مىنا ءبىر وقيعا شەتەلدىك باسىلىمداردا كوپ جازىلدى جانە كۋا بولعان ادامدار ءالى كۇنگە دەيىن ۇمىتپاي ايتىپ ءجۇر. سوعان قاراعاندا, شىنىندا دا ادامداردىڭ كوكەيىندە تەرەڭ قوناقتاعان بولسا كەرەك.
سونىمەن... وقيعانى ءبىر-بىرلەپ بايانداساق ءبىرشاما جىلدىڭ الدىندا اقش-تىڭ سيەتل قالاسىندا ىزگى نيەت ويىندارى ءوتىپ جاتادى. ءدۇبىرلى دوداعا دۇنيەجۇزىنىڭ كوپتەگەن مەملەكەتىنەن مىڭداعان جارىمجان, مۇگەدەك سپورتشىلار دا كەلىپ قاتىسادى.
الەم تاريحىندا ەكىنشى رەت وتكىزىلىپ وتىرعان اتالمىش ويىن 20 شىلدە كۇنى باستالىپ, 5 تامىزدا جالاۋىن تۇسىرگەنىن بىلەمىز. وعان دۇنيە ءجۇزىنىڭ 54 ەلىنەن 2600-گە تارتا سپورتشى قاتىسىپ, سپورتتىڭ 21 ءتۇرى بويىنشا جەڭىمپازدار مەن جۇلدەگەرلەردى انىقتادى. مۇنداعى ىزگى نيەت ويىنىنىڭ تاعى ءبىر ەرەكشەلىگى – مۋزىكالىق فەستيۆالدار, بەيبىتشىلىكتى ناسيحاتتايتىن كورمە, كونفەرەنتسيالار قوسا ۇيىمداستىرىلعان.
سودان كەزەگى كەلگەندە 100 مەتر قاشىقتىققا جۇگىرەتىن توعىز جەلاياق جارىس جولىنا شىعادى. بۇلاردىڭ بارلىعى جارىمجان-مۇگەدەك. اياقتارىنا جاساندى قۇرال وتىرعىزىلعان... جارىس سىزىعىنا جايعاسقان جىگىتتەر تورەشىنىڭ «باستا» دەگەن بەلگىسى بەرىلگەن ساتتە, تەمىر اياقتارىن تارسىلداتىپ تۇرا جۇگىرەدى. زىمىراپ كەلەدى دەسەك ارتىقتاۋ بولار, شامالارىنشا شاپشاڭدىعىن قوسىپ, شاپقىلايدى.
جارىسقا قاتىسۋشىلار جولدىڭ جارتىسىن جۇگىرىپ ءوتىپ, ەپتەپ ەكپىن الا باستاعان تۇستا, ارتقى جاقتان شار ەتكەن داۋىس شىعادى. جانۇشىرا شىرىلداعان ۇنگە ەلەڭ ەتىپ, الداعىلار ەرىكسىز ارتىنا بۇرىلىپ قاراسا, ءبىر اياعى تايىپ قۇلاپ جاتىر. كوزىندە وكىنىشتىڭ وتى ۇشقىندايدى. قاتارىنان قالىپ بارادى. تاعدىردىڭ سالعان قيىندىعى از بولعانداي, ادام قاتارلى اياعىن باسىپ, ايتۋلى دوداعا قاتىستىم-اۋ دەگەندە, جارتى جولدا ءسۇرىنىپ كەتكەنىن قارامايسىز با. نەتكەن وكىنىش! ەڭكىلدەسىن كەپ.
تايىپ جىعىلىپ, زار جىلاپ جاتقان بەيباقتى مۇڭداستارى باسەكەلەستەرى تاستاپ كەتپەدى. ءبارى ءبىر ءسات توقتاپ, اينالىپ ارتىنا قارادى. تەمىر اياقتارىن تارسىلداتىپ, مارەگە قاراي ەمەس, ارتقا قاراي شاپتى. بارلىعى جابىلىپ كەلىپ جىعىلعان جۇيرىكتى قولىنان تارتىپ تىك تۇرعىزدى. كوزىنىڭ جاسىن ءسۇرتىپ جۇباتتى. باسىنان سيپاپ بايىرقالادى. توپتاسىپ تۇرىپ, يىق تىرەستىردى. ءبىرىن-ءبىرى سۇيەمەلدەي قولتىقتاسىپ, قاز-قاتار تىزىلگەن توعىز جۇيرىك جۇپ جازباي جۇگىرگەن كۇيى مارە سىزىعىن بىردەي كەسىپ ءوتتى.
مۇندايدا جارىس ءتارتىبى بۇزىلدى دەپ, بۇرقىلدايتىن تورەشىلەردە ءۇن جوق. سوناۋ ءتورت قاپتالدا ءيىن تىرەسىپ, قايقى ورىندىقتاردا قاسقايىپ, جارىستى تاماشالاپ وتىرعان ءجۇز مىڭ كورەرمەن ءبىر ءسات تىك تۇرىپ, توعىز جەلاياقتىڭ ىزگى نيەتىنە ۇزاق قول سوقتى.
بەكەن قايرات ۇلى, «ەگەمەن قازاقستان»