وڭىردەگى ەرتىس اۋدانىندا بيىلعى جاڭا وقۋ جىلىنىڭ العاشقى كۇنى اۋدان مەكتەپتەرىندە «الاقاي, مەن 1-ءشى سىنىپقا بارامىن!» اتتى ءبىلىم كۇنىنە ارنالعان مەرەكەلىك شارالار ءوتتى.
ال, اۋدان ورتالىعى ەرتىس اۋىلىنداعى №3 جالپى ءبىلىم بەرەتىن ورتا مەكتەپكە وبلىس ورتالىعىنداعى رەسەي سبەربانك فيليالىنىڭ وكىلدەرى كەلدى. بارىمىزگە بەلگىلى, بۇل مەكتەپتە رەسەي جيناق بانكىنىڭ باسقارما توراعاسى گەرمان گرەف 70-ءشى جىلدارى ءبىلىم العان. اۋدانداعى پانفيلوۆ اۋىلىندا 1964 جىلى تۋىپ, سول جەردە ەرجەتكەن. اكە-شەشەسى سوعىس كەزىندە ەرتىس اۋدانىنا جەر اۋدارىلعان. رەسەيلىك تانىمال قارجىگەر ءار جىلدارى قىزمەتى اسا قاۋىرت بولسا دا, ءساتى تۇسكەندە تۋعان اۋىلىنا, وسكەن جەرىنە كەلىپ تە تۇرادى. وسىدان 6-7 جىلداي بۇرىن ءوزى وقىعان مەكتەبىنىڭ 75 جىلدىعىنا وراي گەرمان وسكاروۆيچ بىرنەشە كومپيۋتەر, ينتەراكتيۆتى تاقتا, فوتواپپارات, بەينەكامەرا تارتۋ ەتكەن-ءدى.
بۇل جولى دا وبلىس ورتالىعىنداعى رەسەي جيناق بانكىنىڭ وكىلى ايسۇلۋ قاليەۆا گەرمان گرەفتىڭ ىستىق سالەمىن جەتكىزدى. سالەمدەمە «الاقاي, مەن 1-ءشى سىنىپقا بارامىن!» شاراسىنا وراي №3 ەرتىس ورتا مەكتەبىنىڭ 1 ء–شى سىنىبىنا وقۋعا كەلگەن 20-دان اسا وقۋشىعا وقۋ قۇرالدارى تارتۋ ەتىلدى. الداعى ۋاقىتتا وبلىستىق بانك فيليالى «مەكتەپكە تاعزىم» اكتسياسى بويىنشا كومەك كورسەتۋگە دە نيەتتى. بالالار قۋانىشقا بولەنىپ, ەستەلىك سۋرەتتەرگە ءتۇستى. مەكتەپ ديرەكتورى ساندۋعاش بەكجاساروۆانىڭ ايتۋىنشا, قازىر مەكتەپتە 72 قازاق, 127 ورىس, 15 ۋكراين, 2 بەلورۋس, 17 نەمىس, 1 ازەربايجان, 7 تاتار جانە شەشەن, مولداۆان باسقا دا ۇلت وكىلدەرىنىڭ بالالارى ورىس تىلىندە ءبىلىم الادى.
فاريدا بىقاي
«ەگەمەن قازاقستان»
پاۆلودار وبلىسى, ەرتىس اۋدانى