2016 جىلدىڭ قىركۇيەك ايىنان باستاپ استانادا 36 جاڭا قوناق ءۇي پايدا بولدى. ول تۋرالى اكىمدىكتە وتكەن ءباسپاسوز ءماسليحاتى بارىسىندا قالانى دامىتۋ جانە ينۆەستيتسيالار بويىنشا باسقارما باسشىسى الىشەر ابدىقادىروۆ مالىمدەدى.
ونىڭ مالىمەتىنشە, ەلوردانىڭ دامۋىنا تۋريزم سالاسى سۇبەلى ۇلەس قوستى.
- تۋريزم سالاسىندا 3 مىڭنان استام جاڭا جۇمىس ورىندارى اشىلدى. بيزنەس ورتا يندۋسترياسى اۋقىمدى ۇلەس قوستى. كوپ قوناق ۇيلەر جوسپارلانعان ۋاقىتىندا اشىلدى. ەگەر وتكەن جىلى استانادا 165 قوناق ۇي جۇمىس ىستەسە, بۇگىندە 201 قوناق ءۇي قىزمەت كورسەتۋدە. ەكسپو-نىڭ ءۇش ايىندا قوناق ۇيلەردىڭ تولتىرىمدىلىعى ءۇش ەسەگە ارتتى, - دەپ حابارلادى ابدىقادىروۆ.
ول حوستەلدەردىڭ سانى 76-دان 95-كە دەيىن وسكەنىن ايتتى. بۇدان بولەك, ەكسپو-2017 حالىقارالىق كورمەسىن وتكىزۋ كەزەڭىندە ايماق تۇرعىندارى ءۇشىن ەلوردا جوو-دا 6,5 مىڭ ورىندى 16 جاتاقحانا قولجەتىمدى باعامەن دايىندالدى.
- جاتاقحانالاردا جوندەۋ جۇمىستارى جۇرگىزىلدى. قۇرال-جابدىقتار ساتىپ الىندى. ەۋرازيا ۇلتتىق ۋنيۆەرسيتەتى مەن قازاق اگروتەحنيكالىق ۋنيۆەرسيتەتى كورمەنىڭ بارلىق كەزەڭىندە تولىق بولدى,- دەيدى ول.
كورمە كەزىندە برونداۋ ءبولىمى قۇرىلىپ, ول ارقىلى ايماقتىق اكىمدىكتەرمەن ءوزارا قارىم-قاتىناس ورناتىلدى جانە ارنايى بىرىڭعاي برونداۋ جۇيەسى ارقىلى ايماقتىق دەلەگاتسيالاردىڭ ورنالاسۋى قاداعالاندى. الىشەر ابدىقادىروۆتىڭ مالىمەتى بويىنشا, 2016 جىلعى كەزەڭمەن سالىستىرعاندا, تۋروپەراتورلاردىڭ قىزمەتتەرىنە سۇرانىس 78%-عا ارتقان.
- Astana City Pass تۋريست كارتاسىن 30 مىڭعا جۋىق ادام قولداندى. كورمە كەزەڭىندە ەكى قاباتتى ەكسكۋرسيالىق اۆتوبۋستاردى 5 مىڭنان استام ادام پايدالاندى. بۇل وتكەن جىلمەن سالىستىرعاندا 2,5 ەسە كوپ. كورمە كەزەڭىندە اۋديوگيدتاردى 13 ەلدەن (اۆستراليا, مالايزيا, سينگاپۋر, سلوۆاكيا, رەسەي, ءازىربايجان, تۇركيا, گەرمانيا, قىتاي, يسپانيا, پولشا, فرانتسيا, سەربيا) 12 مىڭ ادام قولداندى, - دەپ اتاپ ءوتتى.
جالپى باسقارما اقپاراتى بويىنشا ەلىمىزدىڭ بارلىق تۋريستىك سالاسى ءۇش اي ىشىندە بارىنشا كومەك كورسەتىپ, ساپالى جۇمىس ىستەدى.