باسەكەگە قابىلەتتىلىك بىلىممەن انىقتالادى

مەملەكەت باسشىسى نۇرسۇلتان نازارباەۆتىڭ 2016 جىلعى اقپان ايىندا ورتالىق اتقارۋشى ورگاندار باسشىلارىنىڭ, اكىمدەردىڭ, ۇلتتىق جوعارى وقۋ ورىندارىنىڭ حالىق الدىنداعى اشىقتىعىن, جاۋاپتىلىعىن, ەسەپتىلىگىن ارتتىرۋ ماقساتىندا قول قويعان جارلىعىنا سايكەس ءوتىپ وتىرعان اتالمىش ەسەپ بەرۋ جيىنىنا الماتى قالاسى اكىمدىگى مەن ءماسليحاتىنىڭ, مەدەۋ اۋدانىنىڭ جوعارى وقۋ ورىندارى مەن ءبىلىم بەرۋ مەكەمەلەرىنىڭ باسشىلارى, قر ۇعا مۇشەلەرى, عىلىمي قاۋىم, جۇمىس بەرۋشىلەر مەن ۋنيۆەرسيتەت تۇلەكتەرى, شەتەل كونسۋلدىقتارى مەن كومپانيالارىنىڭ وكىلدەرى, ءبىلىم الۋشىلار مەن ولاردىڭ اتا-انالارى قاتىستى.

وتاندىق پەداگوگيكالىق عىلىم مەن مادەنيەتتىڭ قارا شاڭىراعى سانالاتىن,  كەلەسى جىلى 90 جىلدىق مەرەيتويىن ۋنيۆەرسيتەت دەڭگەيىندە عانا ەمەس, رەسپۋبليكا دەڭگەيىندە اتاپ وتكەلى وتىرعان, ءوز تاريحىندا 250 مىڭنان استام تۇلەك ۇشىرعان قازۇپۋ-دا بۇگىنگى تاڭدا 7 مىڭعا جۋىق ستۋدەنت ءبىلىم الىپ جاتقانىن ايتا كەتكەن ءجون. 2017 جىلى العاش رەت الەم ۋنيۆەرسيتەتتەرىنىڭ توپ-500 قاتارىنا جانە QS World University Ranking رەيتينگىندە الەمنىڭ ۇزدىك 491 ۋنيۆەرسيتەتىنىڭ قاتارىنا ەنگەن, ۇلتتىق رەيتينگتەر بويىنشا پەداگوگيكالىق جوعارى وقۋ ورىندارى اراسىندا الدىڭعى ورىندى يەلەنىپ كەلە جاتقان اباي اتىنداعى قازۇپۋ ەلىمىزدە پەداگوگيكالىق كادرلار دايىنداۋدا وقۋ-ادىستەمەلىك جانە عىلىمي-ادىستەمەلىك قامتاماسىز ەتۋ ورتالىعى بولىپ تابىلادى.          پەداگوگيكا عىلىمدارىنىڭ دوكتورى, پروفەسسور تاكير وسپان ۇلى ءوزى باسقارىپ وتىرعان ىرگەلى وقۋ ورداسىنىڭ ءبىر جىل ىشىندە قول جەتكىزگەن جەتىستىكتەرى جايلى ايتا كەلە: «ەلباسىمىز ءوزىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا «ەڭ الدىمەن, ءبىلىم بەرۋ جۇيەسىنىڭ ءرولى وزگەرۋگە ءتيىس. ءبىزدىڭ مىندەتىمىز – ءبىلىم بەرۋدى ەكونوميكالىق ءوسۋدىڭ جاڭا مودەلىنىڭ وراتلىق بۋىنىنا اينالدىرۋ. وقىتۋ باعدارلامالارىن ءبىلىم الۋشىلاردىڭ سىني ويلاۋ قابىلەتىن جانە ءوز بەتىمەن ىزدەنۋ داعدىلارىن دامىتۋعا باعىتتاۋ قاجەت, IT-ءبىلىمدى, قارجىلىق ساۋاتتىلىقتى قالىپتاستىرۋعا, ۇلتجاندىلىقتى دامىتۋعا باسا كوڭىل ءبولۋ كەرەك» دەگەن ەدى. ۇلتتىڭ باسەكەگە قابىلەتتىلىگى ەڭ الدىمەن ونىڭ بىلىمىمەن انىقتالادى. دەمەك, پەداگوگ مامانداردى دايىنداۋدا ساپالى جاڭا ءۇردىس قاجەت», – دەدى.

رەسپۋبليكا كولەمىندە پەداگوگ مامانداردى قالىپتاستىرۋ باعىتىندا اۋقىمدى جۇمىستار اتقارىپ وتىرعان ءبىلىم ورداسى ساپالى كادرلار دايارلاۋ ءۇشىن تاباندىلىقپەن ەڭبەك ەتە بەرەتىنىن, وعان ۋنيۆەرسيتەت عالىم-پەداگوگتارىنىڭ مۇمكىندىگى تولىق جەتەتىنىن نىق سەنىممەن ايتقان قازۇپۋ باسشىسى جالپى سانى 883 ادامدى قۇرايتىن پروفەسسور-وقىتۋشىلاردىڭ ىشىندە 157 عىلىم دوكتورى, پروفەسسور, 369 عىلىم كانديداتىنان وزگە, 14 قر ۇعا اكادەميگى مەن كوررەسپوندەنت-مۇشەسى, باسقا دا قوعامدىق اكادەميالاردىڭ 45 اكادەميگى, شىعارماشىلىق وداقتاردىڭ 19 مۇشەسى, 6 ەڭبەك سىڭىرگەن جاتتىقتىرۋشى, 12 سپورت شەبەرى جۇمىس ىستەيتىنىن اتاپ ءوتتى. 

الەمدىك ءبىلىم بەرۋ كەڭىستىگىندەگى قازاقستاندىق ءبىلىمنىڭ مارتەبەسىن نىعايتۋ ماقساتىندا ۋنيۆەرسيتەت قابىرعاسىندا جىل باسىنان بەرى الىس جانە جاقىن شەتەلدەن كەلگەن 75 عالىم ءدارىس وقىپ,  شەبەرلىك-سىنىپتارىن وتكىزۋمەن بىرگە, «سوربوننا–كازاحستان» ينستيتۋتى جانە قازۇپۋ-دىڭ پروفەسسور-وقىتۋشىلار قۇرامىنداعى 23 وقىتۋشى پاريج قالاسىنداعى سوربوننا ۋنيۆەرسيتەتىندە بىلىكتىلىكتەرىن ارتتىرىپ قايتقان.

تاعى ءبىر ايتا كەتەرلىگى, بيىلدان باستاپ ەلىمىزدەگى ەڭ وزەكتى ماسەلەلەردىڭ ءبىرى سانالاتىن لاتىن الىپبيىنە كوشۋ ەكەنىن, سونىمەن قاتار,  مەكتەپ جانە جوو وقۋلىقتارىنىڭ باسىم كوپشىلىگىنىڭ اۆتورلارى اتالمىش وقۋ ورنىنىڭ پروفەسسورلارى ەكەنىن ەسكەرسەك, رەكتور ۋنيۆەرسيتەت عالىمدارىنىڭ الدىندا تۇرعان باستى مىندەتتەردىڭ ءبىرى – ورتا مەكتەپ وقۋلىقتارىنىڭ جاڭا قۇرىلىمى مەن مازمۇنىن انىقتاۋ ءۇشىن وڭتۇستىك كورەيا, جاپونيا, سينگاپۋر, فينليانديا سياقتى الەمنىڭ ۇزدىك ءبىلىم بەرۋ جۇيەلەرى مەن جەتەكشى باسپالارىنىڭ تاجىريبەسى مەن وقۋلىقتارىنا تالداۋ جاساۋدى ىسكە اسىرۋ ەكەنىن جەتكىزدى.

جينالعان قاۋىمعا ۋنيۆەرسيتەت جايىندا كوپتەگەن تىڭ ماعلۇماتتاردى تانىستىرىپ وتكەن تاكير وسپان ۇلى كەزدەسۋ سوڭىندا ستۋدەنتتەردى, اتا-انالاردى تولعاندىرعان ساۋالدارعا جاۋاپ بەردى.  

ميرا بايبەك,

«ەگەمەن قازاقستان»

الماتى