مەملەكەت باسشىسىنىڭ «رۋحاني جاڭعىرۋ» باعدارلاماسى اياسىندا اقتاۋ قالاسىندا بوكستان قازاق بوكسىنىڭ اتاسى شوقىر بولتەك ۇلىن ەسكە الۋعا ارنالعان ح حالىقارالىق تۋرنير باستالدى.
4-7 قازان ارالىعىندا وتەتىن تۋرنيرگە قازاقستان, رەسەي, وزبەكستان, قىرعىزستان, تاجىكستان, پولشا, ازەربايجان, فينليانديا, موڭعوليا, تۇرىكمەنستان, بەلورۋسيا, ارمەنيا مەن گرۋزيادان 200-گە جۋىق سپورتشى قاتىسادى. بۇل سپورت سايىسىنا قازاقستاننىڭ بارلىق وڭىرلەرىنەن كوماندالاردىڭ جانە شەتەل وكىلدەرىنىڭ قاتىسۋى – اتالعان تۋرنير بەدەلىنىڭ ارتىپ كەلە جاتقانىنىڭ ايقىن دالەلى.
- ءبىزدىڭ قىزمەتىمىزدىڭ باسىم باعىتتارىنىڭ ءبىرى – جاستارعا دەگەن قامقورلىق. ول ءۇشىن ماڭعىستاۋ وبلىسىندا بارلىق جاعداي جاسالعان. سونىڭ ىشىندە جاستار اراسىندا بوكس تانىمالدىققا يە. سپورتشىلار ءاربىر سپورت سايىسىنا ۇمىتپەن كەلەدى. بۇگىن سىزدەر ەرجۇرەكتىك تانىتىپ, كورەرمەندەرىڭىزگە قىزىقتى ءارى تارتىستى جەكپە-جەك سىيلايدى دەپ سەنەمىن. ش.بولتەك ۇلىن ەسكە الۋعا ارنالعان تۋرنير, بارلىق قاتىسۋشىلار ءۇشىن جاڭا جەڭىستەر مەن جەتىستىكتەرگە جول اشاتىنىنا سەنىمىم مول. ءتۋرنيردىڭ بارلىق قاتىسۋشىلارى مەن ۇيىمداستىرۋشىلارىنا ساتتىلىك پەن جەڭىس تىلەيمىن, دەدى ءتۋرنيردىڭ اشىلۋ سالتاناتىندا ماڭعىستاۋ وبلىسىنىڭ اكىمى ە. توعجانوۆ.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى