ادەبيەت سالاسىنداعى نوبەل سىيلىعى كادزۋو يسيگۋروعا بەرىلدى

«ونىڭ ەموتسيونالدى بوياۋى قانىق روماندارىندا الەم مەن ادام اراسىنداعى نازىك بايلانىستاردى كورسەتە بىلگەنى ءۇشىن ماراپاتتالدى», دەلىنگەن.

كادزۋو يسيگۋرو 1954 جىلى 8 قاراشادا جاپونيانىڭ ناگاساكي قالاسىندا تۋعان. ول بەس جاسقا تولعان كەزدە وتباسىمەن بىرىككەن كورولدىگىنە قونىس اۋداردى. يسيگۋرو 1970 جىلداردىڭ سوڭىندا كەنت ۋنيۆەرسيتەتىنىڭ اعىلشىن ءتىلى جانە فيلوسوفيا فاكۋلتەتىن ءبىتىرىپ, وقۋدى شىعىس انگليا ۋنيۆەرسيتەتىندە جالعاستىردى.

يسيگۋرونىڭ شىعارماشىلىعىندا وتكەن ەستەلىكتەر مەن ۋاقىت, ءوزىن الداۋ سىندى سيپاتتار باسىم بولىپ كەلەدى. سۋرەتكەردىڭ مۇنداي دۇنيەتانىمى ەنتوني حوپكينس  فيلم تۇسىرگەن «The Remains of the Day» (1989) اتتى تانىمال رومانىندا بايقالادى. بۇدان بولەك «Never Let Me Go» (2005) ەڭبەگى عىلىمي فانتاستيكالىق ەرەكشەلىگىمەن دارالانادى. وزگە دە اڭگىمەلەر جيناعىنان مۋزىكا تاريحى مەن ماڭىزى باستى ورىندا كورىنەدى. ال 2015 جىلى جازىلعان «The Buried Giant» اتتى كەيىنگى رومانى وقىرماندار اراسىندا جوعارى باعاعا يە بولدى. جازۋشىنىڭ كوپتەگەن شىعارمالارى اعىلشىن, نەمىس, فرانتسۋز, شۆەد, يسپان تىلدەرىندە جارىق كورگەن.

ادەبيەت سالاسى بويىنشا نوبەل سىيلىعى 1901 جىلدان باستاپ بەرىلىپ كەلەدى. بىلتىر امەريكالىق اقىن, مۋزىكانت بوب ديلان لاۋرەات اتاندى. ال 2015 جىلى بەلورۋسسيالىق جازۋشى سۆەتلانا الەكسيەۆيچ نوبەل سىيلىعىن العان ون ءتورتىنشى ايەل اتاندى.

ايا ءومىرتاي,

«ەگەمەن قازاقستان»