ەرىم دەيتىن ەل بولماسا, ەلىم دەيتىن ەر قايدان بولسىن. بۇل قاعيدانى قازتۇتىنۋوداعى قاراعاندى ەكونوميكالىق ۋنيۆەرسيتەتى ارقاشان ۇران ەتىپ كەلەدى. جاقسىمەن وتكىزگەن جارتى ساعاتتىڭ ءوزى جانعا شۋاق سىيلايتىنىن رەكتور ەرقارا ايماعامبەتوۆ ەرەكشە ەسكەرەدى. تاياۋدا بىلىكتى باسشى ۋنيۆەرسيتەتتىڭ ءبىرىنشى كۋرس ستۋدەنتتەرىن اتاقتى سپورتشىلارمەن كەزدەستىردى. ستۋدەنتتەر مادەنيەت سارايىندا «تاۋەلسىز ەلىمنىڭ تۋىن جەلبىرەتكەن چەمپيوندار» دەگەن اتاۋمەن وتكەن كونتسەرتكە سول «جۇلدىزدى» توپ قوناققا كەلدى.
– بيىلعى ءبىزدىڭ ماگيسترانتتار قاتارىندا ديدار قاميەۆ, قامشىبەك قونقاباەۆ, ۆاسيلي لەۆيت جانە باقتيار ارتاەۆ سىندى اتاقتى ازاماتتار بار. بۇگىن ولار 1-كۋرس ستۋدەنتتەرىمەن كەزدەسۋگە كەلدى. ءبىزدىڭ ۋنيۆەرسيتەت جىل سايىن وسىنداي مەرەكەلىك شارالار ۇيىمداستىرىپ وتىرادى, دەيدى وسى وقۋ اراسىنداعى قوعاممەن بايلانىس بويىنشا باس مامان لەيلا يۆاديلينوۆا.
«جۇلدىزدى» ماگيسترانتتاردان باسقا كەزدەسۋگە ەسىمدەرى ەلگە ەلەۋلى تۇلعالار كەلدى. ولاردىڭ كەيبىرى قەۋ-ءدىڭ تۇلەگى بولسا, كەيبىرى ءالى دە ۋنيۆەرسيتەتتە جوعارعى ءبىلىم الىپ جاتىر. قوناقتار قاتارىندا وليمپيادا چەمپيونى, قر پارلامەنت ءماجىلىسىنىڭ دەپۋتاتى سەرىك ساپيەۆ, بوكستان ۇلتتىق قۇرامانىڭ باس باپكەرى مىرزاعالي ايتجانوۆ, الەم كۋبوگىنىڭ كۇمىس جۇلدەگەرى, ەۋروپا چەمپيونى سەرىك نۇرقازوۆ, وليمپيادا ويىندارىنىڭ قولا جۇلدەگەرى سەرىك ەلەۋوۆ بيزنەسمەن, ەرلان نىعماتۋلين بار. ءبىرىنشى كۋرس ستۋدەنتتەرىمەن ازيا چەمپيوناتىنىڭ كۇمىس جۇلدەگەرى, الەم چەمپيوناتىنىڭ قولا جۇلدەگەرى ابىلايحان ءجۇسىپوۆ تە كەزدەستى. ول وسى جوو-نىڭ 4-ءشى كۋرس ستۋدەنتى.
– بيىلعى جىلى مەن قەۋ-ءنىڭ ماگيس-تراتۋراسىنا «كەدەندىك ءىس» ماماندىعى بويىنشا ءتۇستىم. بۇل وقۋ ورداسىن بەكەردەن تاڭداعان جوقپىن – مۇندا ءاردايىم سپورتشىلارعا قولداۋ كورسەتىلەتىنىن بىلەمىن. ءبىرىنشى كۋرس ستۋدەنتتەرىنە ءىرى ماقسات پەن ساتتىلىك تىلەيمىن – اركىم ءوز ماماندىعىندا ۇزدىك بولسىن, – دەدى بوكس-تان قازاقستان قۇراماسىنىڭ مۇشەسى, 2017-ءشى جىلى گەرمانيادا وتكەن بوكس بويىنشا الەم چەمپيوناتىنىڭ كۇمىس جۇلدەگەرى قامشىبەك قونقاباەۆ.
ەستەرىڭىزگە سالا كەتەيىك, قەۋ ماگيستراتۋراسىنا «كەدەندىك قىزمەت» ماماندىعى بويىنشا وليمپيادا ويىندارىنىڭ يەگەرى ۆاسيلي لەۆيت ءتۇستى. سونىمەن قاتار, بۇل جوعارعى وقۋ ورنىندا وليمپيادا چەمپيونى باقتيار ارتاەۆ تا وقيتىن بولادى. ول «مەملەكەتتىك جانە جەرگىلىكتى باسقارۋ» ماماندىعىن تاڭداعان. ال اتاقتى ايتىسكەر ديدار قاميەۆ «قۇقىقتانۋ» بويىنشا ءبىلىمىن جەتىلدىرەدى.
ولاردىڭ بارلىعى مەملەكەتتىك ءبىلىم گرانتىن الىپ, تەگىن وقيدى.
ميراس اسان, «ەگەمەن قازاقستان»
قاراعاندى وبلىسى