ءمامس-ءتىڭ ءمان-جايى ءتۇسىندىرىلدى

جيىندا «الەۋمەتتىك مەديتسينالىق ساق­تاندىرۋ قورى» اق باسقارما ءتورايىمى ەلەنا باحمۋتوۆا «قورعا وسى ۋاقىتقا دەيىن قانشا قارجى كەلىپ ءتۇستى؟ قارجىنى كىم جانە قايدا ساقتايدى؟ قارجى قالاي رەتتەلەدى؟» دەگەن سياقتى حالىقتى تولعاندىرىپ كەلە جاتقان وتكىر ساۋالدارعا ناقتى جاۋاپ بەردى. ە.باحمۋتوۆانىڭ مالىمەتىنە قاراعاندا, قازاقستاندىقتار 15 قىركۇيەككە دەيىن قورعا 8 ملرد تەڭگەدەن استام قارجى اۋدارىپ ۇلگەرگەن. قور مەديتسينالىق قىزمەتتى تۇتىنۋشىلار سانى مەن تۇسكەن قارجى تۋرالى ءار اپتا سايىن ەسەپ بەرىپ وتىرادى. قازىر ساقتاندىرىلعان مەديتسينا قىزمەتىن پايدالانۋشىلار 3,9 ميلليونعا جەتكەن. بۇل كورسەتكىش مينيسترلىكتىڭ الدىن الا جوبالاعان جوسپارىمەن سايكەس كەلەدى. «مىندەتتى الەۋمەتتىك مەديتسينالىق ساقتاندىرۋ  تۋرالى» زاڭ بويىنشا قور اكتيۆتەرىنىڭ ساقتالۋىنا مەملەكەت كەپىلدىك بەرەدى. جينالعان قارجى تەك ۇلتتىق بانكتە ساقتالادى جانە وسى بانك ارقىلى باسقارىلادى. ولارمەن سەنىمدى باسقارۋ تۋرالى كەلىسىم شارت جاسالعان», دەدى ە.باحمۋتوۆا.

ال مەديتسينالىق ساقتاندىرۋ قورىنا 2018 جىلى مەملەكەتتىك تاپسىرىس نەگىزىندە قىزمەت كور­سەتۋ جونىندە ءوتىنىش بەرگەن ۇيىم­داردىڭ جارتىسىنا جۋىعى – جەكەمەنشىك كلينيكالار.  2018 جىلى مەديتسينالىق كومەك كورسەتۋدەن ۇمىتكەر دەنساۋلىق ساقتاۋ سۋبەكتىلەرىنىڭ دەرەكقورىنا بارلىعى 1519 دەنساۋلىق ساقتاۋ مەكەمەسى ءوتىنىش بەرگەن. ونىڭ 45 پايىزى, ياعني 686-سى – جەكەمەنشىك مەكەمە. رەفورمانى ءتيىمدى جۇرگىزۋگە بايلانىستى جاسالعان دەرەكقورعا مەديتسينالىق كومەكتىڭ نەگىزگى كولەمىن كورسەتەتىن جەتكىزۋشىلەر دە, مەديتسينالىق قىزمەتتىڭ جەكەلەگەن تۇرىمەن اينالىساتىن قوسالقى دەنساۋلىق ۇيىمدارى دا ەنگىزىلدى. دەرەكقور تۇراقتى تۇردە جاڭارتىلىپ وتىرادى.

ازاماتتاردى ەمدەۋ مەكە­مەلەرىنە تىركەۋ ناۋقانى – الداعى جىلداعى مەديتسينالىق قىزمەت­تەردى ساتىپ الۋ ۇدەرىسىنىڭ زاڭدى جالعاسى. تۇرعىندار باستاپقى مەديتسينالىق-سانيتارلىق كومەك كورسەتەتىن ۇيىمدارعا بيىلعى قىركۇيەك ايىنىڭ 15-ءى مەن قارا­شانىڭ 15-ءى ارالىعىندا تىركەلە الادى. تىركەلۋ كەزىندە ازاماتتار ەمحانانى ەركىن تاڭداۋ قۇقىعىن پايدالانا الادى.

مينيستر ە.ءبىرتانوۆ مەديتسي­نالىق ساقتاندىرۋ جۇيەسى ەنگى­زىلگەنىمەن, مەملەكەت ازاماتتار الدىنداعى جاۋاپكەرشىلىگىنەن باس تارتپايتىنىن ايتتى. ويتكەنى اتا زاڭدا ءار ازاماتقا تەگىن مەدي­تسينالىق كومەك كورسەتۋ كەپىل­دىگى بەرىلگەن. ءمامس جۇيە­سىنە سايكەس بولماسا دا,  ءار ازاماتقا تەگىن مەديتسينالىق كومەك بەرۋ جوسپارلانعان. بۇل جەدەل جاردەم كومەگى, يممۋنيزاتسيا جانە قوسىمشا سىرقاتىنا وراي دياگنوستيكالاۋ مەن ەمدەۋ. سونداي-اق ونكولوگيا, تۋبەركۋلەز جانە پسيحياتريالىق سىر­قاتقا شالدىققان ازاماتتار مەملەكەت كومەگىنەن تىسقارى قالمايتىنىن جەتكىزدى.  ءمامس نەگىزىندە ساقتاندىرىلماعان تۇرعىندارعا ەكى جىلعا دەيىن تەگىن العاشقى امبۋلاتورلىق جاردەم, ءتۇرلى دياگنوستيكالىق كومەك جانە ءدارى-دارمەكپەن قامتاماسىز ەتۋدى دە ۇكىمەت ءوز مىندەتىنە الۋدى جوسپارلاپ وتىر.  ءمامس-ءتىڭ نەگىزگى قارجى كوزى جۇمىس بەرۋشى مەكەمەلەر مەن جەكە كاسىپكەرلەر بولعاندىقتان, العاشقى كەزەڭنىڭ جۇمىسى تولىعىمەن جوسپارعا سايكەس جۇرگىزىلىپ كەلەدى. جىل سوڭىنا دەيىن 25 ملرد تەڭگە ساقتاندىرۋ قورىنا كەلىپ ءتۇسۋى ءتيىس. بۇل قارجى تەك ازاماتتاردىڭ دەنساۋلىعىن جاقسارتۋعا باعىتتالادى. ە.ءبىرتانوۆ ەلباسىنىڭ ءمامس-ءتى جەتىلدىرۋ ماسەلەسىنە بايلانىستى بەرگەن تاپسىرمالارى مەن تالاپتارىن ورىنداۋدى باستى مىندەتى رەتىندە بەلگىلەپ, جۇيەنىڭ كەمشىن تۇستارىمەن جۇمىلا جۇمىس ىستەپ جاتقانىن جەتكىزدى.

ايگۇل احانبايقىزى, «ەگەمەن قازاقستان»

الماتى