قورشاعان ورتانى كۇتىپ باپتاۋ جالپىعا ورتاق مىندەت. تابيعات انانى ايالاۋدا 2005 جىلدان باستاپ جۇمىسىن باستاعان «جاسىل ەل» ستۋدەنتتەر جاساعىنىڭ ورنى ءبىر توبە. الماتىدا جاسىل ەلدىڭ XIII ماۋسىمى مارەسىنە جەتىپ, جاس ەڭبەكشىلەر جاسىل ەلمەن جازعا دەيىن قوشتاستى.
وسىعان وراي, قالاداعى «فەميلي» دەمالىس پاركىندە جاس ەڭبەكشىلەردى ماراپاتتاۋ ءراسىمى ءوتتى. اتالعان شارا رەسپۋبليكالىق «بەلسەندى جاستاردى قولداۋ» ۇيىمى مەن الماتى قالاسى اكىمدىگىنىڭ جاستار ساياساتى باسقارماسىنىڭ قولداۋىمەن جۇزەگە اسىپ وتىر. ماراپاتتاۋ راسىمىندە ەڭبەكتە تاباندىلىق تانىتىپ كوزگە تۇسكەن ستۋدەنتتەر مەن جۇمىس بارىسىندا بىرنەشە نوميناتسيا بويىنشا دارا شىققان شاكىرتتەر ماراپاتتالدى.
– جاستاردى جۇمىسقا تارتا وتىرىپ, ولاردىڭ بويىنداعى ەڭبەككە دەگەن ىنتاسىن وياتۋعا تىرىسامىز. ولاردىڭ جاقسى ازامات بولىپ قالىپتاسۋىنا بۇل جوبانىڭ تيگىزەر سەپتىگى مول. جاز ايلارىندا ۋاقىتتارىن بوسقا وتكىزبەي قاراجاتتارىن تاۋىپ اتا-اناعا قولعابىس بولسا, ەكىنشى جاعىنان قورشاعان ورتانىڭ تازالىعىنا ءوز ۇلەستەرىن قوسادى. قالا اۋماعىنداعى دەمالىس ورىندارى مەن شاتقالداردىڭ تازالىعىن قامتۋدا «جاسىل ەل» جاساعىنىڭ اتقارعان جۇمىسى اۋقىمدى, – دەيدى جوبا ۇيلەستىرۋشىسى جۇلدىز اپەشوۆا.
ەلباسى يدەياسىنان باستاۋ العان باعدارلاما بىرنەشە جىل كولەمىندە ءوز جەمىسىن بەرىپ كەلەدى. وعان دالەل وتكەن جىلدىڭ وزىندە «جاسىل ەل» جاساعىنىڭ جاس ەڭبەككەرلەرى ەل اۋماعى بويىنشا 5 مىڭنان استام اعاش وتىرعىزىپ, 4گا اۋماقتى 130 توننا قوقىستان تازارتقان. ەسكە سالساق, بەلسەندى جاستاردان قۇرالعان «جاسىل ەل» ستۋدەنتتەر جاساعى ەلىمىزدىڭ 14 وبلىسى جانە الماتى مەن استانا قالالارىندا جىل سايىن تاباندى ەڭبەك ەتىپ كەلەدى. جاسىلەلدىكتەر تەك قانا ەلىمىزدىڭ تازالىق ساقتاۋ مەن كوگالدانۋىنا عانا ەمەس, وعان قوسا مەملەكەتىمىزدىڭ وركەندەۋىنە جاۋاپتى جاڭا بۋىن تاربيەلەپ, جاستاردى جۇمىسپەن قامتۋعا, ستۋدەنتتەردىڭ پاتريوتتىق رۋحىن كوتەرۋگە ۇلكەن ۇلەس قوسۋدا.
«ارمان وكتيابر,
ەگەمەن قازاقستان»
الماتى