قازاقتىڭ كورنەكتى جازۋشىسى دۋلات يسابەكوۆتىڭ كوكنارشى ءمولداراسىل تۋرالى جازعان كوركەم دۇنيەسى بار. كۇنىنە ءبىر مارتە كوكنار ەزىپ ءىشىپ, سوسىن قالىڭ ۇيقىعا كەتىپ كايىپ بولمايىنشا باس سۇيەگى سىنىپ, دەنەسى قاقسايتىن كيەۆاننىڭ سوڭى سول ادەبي كەيىپكەرمەن بىتكەن جوق. وڭتۇستىكتىڭ كۇنگەي اۋداندارىنىڭ بىرىندە كىسىسى ءولىپ قارالى بولىپ جاتقان ءۇيدىڭ جانازاسىنان كەيىن بەرىلەتىن شايىندا كوكنار بولماسا بەتىن سيپاپ, ەتەگىن قاعىپ ورنىنان تۇرىپ كەتەتىن شالدار ءالى دە بار.
وسىنداي جاعدايدا كوكنار, قاراسورا ناعىز تابىس كوزى. جاقىندا ماقتاارال اۋدانىندا جۇمىسى جوق ءبىر ازامات جەڭىل پايدا تابامىن دەپ قۇرىققا ءتۇستى.
ءبىر ازاماتتىڭ قاراسورا ەگەتىندىگى جونىندە اقپار العان ماقتاارال ءاىىب قىزمەتكەرلەرى كۇدىكتىنىڭ ۇيىنە كەلەدى. سىرت كوزگە ىلىك ىزدەيتىندەي دۇنيە جوق. اۋلادا قولداعى مالدىڭ قىستايعى ازىعى – ءبىر مايا ءشوپ جينالعان. پوليتسيا قىزمەتكەرلەرى مايانى اشىپ قاراسا, اراسىنا سورا ەگىلگەن ەكەن. سونىمەن, پوليتسيا قىزمەتكەرلەرى زاتتاي دالەل رەتىندە جالپى سالماعى 1,5 كيلو بولاتىن 6 ءتۇپ سورا جانە 130 گر كەپتىرىلگەن ماريحۋانا تاركىلەيدى. كۇدىكتىنىڭ ءۇيىن ءتىنتىپ شىققان ءتارتىپ ساقشىلارى قاعازعا ورالعان 15 گر بولاتىن ەسىرتكى زاتتارىن دا تاپتى.
وسىعان وراي ماقتاارال ءاىىب قىزمەتكەرلەرى قك 4-ءى بابى بويىنشا قىلمىستىق ءىس قوزعادى. زەرتحانالىق تەكسەرۋ تاعايىندالدى. كۇدىكتى قاماۋعا الىنىپ, سوتقا دەيىنگى تەرگەۋ امالدارى جالعاسىپ جاتىر.
سورا ەگەمىن دەپ سورماڭداي بولعان ازامات ەندى شەرمەندە كۇي كەشىپ وتىر.
باقتيار تايجان, «ەگەمەن قازاقستان»
وڭتۇستىك قازاقستان وبلىسى