اقتوبەدە دزيۋدودان قازاقستان رەسپۋبليكاسىنىڭ پرەزيدەنتى كۋبوگىنا ارنالعان ەرلەر اراسىنداعى حالىقارالىق تۋرنير ءوتتى.
ەلىمىزدە تۇڭعىش رەت ۇيىمداستىرىلىپ وتىرعان پرەزيدەنت كۋبوگىنا 9 مەملەكەتتەن 10 كوماندا قاتىستى. اتاپ ايتقاندا, قازاقستان, وزبەكستان, قىرعىزستان, ءازىربايجان, گرۋزيا, موڭعوليا, رەسەي, ۋكراينا, وڭتۇستىك كورەيا, بەلورۋسيا جانە اقتوبە وبلىسىنىڭ قۇراما كومانداسى ءوزارا مىقتىنى انىقتادى.
اقتوبە قالاسىندا رەسپۋبليكالىق «تۋعان جەر» فورۋمى اياسىندا وتكىزىلگەن قر پرەزيدەنت كۋبوگىنا ارنالعان حالىقارالىق ءتۋرنيردىڭ اشىلۋ سالتاناتىنا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا مەن اقتوبە وبلىسىنىڭ اكىمى بەردىبەك ساپارباەۆ قاتىسىپ, سپورتشىلارعا ساتتىلىك تىلەگەن بولاتىن. سونداي-اق, بيىل تۇڭعىش رەت ۇيىمداستىرىلىپ وتىرعان پرەزيدەنت كۋبوگىندا وليمپيادا چەمپيوندارى جاقسىلىق ۇشكەمپىروۆ, يۋري مەلنيچەنكو, ەرماحان يبرايموۆ, باقتيار ارتاەۆ,سىندى سپورت تارلاندارى قۇرمەتتى قوناق بولدى.
جارىس ناتيجەسى بويىنشا قازاقستان رەسپۋبليكاسى پرەزيدەنتى كۋبوگىنا قازاقستان قۇراماسىنىڭ سپورتشىلارى يە بولدى. قازاقستان قۇراماسىنان, بۇگىن ەل نامىسىن عۇمار قىرعىزباەۆ (66 كگ), ەلدوس جۇماحانوۆ (66 كگ), جانساي سماعۇلوۆ (73 كگ), قاجىمۇقان وتەۋليەۆ (81 كگ), سۇڭعات زاكارياەۆ (90 كگ), يسلام بوزباەۆ (90 كگ), ەرجان شىنكەەۆ (+100 كگ) ابىرويمەن قورعادى. ولار فينالدىق كەزدەسۋدە وڭتۇستىك كورەيا سپورتشىلارىن 4:1 ەسەبىمەن جەڭىپ, ءتۋرنيردىڭ العاشقى جەڭىمپازى اتاندى. قولا مەدال ءۇشىن كۇرەستە گرۋزيا مەن بەلورۋسيا قۇراما كومانداسىنىڭ سپورتشىلارى اراسىنداعى تاتامي تارتىسىندا گرۋزيالىق دزيۋدوشىلار باسىم ءتۇسىپ, ءتۋرنيردىڭ قولا جۇلدەسىنە قول جەتكىزدى.
2017 جىلى ۇيىمداستىرىلعان دزيۋدودان قازاقستان رەسپۋبليكاسىنىڭ پرەزيدەنتى كۋبوگىنا ارنالعان حالىقارالىق تۋرنيردە جەڭىمپاز بەن جۇلدەگەرلەرگە قارجىلاي سىياقىلار تابىستالدى. نازارلارىڭىزعا جارىس قورىتىندىسىن ۇسىنامىز:
1 ورىن – قازاقستان قۇراماسى (4 000 000 تگ)
2 ورىن – وڭتۇستىك كورەيا (2 700 000 تگ)
3 ورىن – گرۋزيا (1 700 000 تگ)
"Qazsport" تەلەارناسى بيىل العاش رەت ۇيىمداستىرىلعان قر پرەزيدەنتى كۋبوگىنا ارنالعان حالىقارالىق ءتۋرنيردى 3 قازان كۇنى كورسەتەدى.