بۇگىن «حابار» ارناسىندا «داۋرەن اباەۆپەن اشىق ديالوگ» باعدارلاماسىنىڭ كەزەكتى شىعارىلىمى كورسەتىلدى.
باعدارلاما بارىسىندا قر اقپارات جانە كوممۋنيكاتسيالار ءمينيسترى داۋرەن اباەۆ باعدارلاما جۇرگىزۋشىسى ميحايل دوروفەەۆتىڭ قويعان وزەكتى سۇراقتارىنا جاۋاپ بەردى.
العاشقى تالقىلانعان ماسەلە وتكەن بىرنەشە اي كولەمىندە ورىن العان ماڭىزدى تاقىرىپتار توڭىرەگىندە بولدى.
«وتكەن جاز جاڭالىقتارعا تولى بولدى. سونىڭ ىشىندە ەكسپو كورمەسىنىڭ وتكىزىلۋىن اتاپ وتكىم كەلەدى. شارا ەلىمىزگە وڭ اسەر ەتكەنى ءسوزسىز انىق. بۇل تۋرالى ەلباسىمىز ن. نازارباەۆ تا, كورمەنى تاماشالاۋعا كەلگەن قوناقتار دا ايتىپ جاتىر. بۇدان بولەك, وزگە دە جاڭالىقتار بولدى: لاتىنعا كوشۋ, جاڭا وقۋلىقتار, مەديتسينالىق ساقتاندىرۋ. بىراق مەن ەرەكشە نازاردى يسلام ىنتىماقتاستىق ۇيىمىنىڭ سامميتىنە اۋدارعىم كەلەدى. 83 دەلەگاتسيانىڭ باسىن ءبىر جەردە قوسىپ, سامميت وتكىزۋ - مىقتى ەل ءۇشىن دە وڭاي شارۋا ەمەس,» دەدى مينيستر.
داۋرەن اسكەربەك ۇلىنىڭ پايىمداۋىنشا, ويۇ ءسامميتىنىڭ مارتەبەسى ەۋروپاداعى قاۋىپسىزدىك جانە ىنتىماقتاستىق ۇيىمى ءسامميتىن وتكىزۋدەن كەم تۇسپەيدى. بۇكىل يسلام الەمىنىڭ وكىلدەرىن جيناپ, ۇلكەن شارا وتكىزۋ - ەلباسىمىزدىڭ ابىرويىنىڭ ارقاسىندا جۇزەگە استى دەيدى مينيستر.
«83 دەلەگاتتىڭ 15-ءى مەملەكەت باسشىلارى بولدى. ءسامميتتىڭ تاقىرىبىنا دا ەرەكشە نازار اۋدارعىم كەلەدى – عىلىم, يننوۆاتسيا, تەحنولوگيا جانە جاڭعىرۋ. بۇل تاقىرىپتى نۇرسۇلتان ءابىش ۇلى ۇسىندى. قازىرگى تاڭدا يسلام الەمىنە راديكالدانۋ قاۋپى ءتونىپ تۇر. سوندىقتان تاڭدالعان تاقىرىپ وتە ورىندى ءارى ماڭىزدى بولدى دەپ ويلايمىن. استانادا قابىلدانعان دەكلاراتسيا بۇكىل يسلام الەمىنىڭ دامۋىنا ۇلكەن اسەر بەرەتىنىنە سەنەمىن», دەپ مالىمدەدى داۋرەن اباەۆ.
ەستەرىڭىزگە سالا كەتەيىك, اپتا سايىن «حابار» ارناسىندا «داۋرەن اباەۆپەن اشىق ديالوگ» باعدارلاماسى كورسەتىلەدى. باعدارلاما بارىسىندا مينيستر وزەكتى جاڭالىقتارعا توقتالىپ, ماڭىزدى سۇراقتارعا جاۋاپ بەرەدى.