ۇكىمەت ۇيىندە وتكەن ءباسپاسوز ءماسليحاتىندا «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ ەكسپو الاڭىندا ورنالاساتىن قارجى ورتالىعىنىڭ العاشقى ادىمدارى مەن الداعى جوسپارلارىمەن ءبولىستى. «استانا» قارجى ورتالىعى الاڭىندا ينۆەستورلارعا تەڭدەسسىز جەڭىلدىك شارتتارى قاراستىرىلىپ وتىر ەكەن.
ايتالىق, ينۆەستورلاردى ىنتالاندىرۋ ءۇشىن 2065 جىلدىڭ اياعىنا دەيىن كورپوراتيۆتىك جانە جەكە تابىس سالىعىننان بوساتاتىن سالىقتىق جەڭىلدىكتەر ۇسىنىلادى. كەلەسى جىلدىڭ قاڭتار ايىنان بىرىككەن اراب امىرلىكتەرى, مالايزيا, سينگاپۋر, موناكو سەكىلدى ەلدەردىڭ ازاماتتارى قازاقستانعا 30 كۇنگە دەيىن ۆيزاسىز كىرە الادى.
ال ورتالىقتىڭ قىزمەتكەرلەرى مەن ولاردىڭ وتباسىلارىنا بەس جىلعا دەيىن ۇزاق مەرزىمدى ۆيزالار بەرىلەدى. سونداي-اق, ۇزدىك تاجىريبەگە ساي, قارجى ورتالىعى جەڭىلدەتىلگەن ۆيزا بەرۋ رەجيمىن, تىركەۋدى, جۇمىسقا الۋدى, وزگە دە قۇجاتتىق پروتسەدۋرالاردى ء«بىر تەرەزە» قاعيداتىمەن جۇزەگە اسىرماق. بۇعان قوسا, ارنايى مامانداندىرىلعان «احقو ەكسپات ورتالىعىن» قۇرۋ جوسپارلانىپ وتىر. بۇل ورتالىققا كوشى-قون, اكىمشىلىك پوليتسيا, مەملەكەتتىك كىرىستەر, حالىققا جانە ينۆەستورلارعا قىزمەت كورسەتۋ ورتالىقتارىنىڭ قىزمەتتەرى توپتاستىرىلىپ, شەتەلدىك قىزمەتكەرلەرگە ءبىر جەردەن قىزمەت كورسەتۋ ءتارتىبى ەنگىزىلمەك.
سونىمەن, ەل ەكونوميكاسىنا پايداسى كوپ ءىرى جوبالاردى جۇزەگە اسىرعالى وتىرعان «استانا» حالىقارالىق قارجى ورتالىعى 2018 جىلدىڭ قاڭتار ايىنان باستاپ تولىققاندى قىزمەتىنە كىرىسەدى. ء باسپاسوز ءماسليحاتىنا قاتىسىپ, ءسوز سويلەگەن قارجى ورتالىعىنىڭ اتقارۋشى ديرەكتورى ساياسات نۇربەكتىڭ ايتۋىنشا, ورتالىق ءوزىنىڭ الدىندا تۇرعان ماڭىزدى مىندەتتەردى كەزەڭ-كەزەڭىمەن جۇزەگە اسىرماق. العاشقى بەسجىلدىقتا ورتالىق ازيانى قامتيتىن وڭىرلىك ورتالىققا اينالۋ, ودان كەيىن ەۋرازيا كەڭىستىگىنە شىعۋ جوسپارلانىپ وتىر. سودان كەيىنگى ۇزاق مەرزىمدى دامۋ ستراتەگياسىندا عالامدىق دەڭگەيگە جەتىپ, الەمنىڭ ەڭ ۇزدىق قارجى حابىنا اينالۋ كوزدەلىپ وتىر.
ال ءدال قازىرگى جاعدايدا «استانا» قارجى ورتالىعىنىڭ ينفراقۇرىلىمدارىن جاساقتاۋ, ءارتۇرلى قۇرىلىمدارىن قۇرۋ جانە ولاردى بىلىكتى كادرلارمەن قامتاماسىز ەتۋ ءۇردىسى جۇرگىزىلىپ جاتىر.
قىمبات توقتامۇرات,
«ەگەمەن قازاقستان»