«استانا وپەرا» ءتورتىنشى ماۋسىمىن قورىتىندىلادى

«استانا وپەرانىڭ» ءتورتىنشى ماۋسىمى ا.جۇبانوۆ پەن ل.ءحا­ميديدىڭ «اباي» وپەراسىمەن اشىلعانى ەستە. وپەرا «جىبەك جولى» حالىقارالىق فەستيۆالى اياسىندا ۇسىنىلعان ەدى. سونداي-اق ەلوردادا پلاسيدو دومينگونىڭ «وپەراليا» حالىقارالىق وپەرا بايقاۋىنىڭ ءوتۋى, ماەسترونىڭ ءوزى «تراۆياتا» سپەكتاكلىنەن دجور جەرموننىڭ پارتياسىن ورىنداۋى, ەلىمىزگە ايگىلى لا سكالا تەاترىنىڭ گاسترولدىك ساپارمەن كەلۋى, الان بورىباەۆتىڭ جەتەكشىلىگىمەن 1200 مۋزىكانتتىڭ گ.مالەردىڭ №8 سيمفونياسىن ورىنداۋى «استانا وپەرا» ساحناسىندا ايتۋلى وقيعالاردىڭ وتكەنىنەن حابار بەرەدى. 

تەاتر ءۇشىن ءتورتىنشى ماۋسىم­نىڭ تاعى ءبىر ايتۋلى جاڭالىعى – بالەت ترۋپپاسىنىڭ ماسكات (ومان) قالاسىنا گاسترولدىك ساپارى. ارينە قازاقستاندىق ۇجىمنىڭ شىعارماشىلىق ساپارلار شەكاراسى سان-الۋان. «استانا وپەرانىڭ» ۇجىمى يتاليا, اقش, كانادا, فرانتسيا, رەسەي, قىتاي ەلدەرىنىڭ ساحنالارىندا ونەر كورسەتىپ ءجۇر. ال ومان سۇلتاندىعىنىڭ ءجونى بولەك بولاتىنى, بۇل جولى گاسترولدىك ساپارمەن بارعان 120 ادامنىڭ بارلىق جول شىعىنىن شاقىرۋشى تاراپ كوتەرگەن. بۇل تۋرالى «استانا وپەرا» تەاترى ديرەكتورىنىڭ ءبىرىنشى ورىنباسارى تولەۋبەك الپيەۆ مالىمدەدى. ء«بىزدىڭ ومانعا ساپارىمىز ەلباسىنىڭ «رۋحاني جاڭعىرۋ» باعدارلاماسى اياسىندا ىسكە اسىرىلعان ماڭىزدى شارا. بۇرىن ءبىزدى شاقىرعان مەملەكەتتەر كەلىسىمشارت بويىنشا شى­عىننىڭ جارتىسىن عانا مويىندارىنا الاتىن. بۇل جولى ومان سۇلتاندىعى بۇكىل شىعىندى وزدەرى كوتەردى. مۇنداعى كورول­دىك وپەرا تەاترىنىڭ سالىنعانىنا ون جىلدىڭ عانا ءجۇزى بولدى. ايتسە دە الەمنىڭ ەڭ مىقتى تەاتر ۇجىمدارىمەن بايلانىس جاساپ ۇلگەرگەن», دەدى ول. 

 ومانعا گاسترولدىك ساپارىنىڭ اسەرىن بالەت ترۋپپاسىنىڭ كور­كەمدىك جەتەكشىسى التىناي اسىل­­مۇراتوۆا بىلايشا ءبولىستى: «ومان­دىق كورەرمەندەر ءبىزدى وتە جىلى قابىلدادى. ءبىزدىڭ ار­تىستەرىمىز دە وزدەرىن لايىقتى كورسەتە ءبىلدى. الدىندا بىزگە ءتۇرلى جاعدايلار بولۋى مۇمكىن ەكە­نىن ەسكەرتكەن ەدى. بىراق ەش­قان­داي وعاش ارەكەتتەر بولعان جوق. ءتىپتى ءبىز قويعان «اققۋ كو­لىن» ۇيىپ وتىرىپ تاماشالادى, سوڭىندا ورىندارىنان تۇرىپ قول شا­پالاقتادى».

كوركەمدىك جەتەكشىنىڭ ايتۋىنشا, الەمدىك كلاسسيكانىڭ جاۋھارلارىنىڭ قاتارىنداعى «اققۋ كولى» بالەتىنە جاڭا حورەو­گرافيالىق رەداكتسيا جاسالعان. ياعني, كورولدىك وپەرا تەاترىندا التىناي اسىلمۇراتوۆانىڭ جاڭاشا قويىلىمىمەن پ.ي.چاي­كوۆسكيدىڭ «اققۋ كولىنىڭ» پرەمەراسى وتكەن.  ال ەندى جاڭا ماۋسىمعا كەلەر بولساق, تەاتردىڭ كەزەكتى بەسىنشى ماۋسىمى قازاننىڭ 20-دا اشىلادى. «استانا وپەرا» تەاترىنىڭ ديرەكتورى عالىم اح­مەدياروۆ كورەرمەندەر بەسىنشى ماۋسىمدا ادولف اداننىڭ «كورسار» بالەتىن, م.تولەباەۆتىڭ ء«بىرجان-سارا» وپەراسى مەن پ.ي.چايكوۆسكيدىڭ «قارعانىڭ ماتكەسى» وپەراسىن, سونداي-اق ج.بيزەنىڭ «كارمەن» وپەراسىنىڭ پرەمەراسىن تاماشالاي الاتىنىن ايتتى. 

 جالپى بريفينگ بارىسىندا الماتى مەن استاناداعى وپەرا تەاترلارىنىڭ ساحنالارىنان 60-70 جىلدان بەرى تۇسپەي كەلە جات­قان ۇلتتىق وپەرالاردىڭ سوڭعى 3-4 جىل بەدەرىندە جاڭا زا­مانعا لايىقتالىپ جاڭعىرىپ جاتقانى اڭگىمە وزەگىنە اينالدى. سونداي-اق ۇلتتىق بالەتتىڭ ماسەلەسى دە كوتەرىلدى. بىزدە 5-6 ۇلتتىق وپەرا بار بولعانىمەن, ۇلتتىق بالەت جوق ەكەن. كەزىندە قويىلعان, بىراق ساحنادان ءتۇسىپ قالعان, سونداي-اق قويۋشىسىن كۇتىپ جاتقان بالەتتەردى ەسەپتەمەگەندە «استانا وپەرادا» ناقتى ءبىر عانا ۇلتتىق بالەت ءبيى (عازيزا جۇبانوۆا, «قاراگوز») قويىلعان. بىراق, ءبىر عانا بيمەن ۇلتتىق بالەتتىڭ كوسەگەسى كوگەرمەيتىنى تاعى بەلگىلى. بۇل تۇرعىدان كەلگەندە, «استانا وپەرا» تەاترىنىڭ باسشىلارى كەلەشەكتە ۇلتتىق بالەتتى دامىتۋ تۋرالى دا ءوز ويلارىن جەتكىزدى.

ايگۇل سەيىل, «ەگەمەن قازاقستان»