رۋحاني اقپارات ءورىسىنىڭ ايناسىنان الدەقالاي شەتتەپ قالعان جاعدايدا كوركەم وي جاڭالىعىن وتكەرىپ الىپ, وكىنىشتە قالاتىن سياقتىسىڭ.
الىستاعى, سوناۋ جاستىق شاقتا اسكەري بورىشتى وتەپ قايتقان سوڭ باياعى ەلدىڭ اۋزىن باعاسىڭ. ەكى-ءۇش تۋىندىنى قويماستان ايتىپ, تاڭىرقاۋ ارالاس سۇيسىنىستەر بۇكىل ىقىلاس-پەيىلدى سول كىتاپتارعا اۋدارىپ, قولىڭا العانشا تاعاتىڭدى تاۋىسىپ بىتكەن ەدى. دەسى ءجۇرىپ تۇرعان انشىلەردىڭ قازىرگى زامانىنداي جازۋشىلاردىڭ جۇلدىزى ول ۋاقىتتا جوعارى. «اباي جولى» ەپوپەياسى تولىق جارىق كورگەن داۋىردە بالاسىڭ, بالا دا بولساڭ بالەسىڭ, حالىقتىڭ كوڭىل كۇيى كوتەرىلىپ, مەرەيى ۇستەم بولا تۇسكەنىن سەزەسىڭ. ءدال مۇنداي جاعداي ۇزىلمەي جالعاسىن تاۋىپ, ماڭگىگە ورنىققانداي كورىنگەن.ورتا مەكتەپتى بىتىرەردىڭ اياق شەنىنە تامان «قان مەن تەردىڭ» العاشقى تومدارى قولعا ءتيىپ, سونىڭ اسەرىنەن ءبىراز ۋاقىت ايىعا الماعانىمىز دا ەستە. قولىنا قالام ۇستاعاندار قۇدايدىڭ نازارىنا ەرەكشە تۇسكەن بولەكشە جاراتىلىس يەلەرىندەي قىزىعا دا قىزعانا قارايتىن قايران سول اۋسار شاق-اي.
شارتتىلىعى باسىم كەيبىر تۋىندىلاردا مىڭ-سان سۇراقتارعا جۇرەك قوزعايتىن جاۋاپ جوقتاي. سولاردى اۋىزدارىنان سۋى قۇرىپ ماقتاعان كوپشىلىك تالعامىندا دا اقاۋ بار ما, كەمشىلىكتەرى كورىنەۋ تۇرسا دا بايقاماعاندارى قالاي؟ «شۋىلداقتاردان» ايىرماڭ شامالى حالدە ۋاقىت شىركىندى ەلەۋسىز وتكەرىپ جىبەرىپ, سونداعى مازانى قاشىرعان جايلاردىڭ جاۋابىن كۇتپەگەن جەردەن كەزىكتىرگەنىڭە مەيلىڭ قايران قال, مەيلىڭ قايران قالما, دەر كەزىندە اڭعارا الماعان سورىڭ دا باياعى.
تالعام دەگەن جارىقتىقتى ۇنەمى جەتىلدىرىپ, رۋحاني تاجىريبەنى تولىقتىرۋ ۇستىندە ءوزىڭدى سەرگەك ۇستاماساڭ – بايقامپاز قاسيەتىڭ قالعىپ كەتەتىنى حاق ەكەن. اسكەر قاتارىندا ءجۇرىپ الدەقالاي قولىمىزعا تيگەن «ماحاببات, قىزىق مول جىلدار» رومانىن ءبىر دەممەن وقىپ شىعىپ, بولاشاق جارىڭدى جاستىق قۇلشىنىسپەن ارمانداعانىڭ بار ەمەس پە. ومىرگە وسىناۋ ۇستانىممەن ارالاسا باستاعان كەزدە سىنشى باقىت ساربالاەۆتىڭ سول كىتاپ تۋرالى جازعان پىكىرى جاڭساق تا ادىلەتسىز كورىنىپ ەدى. العاشقى اسەر ارقىلى اقي-تاقي تورەلىككە بارۋ قاۋىپتى-اۋ. وسى جاسقا دەيىن سابىر, ايال قىلماستان ايتىپ قالعان ويىڭ دۇمبىلەز, توقتامىڭ شالا-شارپى بولسا – بىرەۋدى كىنالاۋ ورىنسىز. ءۇمىت ەتكەن جاسىڭ ينەنىڭ كوزىنەن وتكەن پىسىق, يا ۇرما-پەرمە ەسەرسوق مىنەز يەسى بولسا – ۇياتى وزىڭە كەلەدى.تالانتتى تانۋ مەن باتاگوي ۇلكەندىك مادەنيەتىنىڭ قازىرگى قالىپتاسقان جاعدايىنا قاراساڭ – جىلاپ جىبەرۋدىڭ و جاعى مەن بۇ جاعىندا ەرىكسىز تۇراسىڭ. ءوزىڭ تۋرالى ءتاۋىر لەبىز جارعان كىسىڭ اكەڭ جاساماعان جاقسىلىقتى ءۇيىپ-توگىپ تاستاعانداي مىندەتسىنسە مەيلى عوي. شالىس باسىپ, جازاتايىم ءمۇلت كەتە قالساڭ – كەشىرىلمەس كۇناعا باتقانداي تەرىس باتاسىن بەرۋدەن تايىنبايدى. ادەبي ۇدەرىس ۇستىندە نە كورىپ, نە قىلماعان باس بۇل. «مەندەي جازۋشى قازاقتا ءالى تۋا قويعان جوق. ورالحان بوكەەۆتىڭ قاراسى كورىنىپ قالىپ ەدى, ورتا جولدا ول دا ءولىپ تىندى» دەگەن اقساقال جاسىنداعى كىسىنىڭ اجارىندا قىلايا قىمسىنۋدىڭ قىلداي بەلگىسى سەزىلىپ قويسا شە. وسىناۋ شالىقتى سوزدەردىڭ يەسى تەلەديداردا ءوزىن كىسىلىكتى دە كىشىك ۇستاپ, بيازى, بيپاز سويلەگەنىن كورگەندە سەنەر-سەنبەسىڭدى بىلمەي داعداراتىنىڭ بار.
كوركەم ويدىڭ الەمدىك قازىناسىنا قۇلاشتاپ بويلاپ, شەبەرلىك سيقىرىن جەتىك مەڭگەرگەن پەرزەنتتەرىمىز قاتارىنىڭ قاراسى مولداۋ. ولاردىڭ بويىنان الگىندەي ينەنىڭ جاسۋىنداي ماقتاننىڭ وسالدىعىن كورسەتپەيتىندەرىنە قايران قالاسىڭ. جازۋدىڭ ساتتىلىگى سپورتتىق جاتتىعۋدىڭ بەينەت سورىن بەلشەدەن كەشكەننەن كەيىن قايتالاناتىن قۇبىلىس قانا ەمەس. كەيىپكەرگە كەلۋ تۇرعىسىندا كەسەك مىنەزدى تاعدىر يەسى اۋەلى كوكەيگە قوناقتادى. ونىڭ كوركەم ەسەيۋ ۇدەرىسى ويدا ۇزبەي جالعاسقاننان كەيىن بارىپ قورىتىلۋى ءتيىس. ءسوز يەسىنىڭ بۇل جەردەگى قاناعات راقىمى ەسەپ ەمەس. وقۋشىنىڭ سىنشىل سۇزگىسىنەن ءوتىپ, قاداۋ-قاداۋ ولشەمدەر اقىرىندا تاعدىرشەشتى اقيقاتتان قۇرالادى. قازاقتىڭ رۋحاني احۋالىندا اقيقات ۇستانىمىنىڭ اسقاقتىعى قازىر ازداۋ. كەۋدەمسوق جىرىندى پىسىق قولتاڭبا اۋەزوۆ قۇبىلىسىنا بارابار باعالانعان جاعدايعا دۋشار بولعاننان كەيىن وسىنداي توقتامعا ەرىكسىز كەلەسىڭ. سوناۋ جاستىق شاقتا كوپشىلىك اسا جىلى قابىلداعان الگى ءۇش تۋىندىنىڭ شارتتىلىققا تولى شەشىمدەرىنە ساعات اشىمباەۆ كەزىندە ايانباي ءشۇيىلىپتى.
ساعات اشىمباەۆتىڭ سىلتەسە ءتىلىپ تۇسەتىن سىنشىلىق سەمسەر ءسوزى قازىر قازاققا اۋاداي قاجەت-اۋ.