استانا قالاسىنداعى «قازمەديا» ورتالىعىندا ءوتىپ جاتقان «Astana Media Week» اپتالىعى اياسىنداعى سەسسيادا حالىقارالىق قارجى ورتالىعىنىڭ باسشىسى ەرنۇر رىسماعامبەتوۆ ومىرىندەگى ەڭ قىزىقتى موتيۆاتسيالىق وقيعالارىمەن ءبولىستى.
«بالا كۇنىمدە دومبىرادا ويناۋعا قاتتى قىزىعاتىن ەدىم. بىراق مەنىڭ تۋىپ-وسكەن جەرىم قالالى جەردەن شالعاي ورنالاسقاندىقتان, ۇيىرمەلەرگە ءوزىم بارا المايتىنمىن. ءسال ەسەيگەننەن كەيىن وسى ماقساتىما جەتۋ ءۇشىن دومبىرا مەكتەبىنە بارىپ جازىلدىم. ءبىراز كۇيدى ۇيرەندىم. بىراق جەتەكشىلەرىم انسامبلدەرگە قاتىستىرمايتىن. سەبەبى, مەن ارىپتەستەرىمە قاراعاندا جىلدام شەرتىپ, شاتاسىپ قالاتىنمىن. سول كەزدە مەن ومىرىمە قاجەت بىرنارسەنى ءتۇيدىم. ەشقاشان وزا شاپپاي ءارى كوشتىڭ سوڭىندا قالىپ قويماۋ قاجەت ەكەن. ءبىر سوزبەن ايتقاندا ءار ادام زامانىنا ساي بولۋ كەرەك», دەدى ەرنۇر رىسماعامبەتوۆ.
ەرنۇر رىسماعامبەتوۆ مەكتەپ وقۋشىسى كەزىندە دە, ستۋدەنتتىك شاعىندا دا ءبىراز جەتىستىككە جەتكەن. ول 2003 جىلى تايپەيدە وتكەن 34-ءشى حالىقارالىق فيزيكا وليمپياداسىنىڭ التىن جۇلدەگەرى, سونداي-اق فيزيكا پانىنەن وتكەن حالىقارالىق, دۇنيەجۇزىلىك وليمپيادالاردىڭ بىرنەشە دۇركىن جەڭىمپازى, الەمنىڭ ەڭ ۇزدىك ۋنيۆەرسيتەتتەرىنىڭ ءبىرى بولىپ سانالاتىن كاليفورنيا تەحنولوگيالىق ۋنيۆەرسيتەتىن (CalTech) تامامداعان. بىراق ءبىر قىزىعى بالا كۇنىندە فيزيكاعا مۇلدەم قىزىقپاپتى, ءتىپتى ۇناتپاعان ەكەن. ءبارى جەزقازعان قالاسىنداعى ءبىلىم يننوۆاتسيا مەكتەبىنە (قازاق-تۇرىك ليتسەيى) تۇسكەننەن كەيىن باستالىپتى. جاڭا مەكتەپكە بارعاننان كەيىن مۇعالىمدەرى فيزيكا پانىنەن ءتۇرلى وليمپيادالارعا جىبەرگەن.
«سىنىپتاستاستارىم ءتۇرلى ەلدەردەگى وليمپيادالارعا قاتىسىپ جۇرەتىن. ال مەنىڭ ارمانىمنىڭ ءبىرى وزگە مەملەكەتتەرگە بارۋ بولاتىن. بۇل ماعان قارجىلاي قيىن ەدى. سوندىقتان وقۋ ارقىلى ارمانىمدى جۇزەگە اسىرۋعا تىرىستىم. كۇنىنە ون ساعات ۋاقىتىمدى فيزيكاعا ارنادىم. ۋاقىت وتە كەلە اۋداندىق, قالالىق, وبلىستىق, رەسپۋبليكالىق وليمپيادالاردا جەڭىسكە جەتە باستادىم. ءوز ۋاقىتى كەلگەندە حالىقارالىق جارىستاردا ەلىمنىڭ نامىسىن قورعايتىن بولدىم. ازداعان ۋاقىتتىڭ ىشىندە تۇركيانىڭ انتاليا قالاسىندا, يندونەزيانىڭ بالي قالاسىندا, سينگاپۋردا, تايلاندتا وتكەن وليمپيادالارعا قاتىستىم. سوندىقتان ومىردە بىرنارسەگە جەتۋ ءۇشىن تىرىسۋ كەرەك, جەڭىسكە جەتۋ كەرەك», دەدى ول.
بۇدان كەيىن ەرنۇر رىسماعامبەتوۆ كاليفورنياداعى وقۋى جايلى ايتتى. قاسىندا بىرگە بولعان ەكى دوسى ارقىلى ۇلكەن جەتىستىكتەرگە جەتكەنىن ەسىنە الدى. وسى ورايدا ول جينالعان قاۋىمعا كاسىبي ادامدارمەن جاقىنىراق ارالاسۋدى كەڭەس ەتتى. سەبەبى, كاسىبي ماماندارمەن ارالاسۋ ارقىلى ءوزىڭنىڭ دە جىلدام داميتىنىڭدى العا تارتتى.
ەرنۇر نۇرماعامبەتوۆ بۇگىندە قر ۇلتتىق كومانداسىن مەكتەپارالىق عىلىمي جارىستارىنىڭ دايىندىعىنا بەلسەندى قاتىسۋشىلارىنىڭ ءبىرى. سوڭعى بەس جىلدا جاتتىقتىرۋشى رەتىندە وقۋشىلارى 25 مۇمكىن مەدالدىڭ ىشىنەن 24-ءىن جەڭىپ العان. ونىڭ 6-اۋى التىن, 15-ءى كۇمىس جانە 3-ەۋى قولا. نەبارى 31 جاسىندا بيىك بەلەستەردى باعىندىرىپ ۇلگەردى. ءومىر جولىنا قاراساق, ول دومبىرا شەرتۋمەن دە اينالىسقان, فيزيكا مامانى دا بولعان, قارجى سالاسىندا ءبىلىم العان. وسى ارادا كوپشىلىكتىڭ ويىنا ونىڭ و باستاعى ارمانى, ماقساتى قانداي بولدى ەكەن دەگەن ساۋالدىڭ تۋىندارى انىق.
«شىنىمدى ايتسام, ارمانىم دا, ماقساتىم دا كوپ بولاتىن. بىراق بىرەۋىن باعىندىرعاننان كەيىن «ارى قاراي نە ىستەيمىن؟» دەگەن سۇراق ۇنەمى مازالايتىن. وسىلايشا الدىما جاڭا ماقسات قوياتىنمىن. بىراق بۇل ءىستى مەن ءسۇيسىنىپ, راحاتتانىپ وتىرىپ جۇزەگە اسىرۋىم كەرەك. مىنە, وسى كەزدە ناتيجەسى دە بولادى», دەپ ءسوزىن قورىتتى ەرنۇر رىسماعامبەتوۆ.