز با؟
– جاستار قۇراماسىنىڭ كۇنتىزبەسى قۇراما ويىندارىمەن سايكەس كەلگەندىكتەن, جاستارعا قولقا سالا قويمادىق. ولاردىڭ توپتان شىعۋعا مۇمكىندىگى جوعارى. سوندىقتان, بۇل جولى جاستاردى شاقىرعانىمىز جوق. ءبىز جاستار قۇراماسىنان بەس-التى جاس فۋتبولشىنى باقىلاپ ءجۇرمىز. ەگەر دە كەلەر ماۋسىمدا ءوز كلۋبتارىندا نەگىزگى قۇرامدا ويناسا, وندا ولار مىندەتتى تۇردە قۇراماعا شاقىرىلاتىن بولادى.
ەستەرىڭىزگە سالا كەتەيىك, قازاقستان قۇراماسى فۋتبولدان 2018 جىلعى الەم چەمپيوناتىنا ىرىكتەۋ كەزەڭى اياسىندا ارمەنيانى قۇراماسىن قابىلداپ, 1:1 ەسەبىمەن تەڭ ءتۇستى.
الماس ماناپ, "ەگەمەن قازاقستان"