اسفەنديار سۇلتان – كىشى ءجۇز حانى ابىلقايىردىڭ شوبەرەسى, ايشۋاق حاننىڭ نەمەرەسى, كىشى ءجۇز جەتىرۋداعى تابىن رۋىن باسقارعان, ديستانتسيا باستىعى بولعان بەلگىلى تۇلعا. ونىڭ ۇلدارى – مۇحاممەد ماعزۇم نەپليۋەۆ كادەت كورپۋسىن, سەيىتجاپپار ورىنبور قالاسىنداعى قازاق سۇلتاندارىنىڭ بالالارىن ورىس ساۋاتىنا ۇيرەتۋ ءۇشىن ارنايى ۇيىمداستىرىلعان مەكتەپتى بىتىرگەن. ال سەيىتجاپپاردىڭ ۇلى سانجار اسفەندياروۆتىڭ قازىرگى قازاقستاننىڭ جوعارى ءبىلىم سالاسىن, تاريح عىلىمىن, بىلىكتى مەديتسينا قىزمەتكەرلەرىن دايارلاۋ جۇيەسىن قالىپتاستىرۋداعى ۇشان-تەڭىز ەڭبەگىن كوپشىلىك جاقسى بىلەدى.
اسفەنديار سۇلتاننىڭ قۇلپىتاسى 2014 جىلى اقساي قالاسىنىڭ تۇرعىندارى اعاجاي مەڭدىحانوۆ پەن زارلىق ءمۋسيننىڭ كورسەتۋىمەن انىقتالعان بولاتىن. اراب جازۋىمەن جازىلعان ماتىندە «كىشى ءجۇز حالقىنىڭ حان ءناسىلى اسفەنديار سۇگالى بالاسى 1865 جىلى 73 جاسىندا قايتىس بولدى. ناۋرىز ايىنىڭ 21-ءى, دۇيسەنبى كۇنى جەرلەندى» دەپ جازىلعان. وعان قوسا سۇلتاننىڭ شىڭعىس حانعا دەيىن تاراتاتىن شەجىرەسى قاشالعان ەكەن.
اسفەنديار سۇلتاننىڭ قۇلپىتاسى – قاراكەمەردەگى ۇلكەن كونە زيراتتا قۇلاماي ساقتالىپ قالعان جالعىز ەسكەرتكىش. جالپى ءبورلى وڭىرىندە 1930 جىلدارى بولشەۆيكتەر قازاق مولالارىنداعى اراب جازۋلى قۇلپىتاستاردى جاپپاي قيراتىپ, قۇرىلىس ماتەريالىنا پايدالانعان. سوندىقتان اسفەنديار سۇلتاننىڭ قۇلپىتاسى ساقتالۋى وسىدان بىرنەشە جىل بۇرىن سەنساتسيالىق وقيعا رەتىندە قابىلدانعان بولاتىن.
ەلباسىمىزدىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنان باستاۋ العان قۇلشىنىسپەن وسىدان ءبىراز ۋاقىت بۇرىن ءبورلى اۋدانىنىڭ جاستارى «تۋعان جەرگە تاعزىم» اتتى شتاب قۇرعان بولاتىن. توپ مۇشەلەرى اۋداننىڭ تاريحي مۇيىستەرىن ارالاپ, قاريالارمەن كەزدەسىپ, ءوڭىر تاريحىنىڭ شەجىرەسىن جيناۋعا كىرىسكەن. مىنە, بۇگىن سول بەلسەندى جاستاردىڭ باستاماشىلدىعىمەن تاريحي تۇلعانىڭ قابىرى قورشالىپ, جاڭا بەلگى ورناتىلدى. توپ جەتەكشىسى اينا كارىموۆانىڭ ايتۋىنشا, بۇل ىسكە اۋىل تۇرعىندارى, سونىڭ ىشىندە اعاجاي مەڭدىحانوۆ, عاريفوللا سەيدەش ۇلى سەكىلدى اقساقالدار كوپ ۇلەس قوسقان.
قازبەك قۇتتىمۇرات ۇلى, «ەگەمەن قازاقستان»