كىسىلىك كەلبەت پەن كاسىپكەرلىك قىزمەت ەگىز ۇعىم

جۋىردا عانا وسى «تۇران-بولاشاق» بيزنەس-ينكۋباتور الاڭىندا ستۋدەنتتەردىڭ قاتىسۋىمەن كەزەكتى شارا ءوتتى. ەكونوميكا جانە بيزنەس-يننوۆاتسيا كافەدراسىنىڭ ۇستازدارى مەن ستۋدەنتەرى قاتىسقان ترەنينگتە بەلگىلى ءبىر جەتىستىككە جەتۋ جولىنداعى باعىت-باعداردى ايقىنداۋ مەن بيىك ماقساتتى باعىندىرۋدىڭ قىر-سىرى كەڭىنەن تالقىلاندى. سونىمەن قاتار, جاس بۋىن وكىلدەرىنىڭ جەكە تۇلعالىق قاسيەتىن قالىپتاستىرۋ جولىندا ءتيىمدى تەتىكتەر دە تاقىرىپقا تۇزدىق بولدى. سول سەبەپتەن دە بيىلعى وقۋ جىلىندا العاش رەت ۇيىمداستىرىلعان بۇگىنگى سەمينار تاقىرىبى – «تۇلعالىق قاسيەتتى قالىپتاستىرۋ جولىندا» دەپ تاڭدالعان.

وقۋ ورنىنىڭ جانىنان قۇرىلعان بيزنەس-ينكۋباتور الاڭىنداعى باسقوسۋدى وسى سالادا شەبەرلىگى شىڭدالعان تاجىريبەلى ءارى ءبىلىمدى مامان ەرلاز جايىقباەۆ جۇرگىزىپ, ول ءوز تاجىريبەسىن ورتاعا سالىپ, ستۋدەنتتەر سارالاۋىنان وتكىزدى. ارينە, كاسىپكەرلىك سالادا ەڭبەك ەتىپ, جوسپارىڭدى جۇزەگە اسىرۋ مەن تابىسىڭدى ەسەلەۋ كىسىنىڭ قولىنان كەلەتىن شىعار. بىراق, ەكونوميكالىق جوعارى كورسەتكىشتەرگە جەتىپ, تۇلعالىق كەلبەتىن تاباندىلىقپەن قالىپتاستىرۋ سيپاتى ەكىنىڭ ءبىرى وڭاي ىسكە اسىراتىن ادامي قاسيەت ەمەس.

«قازىرگى كەزدە تىنىمسىز ىزدەنىس ۇستىندە جۇرگەن جاستارىمىز بولاشاقتا ءوزىنىڭ تۇلعالىق كەلبەتى ايشىقتالعان, تابىستى ءارى نامىستى ازامات بولىپ قالىپتاسۋى ءۇشىن وسى كۇندەرى دۇرىس باعىت-باعدار كورسەتۋىمىز وتە ورىندى دەپ سانايمىن. سەبەبى, ەرتەڭ جەتىستىككە جەتكەن كەز-كەلگەن كاسىپكەردىڭ بولدىم-تولدىم دەپ اسىپ-تاسىماي, سالاماتتى ءومىر سالتىن ۇستاناتىن ازاماتقا اينالۋى ءۇشىن بۇگىنگى ءدارىسىمىزدىڭ بەرەرى مول بولاتىندىعىنا سەنەمىن», دەيدى ە.جايىقباەۆ.

مەملەكەتتىك قىزمەتتەگى ۇزاق جىلدىق تاجىريبەسى مەن كاسىپكەرلىك سالاداعى ۇتىمدى ادىستەرىن, ادامنىڭ ءوزىن-ءوزى جەتىلدىرۋىندەگى كۇندەلىكتى ماشىق, قاعيدالارعا قاتىستى پسيحولوگيالىق كەڭەستەرىمەن بولىسكەن ە.جايىقباەۆ بۇگىندە بەلسەندى قوعام مۇشەلەرىنىڭ ءبىرى جانە سپورتتى سەرىك ەتكەن تابىستى كاسىپكەر.

«ۋنيۆەرسيتەت جاستارىنىڭ ەرتەڭگە دەگەن سەنىمىن نىعايتىپ, سالاماتتى ءومىر سالتىن بەرىك ۇستاناتىن جانداردىڭ قاتارىنان تابىلۋى ءۇشىن ولارعا ترەنەر-ۇستاز رەتىندە بۇگىنگى قوعامنىڭ تابىستى وكىلدەرىن شاقىرىپ, وسىلايشا ءدارىس وقۋىن تۇراقتى تۇردە ۇيىمداستىرۋدامىز. كوكىرەگى وياۋ, كوزى اشىق, كاسىپكەرلىككە ىنتاسى زور جانە دەنساۋلىعى مىعىم جاستار لەگىن قالىپتاستىرۋ ءبىزدىڭ تۇپكى ماقساتىمىز بولىپ تابىلادى», دەيدى اتالمىش الاڭداعى «Business innovation» سەكتسياسىنىڭ كەڭەسشىسى ساۋلە شىنتاەۆا.

ال دارىستەن العان اسەرىمەن بولىسكەن ستۋدەنت توميريس بايتەنوۆا بولسا, لەكتسيا-ترەنينگتىڭ پسيحولوگيالىق تۇرعىدا وتە قىزىقتى وتكەندىگىن ايتادى.

ء«وزىم پسيحولوگ ماماندىعىنىڭ قىر-سىرىن مەڭگەرىپ جۇرگەندىكتەن, بولاشاقتا كاسىبي مامان رەتىندە قالىپتاسۋىما جانە قىزمەتتىك وتىلىمدەگى ناقتى ماقساتتاردى ايقىنداۋىما زور ىقپالىن تيگىزدى. ەڭبەك سۇيگىشتىك قاسيەت پەن بىلىمگە قۇشتارلىعىمدى وياتۋمەن قاتار, سپورتتى سۇيۋىمە سەبەپكەر بولدى», دەيدى ول.

ايتا كەتەيىك, «Startup Univer» بيزنەس-ينكۋباتورى الاڭىندا «Startup Academy» IT-لابوراتورياسى, «Innovative Business» كونسالتينگ ورتالىعى, «اrt Amanat» شىعارماشىلىق ستۋدياسى, «ادىلەت» ستۋدەنتتىك زاڭ كلينيكاسى, «Ψ-factor» پسيحولوگيالىق قىزمەتى, «EXPO Travel» تۋريستىك بيۋروسى جانە «Turan Speaking» ءتىل ورتالىعى سىندى يننوۆاتسيالىق كاسىپكەرلىك قىزمەتتەر جۇمىس ىستەيدى. بۇل استاناداعى جوعارى وقۋ ورىندارى اراسىندا العاش رەت ىسكە قوسىلعان بيزنەس-ينكۋباتور الاڭى بولىپ تابىلادى.

نۇرلىبەك دوسىباي, «ەگەمەن قازاقستان»