پارلامەنت سەناتىنىڭ توراعاسى قاسىم-جومارت توقاەۆ 25-27 قىركۇيەكتە وزبەكستان رەسپۋبليكاسىندا رەسمي ساپاردا بولدى. ساپار بارىسىندا وزبەكستان رەسپۋبليكاسىنىڭ پرەزيدەنتى شاۆكات ميرزيەيوۆتىڭ قابىلداۋىندا بولدى جانە وزبەك پارلامەنتى قوس پالاتاسىنىڭ باسشىلارىمەن كەلىسسوز جۇرگىزدى, سەناتتىڭ ءباسپاسوز قىزمەتى.
وزبەكستان باسشىسىمەن كەزدەسۋ بارىسىندا ق.توقاەۆ ورتالىق ازياداعى جانە ودان سىرت جەرلەردە قاۋىپسىزدىك پەن تۇراقتىلىقتى قامتاماسىز ەتۋدە قازاقستان مەن وزبەكستان بايلانىستارىنىڭ ەرەكشە ءرولىن اتاپ ءوتتى.
سەنات توراعاسى قازاقستان مەن وزبەكستاننىڭ جان-جاقتى بايلانىستارىنىڭ قازىرگى دامۋ قارقىنىنا جوعارى باعا بەردى.
«قازاقستان پرەزيدەنتى ن.نازارباەۆتىڭ تاياۋداعى مەملەكەتتىك ساپارى اياسىندا قۇجاتتاردىڭ اۋقىمدى توپتاماسىنا قول قويىلدى, ەكىجاقتى قاتىناستاردىڭ جاڭا ساپالىق دەڭگەيى ايقىندالدى», - دەپ اتاپ ءوتتى سەنات باسشىسى. ق.توقاەۆ جوعارى دەڭگەيدەگى كەزدەسۋلەردىڭ ەكى ەل حالىقتارىنىڭ عاسىرلار بويعى دوستىعى مەن ىنتىماقتاستىعىن نىعايتا تۇسەتىنىن ايتتى. سەنات باسشىسى سول ەلدەگى قازاق ازاماتتاردىڭ رۋحاني مۇقتاجدارىنا لايىقتى نازار اۋدارىلىپ وتىرعانىنا ريزاشىلىق ءبىلدىردى. تەك قازاق تىلىندە ءبىلىم بەرەتىن 164 مەكتەپتىڭ بولۋى ونىڭ ناقتى كورسەتكىشى ەكەنى ايتىلدى.
ق.توقاەۆتىڭ پىكىرىنشە, ەكى ەل پارلامەنتشىلەرىنىڭ پرەزيدەنتتەردىڭ, اتاپ ايتقاندا, ارال ايدىنىنداعى سۋ رەسۋرستارىن بىرلەسە وتىرىپ ءتيىمدى پايدالانۋعا قاتىستى باستامالارىن ىسكە اسىرۋ بويىنشا جۇمىس ىستەۋ مۇمكىندىگى بار.
قازاقستان پارلامەنتى جوعارعى پالاتاسىنىڭ باسشىسى «قازاقستان-2050» جاڭعىرۋ ستراتەگياسىن, «100 ناقتى قادام» ۇلت جوسپارى مەن «رۋحاني جاڭعىرۋ» جانە قازاقستاندى تسيفرلاندىرۋ باعدارلامالارىن ىسكە اسىرۋ بارىسى تۋرالى ش.ميرزيوەۆتى حاباردار ەتتى.
قازاقستان سەناتىنىڭ باسشىسى وزبەكستان ولي ءماجىلىسى سەناتىنىڭ توراعاسى نيگماتيللا يۋلداشەۆپەن جانە ولي ءماجىلىسى زاڭناما پالاتاسىنىڭ توراعاسى نۋردينجون يسمويلوۆپەن دە كەزدەستى. پارلامەنتارالىق ۇنقاتىسۋدى دامىتۋ مەن زاڭ شىعارۋ جۇمىستارى سالاسىنداعى ىنتىماقتاستىق وزبەك ارىپتەستەرمەن كەزدەسۋ تاقىرىبى بولدى. ەكىجاقتى نەگىزدە دە, پارلامەنتارالىق ۇيىمدار اياسىندا دا پارلامەنتارالىق بايلانىستاردى ۇدەتۋ تۋرالى كەلىسىمدەرگە قول جەتكىزىلدى.