اۋعان سوعىسى ارداگەرلەرى ۇيىمدارىنىڭ «قازاقستان ارداگەرلەرى» قاۋىمداستىعى ەلباسىنىڭ قازاق ءتىلىن بىرتىندەپ لاتىن الىپبيىنە كوشىرۋ باستاماسىن قولدايدى.
وسى ارقىلى ەلىمىز قازىرگى زامانعى تەحنولوگيالىق ورتاعا, كوممۋنيكاتسياعا, سونداي-اق عىلىم جانە ءبىلىم بەرۋ پروتسەسىنە تەرەڭىرەك كىرىگە تۇسەدى.
مەملەكەت بۇل ىسكە بارىنشا بايىپتىلىقپەن, دايەكتىلىكپەن جانە دايىندىقپەن كىرىسۋدە. ەندى, مىنە, قازاق ءالىپبيىنىڭ لاتىن گرافيكاسىنداعى جوباسىن جالپىحالىقتىق تالقىلاۋ باستالدى. قازاقتىڭ جاڭا جازۋىنىڭ سىنشىسى دا, تىلەكشىسى دە, تورەشىسى دە حالىق بولماق. دەمەك ءالىپبيدىڭ اقىرعى نۇسقاسىنىڭ قانداي بولاتىنى دا بارشا قازاقستاندىقتارعا بايلانىستى بولۋى ءتيىس.
بۇل باستاما ءبولىنىپ-جارىلۋعا ەمەس, ەسكىدەن ارىلۋعا, سانانىڭ جاڭعىرۋىنا, مەملەكەتتىك ءتىلدىڭ جاڭاشا دامۋىنا باستايدى. تاۋەلسىز قازاق ەلىنىڭ ازاماتتارىنا الدەنەنى سىرتتان تاڭۋعا ەشكىمنىڭ حاقىسى جوق. بۇل – ءبىزدىڭ, قازاقستاننىڭ تاۋەلسىز, وركەنيەتتىك تاڭداۋى. بۇل تاڭداۋدا دا بارشا قازاقستاندىقتاردىڭ كەزەكتى رەت ىرىس پەن ىزگىلىككە ۇشتاسار بىراۋىزدىلىق تانىتارىنا سەنىم بىلدىرەمىز.
اۋعان سوعىسى ارداگەرلەرى ۇيىمدارى
«قازاقستان ارداگەرلەرى» قاۋىمداستىعىنىڭ توراعاسى
باقىتبەك سماعۇل