ءماجىلىس توراعاسى نۇرلان نىعماتۋليننىڭ جەتەكشىلىك ەتۋىمەن وتكەن پالاتانىڭ جالپى وتىرىسىندا ەلىمىزدىڭ ترانزيتتىك الەۋەتىن ارتتىراتىن ەكى زاڭ جوباسى ماقۇلداندى. ونىڭ ەكەۋى دە وزبەكستان مەن قازاقستاننىڭ جانە قازاقستان مەن نورۆەگيا كورولدىگىنىڭ اراسىنداعى اۆتوموبيل قاتىناستارىن رەتتەۋگە باعىتتالعان.
جيىندى اشقان ءماجىلىس توراعاسى وسى كەزگە دەيىن ەلىمىزدىڭ كولىكتىك ينفراقۇرىلىمدارىن پايدالانا وتىرىپ, جاھاندىق لوگيستيكالىق جۇيەنى قالىپتاستىرۋ ماقساتىندا وزبەكستان مەن نورۆەگياعا ءتيىستى دەڭگەيدە كەلىسىمشارتتار جىبەرىلگەندىگىن اتاپ ءوتتى.
«مۇنداي قادام ەلباسىمىزدىڭ مەملەكەت الدىنا قويعان نەگىزگى تاپسىرمالارىن ورىنداۋ ءۇشىن وتە ماڭىزدى بولىپ تابىلادى. سەبەبى, رەسپۋبليكامىزدىڭ ترانزيتتىك الەۋەتىنىڭ ارتۋى – قازاقستاندى ەۋرازيالىق كولىك-لوگيستيكالىق حاب رەتىندە تانىتا تۇسەدى. ءبىزدىڭ ەلدىڭ وعان زور مۇمكىندىكتەرى بار», دەدى ن.نىعماتۋلين.
ينۆەستيتسيالار جانە دامۋ ءمينيسترى جەڭىس قاسىمبەك تانىستىرعان «2006 جىلعى 20 ناۋرىزداعى قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى حالىقارالىق اۆتوموبيل قاتىناسى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى ەكى ەل اراسىنداعى جولاۋشىلار تاسىمالىن جۇزەگە اسىرۋعا قۇقىق بەرەدى جانە وسى سالاداعى قىزمەتتى رەتتەيدى.
ءمينيستردىڭ ايتۋىنشا, بۇل قۇجات اۆتوموبيل كولىگىمەن جولاۋشىلار تاسىمالىن قامتاماسىز ەتۋگە نەگىزدەلگەنىمەن, ونىڭ استارىندا قوس مەملەكەت اراسىنداعى ساۋدا-ەكونوميكالىق ارىپتەستىكتى تەرەڭدەتۋ مەن بەلسەندى قارىم-قاتىناستى جانداندىرۋ مۇددەسى جاتقاندىعى بەلگىلى.
دەپۋتاتتاردىڭ ءبىراۋىزدان ماقۇلداۋىنا يە بولعان بۇل قۇجاتتا ەكى ەل اراسىندا الداعى ۋاقىتتا جولعا شىعاتىن اۆتوبۋس قاتىناستارىنىڭ باعىتتارى مەن ونىڭ قىزمەتىن ءبىر ىزگە تۇسىرەدى. وسى ماقساتتا قازاقستان مەن وزبەكستان رەسپۋبليكاسى اتىنان ارەكەت ەتەتىن سالالىق مامانداندىرىلعان كوميسسيا قۇرىلعان جانە ول جىلىنا ەكى رەت وتىرىس وتكىزۋ ارقىلى قىزمەت بارىسىندا تۋىندايتىن ماسەلەلەردىڭ ءتۇيىنىن تارقاتىپ وتىرۋعا مىندەتتەلەدى.
سونداي-اق, جەڭىس ماحمۇد ۇلىنىڭ تۇسىندىرۋىنشە قىزمەت كورسەتەتىن كومپانيالار سانى ءاربىر مەملەكەتتەن وننان كەم بولماۋى مۇمكىن ءارى ولارعا 5 جىلدىق كەلىسىمشارت ۇسىنىلادى دەپ جوسپارلانعان.
وسى ورايدا ءبىر ەسكەرتە كەتەرلىك جايت, مامانداردىڭ ايتۋىنشا, قوس مەملەكەت اراسىنداعى وتكەن جىلعى جولاۋشىلار اعىنى 8 ميلليون ادامنىڭ شاماسىن قۇراعان بولسا, اۆتوموبيل قاتىناسى ويداعىداي ىسكە قوسىلعاننان كەيىنگى كورسەتكىش 12 ميلليونعا جەتۋى مۇمكىن ەكەن.
دەپۋتاتتار تالقىسىنان ءوتىپ, ماقۇلدانعان كەلەسى قۇجات – «قازاقستان رەسپۋبليكاسى ۇكىمەتى مەن نورۆەگيا كورولدىگىنىڭ ۇكىمەتى اراسىنداعى حالىقارالىق اۆتوموبيل تاسىمالدارى تۋرالى كەلىسىمدى راتيفيكاتسيالاۋ تۋرالى» زاڭ جوباسى بولدى.
زاڭ جوباسىنىڭ نەگىزگى ماقساتى قازاقستان مەن نورۆەگيا كورولدىگى اراسىنداعى حالىقارالىق اۆتوموبيل قاتىناسى سالاسىنداعى ىنتىماقتاستىقتى ودان ءارى دامىتۋ ءارى اۆتوموبيل تاسىمالدارىن جۇزەگە اسىرۋدى جەڭىلدەتۋ بولىپ تابىلادى. سوندىقتان دا اتالعان كەلىسىمدى راتيفيكاتسيالاۋ ەكى ەل اراسىنداعى اۆتوموبيل تاسىمالدارىن, ولاردىڭ اۋماقتارى ارقىلى ءترانزيتتى جۇزەگە اسىرۋ جانە قازاقستان–نورۆەگيا ساۋدا-ەكونوميكالىق ىنتىماقتاستىعىن ودان ءارى دامىتۋ ءۇشىن قۇقىقتىق نەگىز جاساۋعا مۇمكىندىك بەرەدى.
سونداي-اق, وتىرىس اياسىندا ءماجىلىس دەپۋتاتتارى بىرقاتار جاڭا زاڭ جوبالارىن سالالىق كوميتەتتەردە تالقىلاپ, ازىرلەۋ ءۇشىن وڭ شەشىم قابىلدادى. ولاردىڭ قاتارىندا سالىق سالۋ ماسەلەلەرى بويىنشا وزگەرىستەر ەنگىزۋ تۋرالى جانە ۇجىمدىق قاۋىپسىزدىك تۋرالى شارت ۇيىمى شەڭبەرىندە قۇپيا اقپاراتتىڭ ساقتالۋىن قامتاماسىز ەتۋ مەن يسلام ۇيىمى اراسىنداعى شتاب-پاتەر تۋرالى كەلىسىمدى قاراۋ سىندى زاڭ جوبالارى بار.
نۇرلىبەك دوسىباي,
«ەگەمەن قازاقستان»