اسىرەسە تامىز ايىندا اتىراۋدى جاعىمسىز ءيىس جايلادى. شىرىگەن جۇمىرتقانىڭ, ەندى بىردە جانارمايدىڭ ءيىسى مازالارىن العان قالا تۇرعىندارى قۇزىرلى ورگاندارعا ارىز دا جازعان ەدى.
ءتىپتى «اۋادا زياندى زاتتار جوق» دەپ جاۋىردى جابا توقىعىسى كەلگەن ەكولوگ مامانداردىڭ پىكىرىنە سەنبەگەن قوعامدىق بىرلەستىك وكىلدەرى اۋا قۇرامىن باقىلايتىن جەكە قۇرىلعى ساتىپ الۋ ءۇشىن حالىقتى قارجى جيناۋعا شاقىرعان. ماسەلەنىڭ ءمانىسى ەندى بەلگىلى بولدى. وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق ەكولوگيا دەپارتامەنتىنىڭ باسشىسى قابيجان قاپانوۆ جاعىمسىز ءيىس اتىراۋ مۇناي وڭدەۋ زاۋىتىنان تاراعانىن مالىمدەدى.
قالا تۇرعىندارى مەن تابيعات قورعاۋ پروكۋراتۋراسىنىڭ شاعىمى بويىنشا جۇرگىزىلگەن تەكسەرىس ەكى بىردەي زاڭبۇزۋشىلىقتى انىقتاعان. اتىراۋ مۇناي وڭدەۋ زاۋىتى كۇردەلى جوندەۋ كەزىندە قورشاعان ورتاعا اسەردى باعالاۋ جوباسىن جاساقتاماعان جانە اۋا-رايىنىڭ قولايسىز جاعدايىنا بايلانىستى تالاپتاردى ورىنداماپتى.
-ءبىرىنشى زاڭبۇزۋشىلىق بويىنشا زاۋىتقا 500 اەك مولشەرىندە ايىپپۇل سالىندى. قالا اۋماعىندا ورنالاسقاندىقتان اۋا-رايىنىڭ قولايسىز جاعدايىندا جۇمىس جۇكتەمەسىن ازايتۋلارى كەرەك ەدى. بىراق ولاي بولمادى. زاڭ بويىنشا ازىرگە ەسكەرتۋمەن شەكتەلىپ وتىرمىز, ەندى وسى تالاپ ورىندالماعان جاعدايدى زاۋىتتى سوتقا بەرۋگە ءماجبۇرمىز, - دەدى ق.قاپانوۆ.
باقىتگۇل باباش,
«ەگەمەن قازاقستان»
اتىراۋ