يلون ماسك الەمنىڭ كەز كەلگەن جەرىنە جارتى ساعاتتا جەتۋدىڭ جولىن ۇسىندى

SpaceX كومپانياسىنىڭ نەگىزىن قالاۋشى يلون ماسك ادەلايدا قالاسىندا (اۆستراليا) ءوتىپ جاتقان حالىقارالىق استروناۆتيكالىق كونگرەستە جەر بەتىندەگى ءبىر-بىرىنەن شالعايدا جاتقان قالالار اراسىندا ۇلكەن جىلدامدىقتا قاتىنايتىن كولىك جۇيەسىنىڭ كونتسەپتسياسىن تانىستىردى. ول ونى قايتا ورالاتىن زىمىراندار مەن عارىش كەمەلەرىنىڭ كومەگىمەن جۇزەگە اسىرعىسى كەلەدى. مۇنداي كولىك رەتىندە ول مارسقا ۇشۋعا ارنالعان BFR (Big Falcon Rocket – ۇلكەن سۇڭقار زىمىران) زىمىرانىن ۇسىنىپ وتىر.

ماسك كورسەتكەن ۆيدەو-پرەزەنتاتسيادا جولاۋشىعا تولى زىمىراننىڭ نيۋ-يوركتان شانحايعا 39 مينۋتتا, گونكونگتان سينگاپۋرگە 22 مينۋتتا, لوس اندجەلەستەن تورونتاعا 24 مينۋتتا, لوندوننان نيۋ-يورككە 29 مينۋتتا جەتە الاتىندىعى كورسەتىلگەن. الىس قاشىقتىقتى وسىنشالىقتى از ۋاقىتتا ءجۇرىپ ءوتۋ ءۇشىن زىمىراندار ساعاتىنا 27 000 شاقىرىمعا دەيىنگى جىلدامدىقپەن قوزعالماق.

قازىرگى تاڭدا جولاۋشى ۇشاعى نيۋ-يورك پەن لوندون اراسىندا 8 ساعات (5 540 شاقىرىم), شانحاي مەن نيۋ-يورك اراسىندا 15 ساعات 30 مينۋت (11 857 شاقىرىم) ۇشادى.

يلون ماسكتىڭ جوباسى ءساتتى جۇزەگە اسسا جولاۋشى تاسىمالىندا رەۆوليۋتسيالىق جاڭالىق بولماق.

ءبىر قىزىعى, ماسك زىمىرانمەن ۇشۋ قۇنى كادىمگى ۇشاقتىڭ ەكونوم ساناتىنىڭ بيلەتىنەن قىمبات بولمايدى دەيدى.

سونداي-اق, ماسك SpaceX كومپانياسى 2022 جىلعا دەيىن مارسقا كەمى ەكى جۇك كەمەسىن جىبەرەتىنىن ايتتى. ەكى جىلدان سوڭ, ياعني 2024 جىلى قىزىل عالامشارعا العاشقى ادامدار بارماق. ولار مارستا ۇزاق مەرزىمدە قالۋعا مۇمكىندىك بەرەتىن بازا سالماق.

 

Supporting the creation of a permanent, self-sustaining human presence on Mars. https://t.co/kCtBLPbSg8 pic.twitter.com/ra6hKsrOcG

— SpaceX (@SpaceX) 29 سەنتيابريا 2017 گ.

 

BFR زىمىرانى عارىش كەمەلەرىن حالىقارالىق عارىش ستانتسياسىنا جانە جەر سەرىگى ايعا دا جەتكىزە الاتىن قابىلەتكە يە بولماق. 

 

BFR is capable of transporting satellites to orbit, crew and cargo to the @Space_Station and completing missions to the Moon and Mars. pic.twitter.com/p9staho4VZ

— SpaceX (@SpaceX) 29 سەنتيابريا 2017 گ.

BBC ءتىلشىسى دجوناتان اموستىڭ ويىنشا, BFR سالماعى ءالى دە بولسا اۋىر بولعانىمەن, سىرتقى ولشەمدەرى ازداپ كىشىرەيگەن. ناقتىراق ايتقاندا, بيىكتىگى 106 مەتر دە, ەنى نەمەسە قالىڭدىعى 9 مەتر.

زىمىراننىڭ الدىڭعى نۇسقامەن نەگىزگى ايىرماشىلىعى ونىڭ قۇنىندا.

ء"بىز جوبانى قالاي قارجىلاندىرۋدىڭ جولىن تاپقان سەكىلدىمىز. بۇل وتە ماڭىزدى", دەيدى يلون ماسك.    

قاراجات ماسەلەسىن شەشۋ ءۇشىن امەريكالىق ينجەنەر كومپانيانىڭ بۇكىل نازارىن ءبىر جۇيەنى دامىتۋعا باعىتتاپ, كەيىن سول جۇيە ارقىلى كليەنتتەردىڭ بارلىق سۇرانىستارىن قاناعاتتاندىرۋدى ويلاپ وتىر. ماسكتىڭ ايتپاعى جەر بەتىندەگى ساپارعا دا, اي مەن مارسقا ۇشۋعا دا ءبىر زىمىران مەن ءبىر كەمە جاساۋ دەپ تۇسىنۋگە دە بولادى.