اشعابادتا ءوتىپ جاتقان جابىق عيماراتتاعى جانە جاۋىنگەرلىك ونەر بويىنشا V ازيا ويىندارىنىڭ سەگىزىنشى جانە توعىزىنشى كۇنى قازاقستان قۇراماسىنىڭ قورجىنى سەگىز التىن, ءتورت كۇمىس جانە جەتى قولا مەدالمەن تولىقتى. اسىرەسە بالۋاندارىمىز نامىستى قولدان بەرمەدى. ولاردىڭ ەنشىسىندە ءتورت التىن, ءۇش كۇمىس جانە التى قولا جۇلدە بار.
بيىلعى ازيا ويىندارىنىڭ باعدارلاماسىنا بەلبەۋ كۇرەسى بويىنشا قازاق كۇرەسى ەنگەن بولاتىن. ءتول كۇرەسىمىزدەن سىنعا تۇسكەن بالۋاندارىمىز نامىستى قولدان بەرمەي, ناتيجەلى ونەر كورسەتتى. اتاپ ايتار بولساق, قازاق كۇرەسىنەن ايبەك نۇعىماروۆ (+90 كگ) پەن قاسىمحان تۇلەنباي (70 كگ) چەمپيون اتانسا, ءادىلجان ىستىباەۆ (90 كگ) قولا جۇلدەگەر اتاندى. ال بەلبەۋ كۇرەسىنەن پەريزات جاقىپبەكوۆا ازيا (70 كگ) ويىندارىنىڭ التىن مەدالىن يەلەندى. اۋەزحان قۇربانقۇلوۆ (70 كگ) جانە ۇلجان دۇيسەمباەۆالار قولانى قاناعات تۇتتى.
جارىستىڭ سەگىزىنشى جانە توعىزىنشى كۇنىندە پاۆەل ۆورجەۆ ۆەلوسپورتتىڭ ەكى تۇرىنەن التىن مەدال يەلەنسە, قازاقستان قۇراماسى كوماندالىق ەسەپتە دە توپ جاردى. ءادىل قاسقاباي ءجۇزۋ سپورتىنان تۇعىردىڭ ءبىرىنشى ساتىسىنان كورىنسە, اسەم سادىقوۆا (69 كگ) اۋىر اتلەتيكادان چەمپيون اتاندى. سونداي-اق مۋايتاي سپورتىنان ءابىل عاليەۆ (54 كگ), ۆاديم لوپارەۆ (75 كگ), ەميل ۋماەۆ (81 كگ) جانە ۆەلوسپورتتان ارتەم زاحاروۆ كۇمىس جۇلدەنى قاناعات تۇتتى.
سونىمەن قاتار قۇراما قورجىنىنا قولا مەدالداردى بەلبەۋ كۇرەسىنەن اۋەزحان قۇربانقۇل (70 كگ), ۇلجان دۇيسەمباەۆا (60 كگ), بيليارد سپورتىنان ءاليحان قاراناەۆ, كيكبوكسينگتەن ايگەرىم راحاتوۆا (56 كگ), ءجۇزۋ سپورتىنان كوماندالىق جارىستا جانە ۆەلوسپورتتان سەرگەي پونومارەۆ سالدى. V ازيا ويىندارىنىڭ توعىز كۇنىنىڭ قورىتىندىسى بويىنشا قازاقستان قۇراماسى جالپىكوماندالىق ەسەپتە 50 مەدالمەن (15, 13, 22) التىنشى ورىنعا تۇراقتادى. ازىرشە تۇرىكمەنستان قۇراماسىنىڭ سپورتشىلارى توپ باسىنان تۇسپەي كەلەدى.